Te Tokalelei ʼo Te Fakakaukau
ʼI te Tohi-Tapu, ʼe tou maʼu ai ni fakatokaga ki te ʼu fua kovi ʼo ʼihi aga ʼe kovi. Pea ʼe ina toe fakalotomalohiʼi tatou ke tou gaueʼi tuʼumaʼu te ʼu kalitate ʼae ʼe lelei.
TE ITA
PELESEPETO FAKATOHI-TAPU: “Ko ia ae e ita tuai e lelei age i te tagata toa.”—Taaga Lea 16:32.
TONA FAKAʼUHIGA: Ka tou faiga ke tou lolomi te ʼu meʼa kovi ʼae ʼe tou logoʼi ʼe fua lelei anai. ʼI ʼihi temi ʼe matatonu hatatou iita, kae kapau ʼe mole tou taʼofi vave, ʼe tou tuʼutamakiʼia anai. ʼE fakamahino ʼi te ʼu sivi ka ita he tahi, kua puli tana fakakaukau ʼo ina fai ai ni palalau mo ni aga ʼe fakahemala ai ki ʼamuli.
TE ʼU TOKONI: Faiga ke ke lolomi tou ita, he ʼe feala ke ina puleʼi koe. Ko ʼihi ʼe natou ui ko he tahi ʼe hoko ita ʼe malohi ia, kae ʼi tona fakahagatonu, ʼe vaivai. ʼE ui fenei ’i te Tohi-Tapu: “O hage ko he kolo hala solia pea hala kaupa, e feia te tagata ae e mole feala ke ina lolomi tona ita.” (Taaga Lea 25: 28) Koia ʼi muʼa ʼo hau itaita, ʼe tonu ke ke iloʼi lelei te aluʼaga ʼae neʼe hoko. ʼE ui fenei ia Taaga Lea 19:11: “Ko te tagata ae e poto e mole itaita vave.” Koia, ʼe ko he aga fakapotopoto tau fagono lelei ki ʼae neʼe ke ita ki ai, he feala ai ke ke mahino lelei ki te aluʼaga pea ʼe tokalelei anai tou loto.
TE LOTOFAKAFETAʼI
PELESEPETO FAKATOHI-TAPU: “Kotou fakaha tokotou lotofakafetaʼi.”—Kolose 3:15.
TONA FAKAʼUHIGA: ʼE ui ko he tahi ʼe lotofakafetaʼi ʼe maʼuli fiafia. Pea ʼe toe manatu feia ia natou ʼae neʼe tau mo ni faigataʼaʼia mamafa ohage, ko he mate ʼa he tahi neʼe natou ʼoʼofa ai, peʼe ko te puli ʼo he meʼa maʼuhiga. Pea neʼe natou lava tauʼi te ʼu manatu fakatupu lotovaivai, ʼuhi ko tanatou lotofakafetaʼi ki te ʼu meʼa ʼae ʼe kei natou maʼu, kae
mole ki te manatuʼi tuʼumaʼu ʼo te ʼu meʼa ʼae kua puli.TE ʼU TOKONI: Tohi ʼi te ʼaho fuli he lisi ʼo te ʼu meʼa ʼae ʼe ke fakafetaʼi ki ai, tatau aipe pe ʼe mole faʼa maʼuhiga. Ohage la ko te taulekaleka ʼo te hopo ʼo te laʼa, peʼe ko he faipalalau mo he tahi ʼe ke ʼofa ai, peʼe ko te fakafetaʼi ki te ʼAtua ʼi tana toe foaki atu te maʼuli ʼi te ʼaho fuli. ʼE ke fiafia ai anai mo kapau ʼe ke metitasio mo lotofakafetaʼi ki ai.
ʼE lelei ke ke fakakaukau ki te tupuʼaga ʼo tou fiafia ʼi tau maʼu hou famili mo hou kaumeʼa. Pea ʼi tau mahino leva ki te ʼu tupuʼaga ʼaia, fakaha fakahagatonu kia natou peʼe ʼaki hau faitohi, peʼe ke telefoni. ʼE malohi ai anai ʼakotou felogoi pea ʼe lahi anai tou fiafia koteʼuhi, neʼe ke fai te meʼa ʼae ʼe lelei kia natou.—Gaue 20:35.
TAHI ʼU PELESEPETO FAKATOHI-TAPU
TUKU TAU FAKATUPU KE.
“Ko te kamata o he ke, ko te avahi aia o he kaupa e ina taofi te vai; i mua o te vevela o te ke, ke ke alu o puli.”—TAAGA LEA 17:14.
TUKU TAU TUʼANIA FAU ʼO ʼUHIGA MO TE KA HAʼU.
“ ʼAua naʼa kotou tuʼania ki te apogipogi, koteʼuhi ʼe toe ʼi ai anai mo ʼona tuʼania. ʼE feʼauga pe te ʼaho takitahi mo ʼona fihifihia.”—MATEO 6:34.
TUKU TAU HOKO ITA KAE FAKAKAUKAU LELEI ʼI MUʼA ʼO TAU FAI HE MEʼA.
“E leoleo anai ia koe e te fakakaukau, e taupau anai ia koe e te atamai.”—TAAGA LEA 2:11.