Nge M’agan’um Ngay ni Ngam N’ag Fan e Kireb ni Ke Rin’ Be’ Ngom
Nge M’agan’um Ngay ni Ngam N’ag Fan e Kireb ni Ke Rin’ Be’ Ngom
“Nge bigimed mi i ayuweg bigimed ko meewar rok u fithik’ e runguy, mu um n’iged fan u wun’med e n’en ni manga ke kirebnag bigimed u laniyan’ bigimed.”—KOL. 3:13.
UW ROGON NI GA RA FULWEG?
Mang fan ni nge m’agan’dad ngay ni ngad n’aged fan e kireb?
Uw rogon ni fanay Jesus e fanathin ni nge dag nib t’uf ni nge m’agan’uy ngay ni ngan n’ag fan e kireb?
Mang tow’ath e ma yag ngak e piin ni yad ma n’ag fan e kireb nib m’agan’rad ngay?
1, 2. Mang fan nib puluw ni nge m’agan’um ngay ni ngam n’ag fan e kireb ni ke rin’ be’ ngom?
THIN rok Jehovah u Bible e ra ayuwegdad ni ngad nanged rogon e tafinay rok u murung’agen e denen nge n’en nra rin’ u nap’an ni kad denengad. Maku thin rok e be tamilangnag rogon ni ma n’ag fan e denen. U lan e pi article ni ke yan, ma kad weliyed ko mang fan ni ke n’ag Jehovah fan e kireb rok David nge Manasseh. Bochan ni ke kireban’row ko ngongol nib kireb ni kar rin’ew, ma aram fan ni kar ningew e ayuw ngak Jehovah ni nge n’ag fan e kireb rorow. Da kur sulow ngar rin’ew e kireb, ya riyul’ ni kar kalgowngan’row ko denen rorow. Me munmun, me fel’ e tha’ u thilrad Jehovah bayay.
2 Chiney e ngad weliyed rogon ni nge m’agan’dad ngay ni ngad n’aged fan e kireb ni ke rin’ be’ ngodad. Uw rogon e tafinay rom ni faanra li’ Manasseh reb e girdi’ rom? Gur, rayog ni ngam n’ag fan e kireb ni ke rin’? Rib fel’ e biney e deer, ya ngiyal’ ney e ke sug e re fayleng ney ko ngongol nib kireb, nge lem ni fel’ ngak. Ere, mang fan ni thingari t’uf rok reb e Kristiano ni nge athamgiliy ni nge n’ag fan e kireb rok yugu boch e girdi’? Faanra kan rin’ ban’en nib kireb ngom, ma mang e rayog ni ayuwegem ni ngam gagiyegnag e lem rom, mag rin’ e n’en ni baadag Jehovah ni ngam rin’, ni aram e nge m’agan’um ngay ni ngam n’ag fan e kireb?
FAN NIB T’UF NI NGAD N’AGED FAN E KIREB ROK BE’
3-5. (a) Mang fanathin e fanay Jesus ya nge yag ni ayuweg e piin ni yad be motoyil ngak ni ngar nanged nib t’uf ni ngan n’ag fan e kireb? (b) Mang e be tamilangnag Jesus ko fare fanathin rok ni bay ko Matthew 18:21-35?
3 Faanra nge gapas thildad girdien e tabinaw rodad, nge pi fager rodad, nge yugu boch e girdi’, nge Jehovah, mab ga’ fan ni nge m’agan’dad ngay ni ngad n’aged fan e kireb rorad, ni yugu demtrug ko yad e pi walagdad u lan e ulung fa danga’. Be tamilangnag e thin nu Bible ni yugu demtrug urngin yay ni ke rin’ be’ e kireb ngodad, ma susun ni nge m’agan’uy ngay ni ngan n’ag fan e kireb rok, ya aram e n’en ni thingari rin’ e tin riyul’ e Kristiano. I fanay Jesus reb e fanathin u murung’agen reb e tapigpig ni immoy e malfith rorow e masta rok ni nge tamilangnag fan e re n’ey.
4 Fare tapigpig e ba t’uf ni nge maruwel ni sogonap’an 60 milyon e rran mfini yag ni nge sulweg e malfith rorow e masta rok, machane me n’ag fare masta rok fan u wan’ me yog ngak ni dakuriy fan ni nge sulweg fare malfith rorow. Me tomur riy ma yan fare tapigpig ngar mada’gow yugu reb e tapigpig ni ku bay e malfith rorow ni faanra maruwel fare tapigpig u lan 100 e rran ma rayog ni nge thang e re malfith nem. Fare tapigpig e wenig ngak ngki pi’ boch e tayim ngak me yag ni nge fulweg fare malfith rorow, machane, me yog fare tapigpig ni ngan kol faanem nga n’on nga kalbus. Re nem ni rin’ e ke k’aring e damumuw ngak fare masta rok. Me gaar fare masta ngak, “susun e ka ga ra runguy e re tapigpig ni gimew nem, ni bod rogon ni gu runguyem.” Ma “kari puwan’ e re masta nem, ma aram me pi’ fare tapigpig [nde m’agan’ ngay ni nge n’ag fan e kireb rok be’] ngan fek nga kalbus ni ngan gechignag nge yan i mada’ ko ngiyal’ nra math fare malfith rok riy ni urngin!”—Matt. 18:21-34.
5 Mang e tamilangnag Jesus u daken fare fanathin ni weliy? I tamilangnag ni gaar: “Ereram rogon e n’en nra rin’ e Chitamag nu tharmiy ngomed ni faanra dabi bigimed me n’ag fan u wan’ e n’en nib kireb ni ke rin’ reb i walagen ngak.” (Matt. 18:35) Ba tamilang e n’en ni weliy Jesus. Pi kireb ni gad ma ngongliy u nap’an e yafas rodad, e be micheg ndabiyog rodad ni ngad rin’ed gubin ban’en nrogon nib m’agan’ Jehovah ngay. Machane, ba m’agan’ ngay ni nge n’ag fan e kireb rodad ma dabki lemnag. Ere, be’ ni baadag ni nge fel’ e tha’ u thilrow Jehovah e ba ga’ fan ngki n’ag fan e kireb rok boch e girdi’. Ya aray rogon ni yog Jesus ko fare Welthin rok u Daken e Burey ni gaar: “Ya faanra mu n’iged fan u wun’med e kireb ni ke rin’ boch e girdi’ ngomed, ma ku er rogon e Chitamangimed nu tharmiy nra n’ag fan u wan’ e kireb ni kam rin’ed. Machane, faanra dab mu n’iged fan u wun’med e kireb ni ke rin’ boch e girdi’ ngomed, ma ku er rogon e Chitamangimed nu tharmiy ndabiyog ni nge n’ag fan u wan’ e kireb ni kam rin’ed.”—Matt. 6:14, 15.
6. Mang fan ni yu ngiyal’ ma de mom ni ngan n’ag fan e kireb ni ke rin’ be’ ngom?
6 Dabisiy nib fel’ u wan’um ni ngam n’ag fan e kireb rok be’, machane yu ngiyal’ mab mo’maw’ ni ngan rin’ e re n’ey. Ba ga’ ni faanra ke rin’ be’ nib t’uf rodad reb e kireb ngodad, ma rib gel e kireban’ riy. Rayog ni nge yib e damumuw ngom fa kireban’, ara reb e ga baadag ni ngam fulweg taban e kireb ni ke rin’ ni bochan nder yul’yul’ ngom. Maku bay e girdi’ ni yad ma lemnag ndabiyog ni ngar n’aged fan e kireb ni ke rin’ be’ ngorad. Faanra arrogon e lem rom, ma uw rogon ni ngam athamgil nge yag e lem ngom nib m’agan’ Jehovah ngay?
MU FAL’EG I LEMNAG ROGON E TAFINAY ROM
7, 8. Faanra ke rin’ be’ e kireb ngom, ma mang e ra ayuwegem ni ngam n’ag fan e kireb ni ke rin’?
7 Faanra der rin’ e girdi’ e ngongol nib fel’ ngodad, ara gad be lemnag ndanir rin’ e ngongol nib fel’ ngodad, ma rayog ni nge k’aring e damumuw ngodad. Mu lemnag e n’en i buch rok reb e pumoon u nap’an ni ke yib e damumuw ngak. Ya yog e re pumoon nem ni gaar: “Bay ba ngiyal’ ni kug damumuw nib gel, ma kug dugliy u wan’ug ni nggu chuw ma dab kug sul nga tabinaw. Rorran nem e reb a rran nib fel’ e yafang, ere kug wan u ba pa’ i kanawo’ nib fel’ yaan e gek’iy ni bay riy. Ma bochan nrib fel’ yaan e gin’em ma dariy lingan ban’en riy, me munmun ma ke ayuwegeg e re n’ey ni nge gapas lanin’ug. Tomuren in e awa ma kug sul nga tabinaw ni kug kalngan’ug ma ke munguy e tafinay rog.” Ere, ba tamilang e n’en ni buch rok e re pumoon ney, ni faan gad ra tay e tayim ni nge gapas lanin’dad, ma gad fal’eg i lemnag e n’en ni ke buch, ma rayog ni nge ayuwegdad ni nga dab da rin’ed ban’en nde puluw ni gad ra kalngan’ riy boch nga m’on.—Ps. 4:4; Prov. 14:29; Jas. 1:19, 20.
8 Ma mang e ga ra rin’ ni faanra ga be par ni dabi m’ay e kireban’ rom? Ba t’uf ni ngam fal’eg i gay ko mang fan ni be kireban’um. Gur, gathi bochan ni kan ngongliy reb e kireb ngom ara danir tayfam? Fa reb e ga be lemnag ni be gay faanem rogon ni nge rin’ ban’en nib kireb ngom? Riyul’ nib kireb e n’en ni ke rin’, fa? Thingar mu fal’eg i lemnag, ya ga ra nang fan mag fal’eg i gay ko uw rogon ni ngam ngongol nib puluw ko thin nu Bible. (Mu beeg e Proverbs 15:28; 17:27, BT.) Faan ga ra rin’ ni aram rogon, ma re n’ey e ra ayuwegem ni nge m’agan’um ngay ni ngam n’ag fan e kireb rok be’. Riyul’ nrib mo’maw’ e re n’ey. Machane, faan gad ra rin’ ni aray rogon ma aram e gad be pag e thin rok Got ni nge gagiyegnag ‘fithik’ i lanin’dad ko n’en ni gad be lemnag’ me pow’iydad ni ngad folwokgad rok u rogon ni ma n’ag fan e denen.—Heb. 4:12.
FEL’ NI NGAN DAMUWMUW, FA?
9, 10. (a) Mang e ga ra rin’ u nap’an ni ga be lemnag ni ke rin’ be’ reb e kireb ngom? (b) Uw rogon u wan’um ni faanra ga ra fil rogon ni nge dab mu damumuw nib pag rogon me m’agan’um ngay ni ngam n’ag fan e kireb ni ke rin’ be’ ngom?
9 Boor ban’en ni ma buch u lan e yafas rodad nrayog ni nge kirebnag e tafinay rodad. Ni bod u nap’an ni ga be yan u karrow rom ma ke chugur ni nge chafinnagem be’. Ere, mang e ga ra rin’? Kaam beeg murung’agen n’en i buch rok boch e girdi’ ni kar damumuwgad nib pag rogon mar lied e en ni be kol e yap’ u yugu reb e karrow. Ma bochan ni gur reb e Kristiano, ma susun ni dab mu rin’ ban’en ni aram rogon.
10 Ere, rib manigil ni ngam fal’eg i lemnag e n’en ni ke buch. Sana gur e ba kireb e rom, ya bochan ni damur tiyan’um ko yan u karrow. Ma sana ku bay e magawon ko karrow rok faanem. Ere, n’en ni be tamilangnag e re n’ey ngodad e rayog ni nge war e damumuw rodad, nge kireban’, nge ku boch e lem nib kireb ni ma yib ngodad, ni faan gad ra fal’eg i yaliy rogon e lem rodad ma nge m’agan’dad ngay ni ngad n’aged fan e kireb. Rogon ni be yog e Eklesiastes 7:9, (BT) e gaar: “Mu kol ayuw ko damumuw rom; de fel’ ni ngam chaariy e kireb u wun’um.” Ere, dab mu gur ni ngam damumuw. Ya yu ngiyal’ ma n’en ni kam lemnag ni ke rin’ be’ ngom ni lem rok e ke buch ni bochan ndawori flont ara damur nang fan. Mu gay rogon ni ngam fal’eg i lemnag boch ban’en u nap’an ni kan rin’ ara kan weliy boch ban’en ngom nib kireb, ma nge m’agan’um ngay ni ngam n’ag fan e kireb ni bochan e ba t’uf e girdi’ rom. Ra gel e felfelan’ rom ni faanra ke yag rom ni ngam rin’ ni aray rogon.—Mu beeg e 1 Peter 4:8.
‘MU FULWEGED MURUNG’AGEN E GAPAS NI KA MOGNED’
11. Susun uw rogon lanin’dad ni faanra ra motoyil ara dabi motoyil e girdi’ ngodad u nap’an ni gad be machib?
11 Uw rogon me yag ni ngam k’adan’um u nap’an nra togopuluw be’ ngom u nap’an ni ga be machib? Nap’an ni l’og Jesus 70 i gachalpen ni ngar machibgad, me yog ngorad ni nap’an ni yad ra yan nga reb e tabinaw ma nga rogned e gapas ko re tabinaw nem. Ya yog ni gaar: “Ya faanra bay be’ riy nib t’uf e gapas rok, mi gimed pag e gapas ni ka mogned nge par u daken; ma faanra dangay, mi gimed fulweg murung’agen e gapas ni ka mogned.” (Luke 10:1, 5, 6) Gad ma felfelan’ u nap’an ra adag e girdi’ ni ngad machibnaged yad ya rayog ni nge yib angin e machib ni gad be tay. Yu ngiyal’ ma yad ma togopluw ngodad. Ere, mang e gad ra rin’? I yog Jesus ni gapas ni kad feked i yan ko re tabinaw nem e ra par rodad. Ere, demtrug rogon ma nap’an ni gad ra chuw u reb e tabinaw ma thingari par e gapas u lanin’dad. Faan gad ra damumuw ni bochan e kan togopuluw ngodad ma dabiyog ni nge par e gapas rodad.
12. Uw rogon ni ngad ngongolgad nrogon ni yog Paul ko Efesus 4:31, 32?
12 Mu athamgil ni nge gapas lanin’um ni gubin ngiyal’ ma gathi kemus u nap’an e machib. Ra nge m’agan’um ngay ni ngam n’ag fan e kireb rok be’, ma gathi be yip’ fan ni kam adag e ngongol nib kireb fa ke fel’ u wan’um wenegan e kireb ni ke rin’. Faanra nge yag ni nge par e gapas u lanin’dad, ma re n’ey e be yip’ fan ni dab da pared ma gad be lemnag e pi kireb ney. Faanra gad ra pag e kireb ni nge par u lanin’dad ni gubin ngiyal’, ma ra k’aringdad ni nge dab da felfelan’gad. Ere, dab mu pag e lem ni aray rogon ni nge gagiyegnigem. Dab mu pag talin ndabiyog e felfelan’ ngom ni faan ga ra lemnag e kireb ni kan rin’ ngom. Ere, nge m’agan’um ngay ni ngam n’ag fan e kireb rok be’!—Mu beeg e Efesus 4:31, 32.
MU NGONGOL U ROGON NI NGAM FELFELAN’NAG JEHOVAH
13. (a) Uw rogon me yag rok reb e Kristiano ni nge “ulunguy e kol ni be yik’ nga daken lolugen” en ni be togopuluw ngak? (b) Mang e rayog ni nge buch ni faan gad ra ngongol u fithik’ e sumunguy u nap’an nra togopuluw be’ ngodad?
13 Dabisiy ma bay ba ngiyal’ ni ga ra lemnag nrayog rom ni ngam ayuweg be’ ni ke oloboch ni nge fel’ u wan’ e pi kenggin e machib ni ma fol e piin Kristiano riy. I yog apostal Paul ni gaar: “‘Faanra yim’ e toogor rom ko bilig, ma ga pi’ e ggan ngak; ma faanra yim’ ko belel, ma ga pi’ e garbod ngak; ya faanra um rin’ed ni aray rogon ma susun e fin gimed be ulunguy e kol ni be yik’ nga daken lolugen, ni aram e be yik’ ko tamra’. Dab mu digey e kireb nge gel ngom; machane ngam ngongliy e ngongol nib fel’ ngam gel ngak e kireb.” (Rom. 12:20, 21) Ere, bochan ni ga be athamgil ni ngam dag e ngongol nib fel’ ngak be’ ni be togopuluw ngom, ma re n’ey e rayog ni nge munguynag laniyan’ facha’ me m’ug fel’ngin. Nap’an ni ga ra dag e runguy ma ga be athamgil ni ngam nang fan laniyan’ e en ni be togopuluw ngom, ma dabisiy nrayog ni ngam ayuweg ni nge fil murung’agen e tin riyul’ u Bible. Ere, yugu demtrug rogon ma faan ga ra ngongol u fithik’ e sumunguy ngak be’, ma aram e ga be ayuweg faanem ni nge fal’eg i lemnag pangim nib fel’.—1 Pet. 2:12; 3:16.
14. Demtrug ko uw feni rib gel e kireb ni ke rin’ be’ ngom, ma mang ndab mu pag e re n’ey nge aw nga lanin’um?
14 Bay e piin ni susun ndab da chaggad ngorad. Ni aram e piin ni kan tharbograd. Kan tharbograd ko ulung ni bochan kar rin’ed reb e denen nib ubchiya’ ma dar kalgadngan’rad. Faanra ke kireb lanin’um ni bochan e kireb ni ke rin’ be’, ma mutrug nra mo’maw’ ngom ni ngam n’ag fan, ni yugu aram rogon ni ke kalngan’ ko kireb ni ke rin’. Ireray e ngiyal’ nib t’uf ni ngam ning e ayuw rok Jehovah ni nge yag ni nge m’agan’um ngay ni ngam n’ag fan e kireb ni ke rin’ faen ni ke kalngan’. Ya da manang ko mang e bay u lan gum’irchaen. Kemus ni Jehovah e manang. Ir e ma skengnag lanin’dad ma be gum’an’nag ir u puluwon e piin ni kar olobochgad. (Ps. 7:9; Prov. 17:3) Ere, aram fan ni be yog e thin nu Bible ni gaar: “Faanra rin’ be’ ban’en nib kireb ngomed, ma dab mu sulweged taban ngak nib kireb. Mu guyed rogon ngam rin’ed e tin ni ma finey urngin e girdi’ ni ir e ba fel’. Mu rin’ed urngin e tin nrayog romed ngam pired ni ba aw e gapas u thilmed nge urngin e girdi’. Pi tafager rog, dab mu fulweged ngak be’ taban e kireb ni rin’ ngomed, machane ngam paged fan ko damumuw rok Got nge mang ir e rin’. Ya be yog e babyor nib thothup ni be gaar, “Be gaar Somol, ke mil fan ngog, ni gag e bay gu fulweg taban e kireb.’” (Rom. 12:17-19) Ba mil fan ngom ni ngam turguy e kireb nga daken be’, fa? Danga’. (Matt. 7:1, 2) Machane, rayog ni nge pagan’um ngay ni bay yal’uweg Got e pi kireb ney.
15. Mang e rayog ni nge ayuwegdad ni nge dab da damumuwgad nib gel ngak be’ ni ke rin’ e kireb ngodad?
15 Faanra ba mo’maw’ ni ngam n’ag fan e kireb ni ke rin’ be’ ngom, mab fel’ ni ngam lemnag ni faen ni ke ngongliy e kireb ngom e kub mo’maw’ rok ni nge yog ngom ni ngam n’ag fan fare kireb ni ke rin’. Ku arrogon ir ndawori flont. (Roma. 3:23) Ma runguy Jehovah gubin e girdi’ ya yad e ta denen. Ere, ba puluw ni ngan yibilay e piin ni kar ngongliyed e kireb. Dabiyog ni ngam par ni gab damumuw ngak be’ ni ga be pi’ e meybil ni fan ngak. Ma kub tamilang ko thin rok Jesus ni thingar dab da pared ma gad be lemnag e kireb ni ke rin’ be’ ngodad, ya be gaar: “Nge t’uf romed e pi toogor romed, mpied e meybil rok e piin ni yad be ngongliy e kireb ngomed.”—Matt. 5:44.
16, 17. Mang e thingari mu rin’ u nap’an ni ke dugliy e piin piilal ni faanem ni ke rin’ e kireb ngom e ke kalngan’? Ma mang fan?
16 Piin piilal e ba milfan ngorad ni ngar yal’uweged e girdi’ u lan e ulung ni kar ngongliyed reb e oloboch nib ubchiya’, nrogon nib m’agan’ Jehovah ngay. Ma dabiyog ni ngar nanged gubin ban’en ni bod rogon ni manang Jehovah, machane yad ma athamgil ni ngar dugliyed boch ban’en nrogon nib puluw ko thin nu Bible u daken e ayuw rok gelngin Got nib thothup. Ere, nap’an ni yad ra dugliy e n’en ni ngan rin’ u daken e meybil, ma rayog ni nge pagan’dad ngay nib puluw ko lem rok Jehovah.—Matt. 18:18.
17 Ireray e ngiyal’ nib t’uf e yul’yul’. Ba ga’ fan ni nge pagan’dad nga rogon nra yal’uweg Jehovah reb e magawon, ma nge fel’ u wan’dad e n’en nra dugliy e piin piilal. (2 Kor. 2:5-8) Dabisiy nde mom e re n’ey, nib ga’ ni faanra gur e en ni kan rin’ e kireb ngom. Machane, ra pagan’um ngak Jehovah nge rogon nra yal’uweg reb e magawon u lan e ulung, ma dabisiy ni ga ra ngongol u fithik’ e gonop. Ra m’ug nriyul’ ni ga be athamgil ni nge m’agan’um ngay ni ngam n’ag fan e kireb.—Prov. 3:5, 6.
18. Mang angin nra yib ngom ni bochan nib m’agan’um ngay ni ngam n’ag fan e kireb?
18 Rayog ni nge fel’ rogodad ni faanra ba m’agan’dad ngay ni ngad n’aged fan e kireb. Re n’ey e ra ayuwegdad ni ngad felfelan’gad, ya ke yag ni ngad paged e lem ni damumuw nge kireban’. Maku ra ayuwegdad ni nge fel’ e tha’ u thildad yugu boch e girdi’. Machane, faanra dubdad ni ngad n’aged fan e kireb ma rayog ni nge k’aring e m’ar ngodad, ma ra kirebnag e tha’ u thilin e girdi’, nge magafan’uy, ma ra kireb e numon. Ma ra mo’maw’ ni nge fel’ e tha’ u thildad e girdi’. Ma n’en ni th’abi ga’ fan ni faanra gad ra n’ag fan e kireb rok be’, e ra fel’ e tha’ u thildad e Chitamangidad nu tharmiy ni Jehovah.—Mu beeg e Kolose 3:12-14.
[Study Questions]
[Sasing ko page 29]
Mang e be tamilangnag e re fanathin ney ni fanay Jesus?
[Sasing ko page 32]
Nge m’agan’uy ngay ni ngan n’ag fan e kireb e ban’en ni thingari rin’ e tin riyul’ e Kristiano
