KENGGIN E RE KE BABYOR NEY | PI N’EN NI KE TAMILANGAN’UY RIY U RAROGON E GIYOW KO KAN
Boch e Deer ni Ke Sum u Murung’agen e Piin ni Yad Bay ko Giyow ko Kan
Kaam lemnag ko uw rarogon e giyow ko kan ara mini’ e piin ni yad ma par u rom? Faanra aray rogon, ma gathi yigoo gur e kam lem ni aray rogon. Ke yan bokum e duw ni ma lemnag e girdi’ murung’agen e re n’ey. Bay boch e girdi’ nib mich u wan’rad ni aram e gin ni ma par e pi ga’ rodad riy ni kar m’ad kakrom, ma thingar un tay farad. Ku bay boch e girdi’ ni yad ma lemnag ni aram bangi ban’en nrib gapas mab felfelan’ e piin ni yad ma par riy ma yima yog e tharmiy ngay. Yad ma lemnag ni aram e gin ni ma par e pi engel riy nge girdi’ ni kar m’ad ni yad ba fel’. Maku boch e girdi’ e yad ma lemnag ni aram e gin ni ma par bokum miriay e milyon e got riy.
Boor e girdi’ ni yad ma yog ndariy be’ nrayog ni nge nang rarogon e giyow ko kan ni bochan e dariy be’ ni ke yib u rom nrayog ni nge weliy murung’agen ngodad. Machane, de puluw e re lem ney. U m’on ni nge yib Jesus Kristus nga fayleng, ma immoy u tharmiy ara ko giyow ko kan. I yog ngak e pi tayugang’ ko teliw ni ur moyed u nap’an e bin som’on e chibog ni gaar: “Ku gub u tharmiy nga but’ ni nggu rin’ e tin ni be finey e en ni ke l’ugeg ku gub, machane gathi nggu rin’ e tin ni gu be finey.” Ki tamilangnag Jesus boch ban’en u rarogon e giyow ko kan u nap’an ni yog ngak e pi apostal rok ni gaar: “Pire’ e singgil ni bay u lan e naun rok e Chitamag.”—John 6:38; 14:2.
Jehovah ni aram fithingan Got e ir e Chitamangin Jesus. Ma bay e “naun” rok Jehovah u tharmiy. (Psalm 83:18) Ere, dariy be’ nrayog ni nge weliy rarogon e giyow ko kan nib fel’ rogon ni bod rogon Jehovah Got nge Jesus Kristus. Ur ayuwegew e girdi’ kakrom ni ngar nanged rarogon e giyow ko kan u nap’an ni ur pilyegew e changar rok boch e girdi’ ni yad ba yul’yul’.
Bin migid e article e be weliy boch e thin nu Bible ni murung’agen boch ban’en ni i guy boch e girdi’ ni un pilyeg e changar rorad kakrom. Nap’an ni ga ra beeg murung’agen e pi n’ey, ma dab mu pagtalin ni giyow ko kan e bangi ban’en ndabiyog ni ngad guyed nga owchedad ara da mathgad ngay. Ere, aram fan ni ke guy Got rogon ni nge pilyeg e changar rok e pi girdi’ nem ni ngar guyed boch ban’en nrayog ni ngad nanged fan ko bin ni nge weliy e pi n’em u reb e kanawo’ ndabiyog ni nge nang e girdi’ fan. Pi n’em ni un pilyeg e changar rok boch e girdi’ ngaur guyed e ra ayuwegem ni ngam nang rarogon e piin ni yad ma par ko giyow ko kan ni aram bangi ban’en ni be yog e Bible ni “pire’ e singgil” ni bay riy.
