Kua Kotou Iloʼi Koa?
Ne’e fakagafua koa e te kau Loma ke ʼavaifo fakalelei he tahi neʼe natou matehi ʼi te pou, ohage ko Sesu?
TOKOLAHI ʼe natou iloʼi ia te fakamatala ʼo te tautau mo te matehi ʼo Sesu ʼi te pou fakatahi mo he ʼu tagata faifakapo ʼe toko lua. (Mat. 27:35-38) Kae ʼe manatu ʼihi ʼe mole fakaha ʼi te Tohi-Tapu te moʼoni moka talanoa ki te teuteuʼi ʼo te sino mate ʼo Sesu ke ʼavaifo ʼi he fale maka.—Mko. 15:42-46.
Neʼe valoki e ʼihi te ʼu Evaselio. Neʼe mole natou tui ʼe feala ki ʼae neʼe matehi ʼi te pou ke ʼavaifo ohage ko te hahaʼi fuli, ohage la ke ʼavaifo ʼi he fale maka. Neʼe natou manatu ʼe kehe age anai tona faʼahiga ʼavaifo. ʼE fakamahino e te tagata faitala logo ko Ariel Sabar, ʼae neʼe ina tohi ia te sulunale Smithsonian pe koʼe neʼe maʼu e ʼihi te taʼi manatu ʼaia: “Ka tutuki he tahi ki he koluse, neʼe ko he tuʼā ʼaia kia natou ʼae neʼe agakovi ʼaupito. Pea neʼe ui e ʼihi kau poto neʼe ko he meʼa fakavale ke ʼavaifo fakalelei e te kau Loma ia natou ʼaia.” Neʼe loto e te kau Loma ke natou fakalainoaʼi ia te kau faifakapo ʼae neʼe fakatuʼā. Koia, neʼe tuku ai ʼonatou sino ʼi te pou ke ʼomai te ʼu manu ʼo te vao ʼo kai. Pea neʼe li leva te ʼu toega ki te maloloʼaga ʼo te hahaʼi fuli.
Kae neʼe kehe ia mo te tala ʼa te kau sivi ʼo ʼuhiga mo te ʼu toega ʼo ʼihi Sutea neʼe matehi. ʼI te 1968, neʼe maʼu te ʼu hui ʼo he tagata neʼe matehi ʼi te ʼuluaki sekulo. Neʼe natou maʼu ʼi he fale maka fakafamili Sutea, ovi ki Selusalemi. Neʼe natou maʼu te ʼu toega ʼi he kiʼi puha ʼe ʼai ai te ʼu hui. Neʼe maʼu ai te hui ʼo te muliʼi vaʼe ʼo he tahi. Neʼe tutuki ki ai he faʼo ʼukamea ʼe satimeta 11 5. ʼE ui fenei e Sabar: “Neʼe maʼu he ʼu fakamoʼoni ʼaki te hui ʼo te muliʼi vaʼe ʼo te tagata ʼaeni ʼe higoa ko Yehochanan. Pea neʼe ha ʼi te ʼu fakamoʼoni ʼaia ia te moʼoni ʼo te fakamatala ʼae ʼi te Evaselio ʼo ʼuhiga mo te ʼavaifo ʼo Sesu ʼi hona fale maka. ʼI te maʼu ʼo te hui ʼo te muliʼi vaʼe ʼo Yehochanan, neʼe ko he fakamoʼoni ʼaia ka tutuki he tagata ki he koluse ʼi te temi ʼo Sesu pea neʼe fakagafua e te kau Loma ke fai hona ʼavaifo Fakasutea.”
ʼE kei ʼi ai he ʼu manatu kehekehe ʼo ʼuhiga mo te faʼahiga tautau ʼo Sesu ʼi te pou, ʼo mulimuli ki te aluʼaga neʼe fakaha ʼo ʼuhiga mo te hui ʼo te muliʼi vaʼe ʼo Yehochanan. Kae ko te faʼahi ʼae ʼe tou mahino lelei ki ai neʼe ʼavaifo ʼihi kau faifakapo neʼe matehi pea neʼe mole liʼaki feia pe ia natou. Koia, ʼe tonu ke tou tui ki te aluʼaga ʼae ʼe ui ʼi te Tohi-Tapu ʼo ʼuhiga mo te sino ʼo Sesu ʼae neʼe tuku ki he fale maka. ʼAki te ʼu fakamoʼoni, ʼe ha mai ai ia te moʼoni ʼo te ui ʼae ʼi te Tohi-Tapu neʼe teuteuʼi te sino mate ʼo Sesu ke ʼavaifo pea ke tuku ki he fale maka.
Ko te faʼahi ʼae ʼe maʼuhiga, neʼe fakakikite e Sehova ʼe ʼavaifo anai ia Sesu ʼi he fale maka ʼo he tagata koloaʼia. Pea ʼe mole feala ki he tahi ke ina taʼofi ia te fakahoko ʼo te folafola ʼa te ʼAtua.—Esa. 53:9; 55:11.