Rogon e Mahl u Wan’ Got u Nap’an e Tin Som’on e Tapigpig Rok
KENGGIN E RE KE BABYOR NEY | UW ROGON E MAHL U WAN’ GOT?
Rogon e Mahl u Wan’ Got u Nap’an e Tin Som’on e Tapigpig Rok
Un gafgownag e girdi’ e ngiyal’ nem. Ere, boor yay ni ur meybilgad ngak Got ni nge ayuwegrad, machane de ayuwegrad Got ni ka chingiyal’ nem. Pi girdi’ nem e aram piyu Israel ni yad e girdi’ rok Got. Ma piin ni be gafgownagrad e aram piyu Egypt. (Exodus 1:13, 14) Boor e duw ni i son piyu Israel ni nge ayuwegrad Got u pa’ piyu Egypt. Machane, ra munmun ma ra rin’ Got ban’en ni nge chuweg e girdi’ rok u fithik’ e gafgow. (Exodus 3:7-10) Be yog e Bible ni cham Got ngak piyu Egypt. I pag e gafgow nga daken yu Egypt, me li’ e Pilung rorad nge pi salthaw rok u lan fagi day ni Red Sea. (Psalm 136:15) I rin’ Jehovah Got boch ban’en ni fan ko girdi’ rok ni bod rogon be’ ni “girdien e mahl” nib falu’.—Exodus 15:3, 4.
Bochan ni mahl Got nib togopuluw ngak piyu Egypt ma be dag ni bay boch e mahl ni un tay nib m’agan’ ngay. Ku bay yu ngiyal’ ni i pag piyu Israel ni ngar mahlgad ngak boch e nam. Bod ni, yog ngorad ni ngar chamgad ngak piyu Kanaan nreb e nam nrib gel e kireb ko girdi’ riy. (Deuteronomy 9:5; 20:17, 18) Ki yog ngak David ni Pilung nu Israel ni nge cham ngak piyu Filistia. Ki yog ngak David e n’en ni nge rin’ ya nge yag ni gel ko re mahl nem.—2 Samuel 5:17-25.
Pi n’ey ni i buch ni bay murung’agen u Bible e be dag nnap’an nra guy Got ni bay ban’en ni be magawonnag piyu Israel ara yad be gafgow riy, me pagrad ni ngar mahlgad ko pi toogor rorad ya nge yag ni ayuweg e girdi’ rok nge bin riyul’ e liyor. Machane, bay dalip ban’en u rarogon e pi mahl nem ni un tay kakrom nib t’uf ni ngam tay fanam i yan riy.
1. GOT E IR E MA DUGLIY E PIIN NI YAD RA UN KO MAHL. Immoy bayay ni yog Got ngak piyu Israel ni gaar: “Gathi gimed e ngam chamgad u fithik’ e re mahl ney.” Mang fan? Ya bochan ni Got e ir e ra mahl ni pa’rad. (2 Kronicles 20:17, BT; 32:7, 8) Boor yay ni i rin’ e re n’ey, ni bod rogon ni kad weliyed u tabolngin e re article ney. Ku bay yu ngiyal’ ni i yog Got ngak piyu Israel ni ngar uned nga boch e mahl nib m’agan’ ngay, nib ga’ ni tin baaray e mahl ni ur ted ya nge yag nra ayuweged fare Nam ni Kan Micheg u pa’ e pi toogor rorad.—Deuteronomy 7:1, 2; Joshua 10:40.
2. GOT E IR E MA TURGUY E NGIYAL’ NI NGAN MAHL RIY. Pi tapigpig rok Got e yad ma gum’an’naged yad ngar sonnaged e ngiyal’ ni ke dugliy Got ni ngar chamgad ko pi nam nib liyegrad ni yad be k’aring e gafgow ngorad, maku yad be rin’ boch ban’en nib kireb. U m’on ko re ngiyal’ i n’em ma thingar dab ra uned ko mahl. Ya faan yad ra rin’, ma dabkiyog ni ngar pared ni yad ba fel’ u wan’ Got. Bin riyul’ riy e, be yog e Bible ni immoy yu ngiyal’ ni i cham piyu Israel nga boch e nam ndawori yog Got ngorad, ma aram mi i yib wenegan nib kireb ngorad. *
3. DABUN GOT NI NGE GUY E GIRDI’ NI KAR M’AD NI KUB MUUN NGAY E PIIN NI YAD BA KIREB. Jehovah Got e Ir Enggin e yafas maku Ir e Ke Sunmiy e girdi’. (Psalm 36:9) Ere, dabun ni nge guy e girdi’ ni kar m’ad. Machane, rib gel e kireban’ riy ni bochan e bay boch e girdi’ ni ur makathnaged ni ngar gafgownaged boch e girdi’ mu kur lied yad ngar m’ad. (Psalm 37:12, 14) Bochan e re n’ey ma aram fan ni i pag Got ni ngan cham ko pi girdi’ nem. Yugu aram rogon ni i pag piyu Israel ni ngar chamgad ko pi toogor rorad, machane i ‘runguyrad’ maku i dag ngorad ni ir reb e Got nib “gum’an’.” (Psalm 86:15, BT) Bod ni, yog ngak piyu Israel ni u m’on ni ngar chamgad nga reb e binaw, ma som’on e thingar ra paged fare binaw ni “ngar weniggad ni dab ni mahl ngorad” ni fan e nge yib e tayim ko girdi’ riy ni ngar thilyeged e ngongol rorad ya nge dab ni cham ngorad. (Deuteronomy 20:10-13, BT) Aram rogon ni ma dag Got nde ‘adag ni nge guy reb e tadenen ni nge yim’. [Ya] ka baadag ni nge guy ni ke tal ndakir denen nge par nib fos.’—Ezekiel 33:11, 14-16. *
Ere, pi n’en ni kad weliyed e kad filed riy ni i pag Got ni ngaun mahl kakrom u nap’an e tin som’on e tapigpig rok ni bochan e nge yag ni tal e gafgow ni un tay ko girdi’ nge ngongol nib kireb ni un rin’. Machane, Got e ir e i dugliy e ngiyal’ ni ngan mahl riy nge piin ni ngar mahlgad, ma gathi girdi’. Machane gur, pi mahl nem ni i tay Got ko pi toogor rok kakrom e un cham riy nib pag rogon ma yibe puog rachaen e girdi’ riy, fa? Danga’, ya be yog e Bible ni be fanenikan Got e cham. (Proverbs 6:16-19) Ere gur, nap’an ni tabab Jesus Kristus ni Fak Got ko machib u fayleng u nap’an e bin som’on e chibog, ma ke thil e lem rok Got u murung’agen e mahl, fa?
[Boch e thin nra tamilangnag murung’agen]
^ Immoy bayay ni yog Got ngak piyu Israel ndab ra chamgad ngak e pi Amalekite nge piyu Kanaan ma dar folgad riy. Bochan e re n’ey, ma aram mar wargad ko re cham nem. (Numbers 14:41-45) Boor e duw nga tomuren me un Josiah ni Pilung nga reb e cham ndawori yog Got ngak ni nge un ngay, ma aram me yim’ ni bochan e re n’em.—2 Kronicles 35:20-24.
^ Nap’an ni cham piyu Israel ngak piyu Kanaan ma dar paged e re nam nem ni ngar weniggad ndab ni mahl ngorad. Mang fan? Ya ni pi’ 400 e duw ngak piyu Kanaan ni ngar thilyeged e ngongol rorad. Ma nap’an ni taw ko ngiyal’ ni baaram ni yan piyu Israel ni ngar chamgad ko re nam nem ma kari pag rogon e kireb ko girdi’ riy. (Genesis 15:13-16) Ere, aram fan ni bay tapgin ni ngan li’rad ngar m’ad. Machane, bay boch e girdi’ ko re nam nem nra thilyeged e ngongol rorad ma aram e da kun li’rad ngar m’ad.—Joshua 6:25; 9:3-27.
[Blurb ko page 4]
Yugu aram rogon ni cham Got ngak piyu Kanaan, machane i ayuweg e yafas rok boch e girdi’ ni bod rogon Rahab nge chon e tabinaw rok
