LEKSYON 06
Paonan-o Nagtikang an Kinabuhi?
“[An Dios] an gintitikangan han kinabuhi.” (Salmo 36:9) Natoo ka ba hito? An iba nasiring nga waray naglarang han kinabuhi. Kon tinuod ito, karuyag sidngon basta na la kita nga nabuhi. Pero kon ginlarang ni Jehova nga Dios an kinabuhi, sigurado nga may-ada ito katuyoan. a Usisaha an asoy ha Biblia mahitungod ha gintikangan han kinabuhi ngan kon kay ano nga angayan la nga tumoo kita hito.
1. Paonan-o nagtikang an uniberso?
An Biblia nasiring: “Ha tinikangan ginlarang han Dios an langit ngan an tuna.” (Genesis 1:1) Kadam-an nga syentista an nauyon nga an uniberso may tinikangan. Paonan-o ito ginlarang han Dios? Gin-gamit niya an iya “aktibo nga pwersa”—an iya baraan nga espiritu—basi himoon an ngatanan nga aada ha uniberso, upod na an mga galaksi, mga bitoon, ngan mga planeta.—Genesis 1:2.
2. Kay ano nga ginlarang han Dios an tuna?
Hi Jehova “waray maglarang [han tuna] nga waray la katuyoan, kondi nagporma hito basi ukyan.” (Isaias 45:18) Ginhimo niya an aton planeta basi magin komportable ngan permanente nga urukyan han mga tawo. (Basaha an Isaias 40:28; 42:5.) Iginpapakita han syensya nga an tuna naiiba gud ha iba nga planeta. Ito la an planeta nga makakasustiner han kinabuhi han tawo.
3. Ano an kaibahan han mga tawo ha mga hayop?
Katapos ni Jehova himoon an tuna, naglarang hiya dida hito hin mga butang nga may kinabuhi. Siyahan, naglarang hiya ha tuna hin mga tanom ngan mga hayop. Katapos, “ginlarang han Dios an tawo uyon ha iya dagway.” (Basaha an Genesis 1:27.) Kay ano nga naiiba an mga tawo? Tungod kay ginhimo kita uyon ha dagway han Dios, masusubad naton an iya mga kalidad, sugad han gugma ngan hustisya. Iya liwat kita ginlarang nga may abilidad nga mahibaro hin mga linggwahe, malipay ha makaruruyag nga mga butang, ngan mag-enjoy ha musika. Ngan diri pariho ha bisan ano nga hayop, puydi naton singbahon an aton Maglalarang.
DUGANG NGA USISAHA
Usisaha an ebidensya nga an kinabuhi gindisenyo ngan kon kay ano nga angayan la nga tumoo ha asoy han Biblia mahitungod ha paglarang. Hibaroi kon ano an igintututdo ha aton han mga kalidad han tawo mahitungod ha Dios.
4. Gindisenyo an kinabuhi
Gindadayaw an mga tawo tungod han mga disenyo nga ira ginkopya tikang ha mga linarang. Salit hin-o man an angay dayawon ha orihinal nga mga disenyo? I-play an VIDEO, katapos, hisguti niyo an masunod nga pakiana.
-
Ano nga mga disenyo an ginkopya han mga tawo tikang ha mga linarang?
An tagsa nga balay may nagdisenyo ngan naghimo, pero hin-o an nagdisenyo ngan naghimo han mga linarang ha palibot? Basaha an Hebreo 3:4, katapos, hisguti niyo ini nga mga pakiana:
-
Ano nga mga disenyo ha mga linarang ha palibot an bilib ka gud?
-
Angayan ba nga tumoo nga gindisenyo an uniberso ngan an ngatanan nga aada hito? Kay ano?
Maaram ka ba?
May makikita ka nga mga artikulo ngan video parte hini nga topiko ha jw.org ha mga seksyon nga “May-ada ba Nagdisenyo Hito?” ngan “Punto de Bista ha Gintikangan han Kinabuhi.”
“Ha pagkamatuod, an tagsa nga balay may nagtukod, pero an naghimo han ngatanan nga butang amo an Dios”
5. May mag-opay nga rason nga tumoo ha asoy han Biblia mahitungod ha paglarang
Ha Genesis kapitulo 1, ginsusumat han Biblia an gintikangan han tuna ngan han kinabuhi dida hito. Masasarigan mo ba ito nga asoy, o hinimo-himo la ito nga istorya? I-play an VIDEO, katapos, hisguti niyo an masunod nga mga pakiana.
-
Igintututdo ba han Biblia nga an tuna ngan an kinabuhi dida hito ginlarang ha sulod hin unom ka adlaw nga tag-24 ka oras?
-
Pagkita mo, an asoy ba ha Biblia mahitungod ha paglarang katoohan ngan may basihan? Kay ano?
Basaha an Genesis 1:1, katapos, hisguti niyo ini nga pakiana:
-
Siring han mga syentista, an uniberso may tinikangan. Paonan-o ito nauyon ha ginbasa mo pa la ha Biblia?
An iba naghuhunahuna kon ginamit ba an Dios hin ebolusyon ha paglarang. Basaha an Genesis 1:21, 25, 27, katapos, hisguti niyo ini nga mga pakiana:
-
Igintututdo ba han Biblia nga an Dios naghimo hin simple nga selyula, katapos, ginpabay-an ito nga mahimo nga isda, iba pa nga mga hayop, ngan mga tawo? O ginlarang niya an ngatanan nga “klase” han kinabuhi? b
6. An mga tawo naiiba ha mga linarang han Dios
Diri kita pariho ha mga hayop nga ginlarang ni Jehova. Basaha an Genesis 1:26, katapos, hisguti niyo ini nga pakiana:
-
Tungod kay ginhimo kita uyon ha dagway han Dios, ano an igintututdo han aton abilidad ha pagpakita hin gugma ngan pagpaid mahitungod ha personalidad han Dios?
AN IBA NASIRING: “An asoy ha Biblia mahitungod ha paglarang hinimo-himo la.”
-
Ano an imo opinyon? Kay ano?
SUMARYO
Ginlarang ni Jehova an uniberso ngan an ngatanan nga may kinabuhi.
Repaso
-
Ano an igintututdo han Biblia mahitungod ha gintikangan han uniberso?
-
Ginpabay-an la ba han Dios nga an simple nga selyula hinay-hinay nga mahimo nga iba-iba nga klase hin kinabuhi, o iya ginlarang ito ngatanan?
-
Kay ano nga naiiba an mga tawo?
DUGANG NGA IMPORMASYON
Hibaroi kon paonan-o iginpapakita han mga linarang nga may-ada Maglalarang.
“Ano an Igintututdo ha Aton han mga Linarang?” (Pagpamata!, Septyembre 2006)
Kitaa kon paonan-o iginsaysay han tatay ha iya bata pa nga anak an asoy ha Biblia mahitungod ha paglarang.
Usisaha kon an ebolusyon nauyon ha Biblia.
“Gin-gamit ba han Dios an Ebolusyon ha Paglarang han Iba-iba nga Klase hin Kinabuhi?” (Web article)
Usisaha kon iginpapakita ba han mga fossil o mga eksperimento han mga syentista nga ginlarang an kinabuhi o basta na la ito inulpot ngan waray tuyoa.
An Gintikangan han Kinabuhi—Lima nga Angay Ipakiana (brosyur)
a Ha Leksyon 25 hihisgotan kon ano an katuyoan han Dios para ha mga tawo.
b Ha Biblia, an pulong nga “klase” nagtutudlok ha daku nga grupo han buhi nga mga linarang.
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
