1. Mang fan ni bay rogon ni ngaud pininged e magar ngak Jehovah?

 BAY rogon ni ngaud pininged e magar ngak Jehovah ni ir e En ni Ke Pi’ “urngin e tow’ath nrib manigil” ngodad. (Jas. 1:17) Ma pi’ Jehovah urngin ban’en nib t’uf rodad ni bod rogon Be’ ni Ma Gafaliy e Saf nri ma t’ufeg e pi saf rok. (Ps. 23:1-3) Ir e “manaf rodad me ir gelngidad” ko ngiyal’ ni kad gafgowgad. (Ps. 46:1) Ere, riyul’ ni boor fan ni nge m’agan’dad ko fapi thin ni yoloy e en ni yoloy e psalm ni gaar: “Ngan pining e magar ngak Somol, ni bochan e ba manigil; t’ufeg rok e ba manemus.”​—Ps. 106:1, BT.

2, 3. (a) Mang fan nde fel’ ni ngad darifannaged e pi tow’ath ni ke yag ngodad? (b) Mang boch e deer ni gad ra weliy e fulweg riy ko re article ney?

² Mang nib ga’ fan ni ngaud pininged e magar u gubin ban’en? Kan yiiynag u Bible ni ngiyal’ ney ko tin tomuren e rran e bay dabki pining e girdi’ e magar u lanin’rad. (2 Tim. 3:2) Yooren e girdi’ e dariy fan u wan’rad e pi n’en nib fel’ ni ke rin’ Jehovah ni fan ngorad. Gad be par u ba fayleng ni yooren e girdi’ riy e ba ga’ ni yad be guy rogon ni nge yoor ban’en rorad ma dakir fel’ u wan’rad e tin ni bay rorad. Mus ngodad nrayog ni ngki af e mit ney e lem ngodad. Rayog ni nge dab ku ud pininged e magar u ban’en ma dabki ga’ fan u wan’dad e tha’ u thildad  Jehovah nge pi tow’ath ni ke pi’ ngodad ni bod e n’en ni buch rok piyu Israel kakrom.​—Ps. 106:7, 11-13.

³ A kum lemnag e n’en nrayog ni nge buch rodad u nap’an ni gad ra mada’nag boch e skeng nib mo’maw’. Nap’an ni gad ra mada’nag e pi skeng ney, mab mom nrayog ni nge mulan’dad ma dab kud lemnaged e pi tow’ath ni ke yag ngodad. (Ps. 116:3) Ere, uw rogon ni ngaud pininged e magar ni gubin ngiyal’? Ma mang e ra ayuwegdad ni ngaud pared nib puluw e lem rodad ni ki mada’ ko ngiyal’ ni kad mada’naged e skeng nib mo’maw’? Ngad weliyed boch e kanawo’.

4. Uw rogon ni ngaud pininged e magar ngak Jehovah ni gubin ngiyal’?

⁴ Faanra ngaud pininged e magar ngak Jehovah ni gubin ngiyal’, ma thingar da lemnaged boch e kanawo’ ni ke tow’athnagdad riy, ma gad fal’eg i lemnag rogon ni ke m’ug gelngin e t’ufeg rok ngodad u daken e pi tow’ath ney. Ireray e n’en ni rin’ e en ni yoloy e psalm. Ma aram fan nri ngat nga urngin ban’en nrib manigil ni ke rin’ Jehovah ni fan ngak.​—Mu beeg e Psalm 40:5; 107:43.

5. Mang e gad ra fil rok apostal Paul u rogon ni i pining e magar?

⁵ Boor ban’en ni gad ra fil rok apostal Paul u rogon ni ngaud pininged e magar. Ba tamilang ni ma fal’eg i lemnag e pi tow’ath ni ke yag ngak, ya gubin ngiyal’ ni i pining e magar riy ngak Got. Manang Paul nib ‘kireb e thin ni i yog nib togopluw ngak’ Kristus ma i gafgownag pi gachalpen. Aram fan ni i pining e magar ngak Jehovah, ya yugu aram rogon feni kireb e n’en ni i rin’ ma kar dagew Kristus e runguy ngak ma kan pi’ e maruwel ngak ni nge rin’ ni aram e nge machib. (Mu beeg e 1 Timothy 1:12-14.) Ki felfelan’ Paul ko pi n’en ni i rin’ e pi walag u lan e ulung ni fan ngak ma i pining e magar ngak Jehovah ni gubin ngiyal’ ko ngongol nib fel’ ni i dag e pi walag ngak nge rogon farad yul’yul’ ko pigpig ni ur ted ngak Got. (Fil. 1:3-5, 7; 1 Thess. 1:2, 3) Ma nap’an ni yib e skeng ngak Paul, ma i pining e magar ngak Jehovah ko ayuw ni i pi’ e pi walag ngak u lan e ulung. (Acts 28:15; 2 Kor. 7:5-7) Ere, aram fan ni pi’ e athamgil nga laniyan’ e piin Kristiano ni gaar: “Um pininged e magar ngak Got u lanin’med . . . Umon’ed e tang ni thin rok Got ni bay ko Psalm, nge tang ni machib, nge tang ni murung’agen Got.”​—Kol. 3:15-17.

6. Mang reb e ban’en nri ga baadag ni ngam pining e magar riy ngak Jehovah?

⁶ Uw rogon ni ngad folwokgad rok Paul u rogon ni ngad mon’oggad u rogon ni gad ma pining e magar ngak Got? Ba t’uf ni ngad fal’eged i lemnag e pi n’en ni ke rin’ Jehovah ni fan ngodad ni bod Paul. (Ps. 116:12) Faanra fithem be’ ni gaar, ‘Mang e pi tow’ath ni ke pi’ Jehovah ngom ni ga baadag ni ngam pining e magar riy ngak?,’ ma mang e ga ra yog? Gur, ga ra weliy ngak murung’agen e tha’ u thilmew Jehovah? Ara rogon ni ke n’ag fan e denen rom ni bochan e ke mich fare maligach rok Kristus u wan’um? Ga ra yog fithingan boch e walag ni kar ayuweged gur u nap’an ni kam mada’nag boch e magawon nib mo’maw’, fa? Riyul’ ni sana ka ga ra pining e magar ko en mabgol rom, nge pi fakam, nge ku boch e girdi’. Machane, faanra um fal’eg i lemnag e pi tow’ath ni ma pi’ Jehovah ngom ni gubin e rran ni ir e Chitamangidad ni bay u tharmiy, ma dabisiy ni ga ra adag ni ngaum pining e magar ngak ni gubin e rran.​—Mu beeg e Psalm 92:1, 2. 

7. (a) Mang fan ni ngaud meybilgad ni ngaud pininged e magar ngak Got? (b) Faanra um pining e magar ngak Got u daken e meybil, ma mang angin nra yib ngom?

⁷ Faanra ud fal’eged i lemnag e pi n’en ni ma tow’athnagdad Jehovah riy, ma aram e gad ra adag ni ngad pininged e magar ngak u daken e meybil. (Ps. 95:2; 100:4, 5) Boor e girdi’ e fin ra t’uf ban’en rorad mfin aram e ngiyal’ ni yad ma meybil ngak Got. Machane, gad manang ni ma felfelan’ Jehovah ni faanra ud pininged e magar ngak ko pi n’en ni ke pi’ ni fan ngodad. Gad ra beeg e Bible ma  boor e girdi’ ni be weliy murung’agrad kakrom ni bod rogon Hannah nge Hezekiah ni ur meybilgow ngak Got ni yow be og e magar ngak. (1 Sam. 2:1-10; Isa. 38:9-20) Ere, mu folwok ko pi tapigpig rok Got nem ni yad ba yul’yul’ ni ur pininged e magar u gubin ban’en, mu um pining e magar ngak Jehovah ko pi tow’ath ni ke pi’ ni fan ngom. (1 Thess. 5:17, 18) Faan ga ra rin’ ni aray rogon, ma boor angin nra yib ngom, ya ga ra felfelan’, ma ra gel feni t’uf Jehovah rom, me gel e chugur ko tha’ u thilmew.​—Jas. 4:8.

8. Mang e rayog ni nge k’aringdad ni nge dab ku ud pininged e magar ko pi n’en ni ke rin’ Jehovah ni fan ngodad?

⁸ Faanra dab da kol ayuwgad ma rayog ni nge dab ku ud pininged e magar ngak Jehovah ko pi n’en nib fel’ ni ma rin’ ni fan ngodad. Mang fan? Ya bochan ndawor da flontgad, ma ke af rarogon Adam nge Efa ngodad nda ur piningew e magar ko pi n’en nib fel’ ni immoy rorow. I tayrow Got nga lan bangi milay’ nrib fel’ yaan. Gubin ban’en ni pi’ ngorow, miki pi’ e athap ko yafas ndariy n’umngin nap’an ngorow. (Gen. 1:28) Machane, de ga’ fan e tow’ath rorow u wan’row, ya ku yow baadag ni ngki yoor boch ban’en rorow. Ma wenegan ni yib riy e mul urngin ban’en u pa’row. (Gen. 3:6, 7, 17-19) Bochan ni gad be par u ba fayleng ni girdi’ riy e dakurur pininged e magar u lanin’rad, mab mom nrayog ni nge dab ku ud lemnaged e pi n’en ni ke rin’ Jehovah ni fan ngodad. Rayog ni nge dab ki ga’ fan u wan’dad e tha’ u thildad Got. Ku rayog ni ngki m’ay fan u wan’dad e tow’ath ni bay rodad ni aram e gad bang ko fare ulung i walag ni yad bay u ga’ngin yang e fayleng. Ba mom nrayog ni ngad paged e pi n’en ni bay ko re fayleng ney ni nge magawonnagdad. (1 John 2:15-17) Machane, faanra ngad siyeged e re wup ney, mab t’uf ni ngaud fal’eged i lemnag e pi n’en ni ma pi’ Jehovah ni fan ngodad u reb e rran ngu reb, ma gad pining e magar ngak ni bochan e gad boch e tapigpig rok.​—Mu beeg e Psalm 27:4.

9. Mang fan nsusun e ngad fal’eged i lemnag e pi tow’ath ni ma pi’ Got ngodad u nap’an ni kad mada’naged boch e skeng nib mo’maw’?

⁹ Faanra ud pininged e magar u gubin ban’en ma rayog ni nge ayuwegdad ni ngad athamgilgad u fithik’ e pi skeng nib mo’maw’ ni gad ma mada’nag. Rayog ni nge mulan’dad u nap’an ni kad mada’naged boch e magawon nib tomgin, ni bod rogon ni faanra daki yul’yul’ e en mabgol rodad ngodad, ara ke yib ba mit e m’ar ngodad nib mo’maw’ ni nge chuw, ara kad gafgowgad ni bochan boch ban’en ni ma buch ni bod rogon e yoko’, ara durru’, ara ku boch ban’en. Nap’an nra buch boch ban’en ni aray rogon, ma rayog ni nge fel’ lanin’dad ma gad par ni gad ba gel ni faan gad ra fal’eg i lemnag e pi tow’ath ni ke pi’ Got ngodad. Am lemnag e pi n’en ni ke buch rok boch e walag.

10. Mang angin ni ke yib ngak Irina ni bochan e ma fal’eg i lemnag e pi tow’ath ni ma yag ngak?

 ¹⁰ Irina * e ir reb e regular pioneer ni ma par u Lel’uch u Meriken. Pumoon rok e ir reb e piilal u lan e ulung, machane de par nib yul’yul’, ma aram me chel nge n’ag leengin nge pi fak. Mang e ayuweg Irina ni nge ulul ko pigpig ni be tay ngak Jehovah u fithik’ e yul’yul’? I yog ni gaar: “Gu be pining e magar ngak Jehovah ko pi n’en ni ke rin’ ni fan ngog. Bochan ni gu ma fal’eg i lemnag e pi tow’ath ni ma yag ngog u reb e rran ngu reb, ma kug nang nri gub tow’ath ni ke yag ni nge fel’ e tha’ u thilmow e Chitamangidad ni bay u tharmiy ni ma t’ufegeg ma be ayuwegeg. Gu manang ndabi n’ageg.” Bochan ni ma guy Irina rogon ni nga i par nib felfelan’, ma aram e n’en ni ke ayuweg ni nge athamgil u fithik’ e pi magawon rok miki pi’ e athamgil nga laniyan’ boch e girdi’, ni yugu aram rogon ni boor e magawon nib ga’ ni ke mada’nag.

11. Mang e ayuweg Kyung-sook ni nge athamgil u fithik’ ba mit e m’ar ni yib ngak nib ubchiya’?

¹¹ Kyung-sook nreb e walag ni ma par u Asia e ba pag 20 e duw ni ur pigpiggow e pumoon rok ni yow l’agruw e pioneer. Boch nga tomuren min pirieg ni ke cancer e worrum rok, ma aram me yog e togta ngak ni ka dalip i yan ko nel’ e pul nra par me yim’. Yugu aram rogon ni bay boch e skeng ni i yib ngorow e pumoon rok kafram, ni boch e ba ga’ ma boch e ba achig, machane dawor ra mada’nagew reb e skeng ni aram rogon. I yog Kyung-sook ni gaar: “Rib gel e gafgow ni kug tay u fithik’ e biney e magawon. Ya ug lemnag ni ke mul urngin ban’en u paag, ma rib gel e marus ni ug tay.” Ere, mang e ayuweg Kyung-sook ni nge athamgil? I yog ni gaar: “Gubin e nep’ u m’on ni nggu mol, ma gu ma yan nga bangi ban’en u daken e chig ko naun romow ni yima yan ngay nggu meybil nib ga’ lamag ni gu be pining e magar ngak Got u lal ban’en ni ke rin’ ni fan ngog ko re rran nem. Re n’ey e ma warnag e magafan’ rog ma ma k’aringeg ni nggu weliy ngak Jehovah gelngin feni rib t’uf rog.” Uw rogon ni ke yib angin e re n’ey ngak Kyung-sook? I yog ni gaar: “Kug nang ni ma ayuwegdad Jehovah ni ngad pared ni gad ba mudugil u fithik’ e pi magawon ni ma yib ngodad ma ka boor e tow’ath ni ma yag ngodad ko pi magawon ni gad ma mada’nag.”

12. Uw rogon ni ke yag rok Jason ni nge athamgil u tomuren ni ke yim’ e ppin rok?

¹² Jason nreb e walag ni ma pigpig ko branch ofis u Africa e ke pag 30 e duw ni ke pigpig u polo’ e tayim rok. I yog ni gaar: “Medlip e duw ni ke yan me yim’ e ppin rog. Ma rib gel e kireban’ ni gu tay. Faanra ngaug par ngaug lemnag e gafgow ni i tay u nap’an e ngiyal’ ni baaram ni kari ubchiya’ e m’ar rok ni cancer, ma rayog ni nge mulan’ug.” Ere, mang e ke ayuweg Jason ni nge athamgil u fithik’ e biney e magawon? I yog ni gaar: “Immoy bayay ni ug lemnag ban’en ni ug rin’ew e ppin rog u taabang ni gu felfelan’gow ngay, ma aram mug pining e magar riy ngak Jehovah u daken e meybil. Tomuren ni gu mu’ ko meybil ma aram mug thamiy ni ke baud lanin’ug, ma nga tomuren ma aram mug tabab ni ngaug pining e magar ngak Jehovah ni gubin e rran ko pi n’en ni ug rin’ew e ppin rog u taabang ni ug felfelan’gow ngay ni ke par u lanin’ug. Bochan ni gu ma rin’ e re n’ey, ma ke yag ni nge thil rogon ni gu ma lemnag boch ban’en. Ka ma kireban’ug ni ke yim’ e ppin rog, machane, ke yag ni nggu athamgil ni bochan e gu ma pining e magar ngak Jehovah ni ke pi’ be’ nib manigil kug leay ni ma t’ufeg Got ma ke yag ni nggu pigpiggow ngak u taabang.”

13. Mang e ayuweg Sheryl ni nge athamgil u nap’an ni yim’ yooren e girdi’ u tabinaw rok?

¹³ Nap’an ni aw fare yoko’ ni ka nog e Super Typhoon Haiyan ngay nga boch e binaw ni bay u Manile’ u tungun e duw ni 2013, ma bay bochi pin u rom ni 13 e duw rok ni ka nog Sheryl ngak ni yan i par ndakuriy ban’en rok. I yog ni gaar: “Ke kireb e naun rog ma ki yim’ yooren e girdi’ u tabinaw rog.” I yim’ e chitamangin, nge chitiningin, nge reb e pagel, nge l’agruw e ppin ni walagen u tan e re yoko’ nem. Ere, mang e ke ayuweg Sheryl ni nge athamgil u fithik’ e binem e magawon nrib gel ni ke mada’nag? Gubin ngiyal’ ni ma pining e magar  ngak Jehovah ma ma fal’eg i lemnag e pi tow’ath ni ka bay rok e chiney. Ki yog ni gaar: “Kug guy gubin ban’en ni ke rin’ e pi walag ni ngar ayuweged e piin ni kar gafgowgad mar pied e athamgil nga laniyan’ e piin nib t’uf ni ngan pi’ e athamgil nga lanin’rad. Maku reb e gu manang ni ku be pi’ e pi walag u ga’ngin yang e fayleng e meybil ni fanag.” Miki gaar: “Ri gu be pining e magar ngak Jehovah ni bochan e ir e Got rog. Gubin ngiyal’ ni ma pi’ e tin nib t’uf rodad.” Arrogon, faanra ud lemnaged e pi tow’ath ni be yag ngodad, ma rayog ni nge ayuwegdad ni nge dabi pag rogon e kireban’ ni ngad ted u nap’an ni ke buch ban’en rodad nrib gel e kireb riy. Re n’ey e ku ra ayuwegdad ni ngad athamgilgad u fithik’ e pi magawon ni gad ma mada’nag.​—Efe. 5:20; mu beeg e Filippi 4:6, 7.

14. Mang boch ban’en ni gad be sonnag u fithik’ e felfelan’? (Mu guy e sasing ni bay u tabolngin e re article ney.)

¹⁴ Kab kakrom i yib ni gubin ngiyal’ ni ma pining e pi tapigpig rok Jehovah e magar ko pi tow’ath ni ma pi’ ngorad. Bod nu, tomuren ni ayuweg Jehovah piyu Israel u pa’ Farao nge pi salthaw rok u nap’an ni yad bay ko fare Red Sea, ma aram me yon’ piyu Israel reb e tang u fithik’ e felfelan’ ni yad be pining e sorok nge magar riy ngak. (Ex. 15:1-21) Ku reb e tow’ath nrib manigil ni bay rodad e ngiyal’ ney e aram e gad manang ndab ki n’uw nap’an ma gad ra chuw u fithik’ e amith nge gafgow. (Ps. 37:9-11; Isa. 25:8; 33:24) Am lemnag rogon lanin’dad u nap’an nra thang Got e pi toogor rok me fekdad nga lan e bin nib beech e fayleng rok ni tin nib mat’aw e bay riy mab gapas. Aram reb e rran nri ku gad ra pining e magar riy ngak Jehovah!​—Rev. 20:1-3; 21:3, 4. 

15. Mang e kam dugliy u wan’um ni ngam rin’ u nap’an e duw ni 2015?

¹⁵ Gad be sonnag e pi tow’ath nra pi’ Jehovah ngodad u nap’an e duw ni 2015. Riyul’ ni ka gad ra mada’nag boch e skeng. Machane, demtrug rogon ma gad manang ndabi pagdad Jehovah. (Deut. 31:8; Ps. 9:9, 10) Ra pi’ e tin nib t’uf rodad ya nge yag nda ululgad ko pigpig ni gad be tay ngak u fithik’ e yul’yul’. Ere, ngad dugliyed u wan’dad ni ngad lemgad ni bod Habakkuk ni profet ni faani gaar: “Mus nra yan i par ndariy wom’engin e gek’iy ni fig, ma dariy wom’engin e grapes; mus ni faanra de k’uf e gek’iy ni olive, ma de k’uf e grain; mus nra yim’ urngin e saf me par tafen e garbaw ndakuriy e garbaw riy; ma ku ra gu par nri gub felfelan’ ni bochan e Somol ni Got e ir e be ayuwegneg.” (Hab. 3:17, 18) Ere, ngad athamgilgad ni ngaud fal’eged i lemnag e pi tow’ath nra yag ngodad u nap’an e re duw ney ma gad fol ko fare thin nu Bible ni fan ko duw ni 2015 ni be gaar: “Ngan pining e magar ngak Somol, ni bochan e ba manigil.”​—Ps. 106:1, BT.