I gaar Rosie, “Bayi n’en mu ug par ni be magafan’ug nga boch ban’en, me munmun mug lemnag fapi n’em nge pag rogon.” Mang boch e thin nu Bible ni ayuweg e cha’ney? Reb e thin nu Bible ni ayuweg e bay ko Matthew 6:34 ni be gaar: “Dabi magafan’med nga rogomed gabul; ya ba gaman e tin nra magafan’uy ngay ni ba’ riy. Dariy fan ni ngku ni puthuy boch e magafan’ ko magafan’ ni be fek e yu rran i yib.” Ke yog Rosie ni pi thin ney ni yog Jesus e ke yag ni nge ayuweg ni nge tal ndab ki magafan’ ko pi n’en nrayog ni nge buch ko bin migid e rran. Ki ulul ngay ni gaar, “Boor e magawon ni gu be mada’nag, ere faanra ngki magafan’ug nga boch ban’en ndawori buch fa reb e sana dabi buch, ma aram e kug be yon’ daken e magawon rog.”

Yasmine e ku ir be’ nib pag rogon e magafan’ ni ma tay ndaki nang rogon ni nge gagiyegnag. I yog ni gaar, “Bay in e rran u lan e wik ni yigoo meyor e gu ma tay, ma bay boch e nep’ ndabiyog ni nggu mol. Gu ra lemnag ma gowa gubin ngiyal’ ni gu be lemnag boch ban’en nde puluw.” Ere, mang thin nu Bible e yag ni nge ayuweg? I yog ni ke ayuweg fare thin ko 1 Peter 5:7 ni be gaar: “Mpaged fan urngin e magafan’ romed ngak [Got], ya be lemnag rogomed.” I gaar Yasmine: “Gubin ngiyal’ ni ug par ni gu be meybil ngak Jehovah, ma aram me munmun me fulweg taban e meybil rog. Gu thamiy ni gowa kan chuweg ban’en nib tomal u daken pog. Bay yu ngiyal’ ni kug ma lem ni aram rogon, machane chiney e kug nang rogon ni nggu gagiyegnag e lem rog.”

I yog reb e ppin ni ka nog Isabella ngak ni gaar: “Re n’ey ni ngaun tay ban’en nge chugur ngay mfin nrin’ e ban’en  ni bay rog ni bochan e aram rogon e chitamag. Bayi n’en mug tay boch ban’en nib ga’ fan ndab gu rin’ ni bochan e nggu toffan ara nggu yaliy e TV. Rib kireb e biney e ngongol ni yima mecham ngay ni bochan e ra yon’ daken e mochuch rok be’, miki k’aring ni nge dabi rin’ e maruwel rok nib fel’ rogon.” Fare kenggin e motochiyel ni bay ko 2 Timothy 2:15 e aram reb e ban’en ni ayuweg e cha’ney. Be gaar e re thin nem: “Mu athamgiliy u rogon nrayog rom nge par e maruwel rom nrib fel’ u mit Got, ni bod rogon be’ ni girdien e maruwel nder tamra’ ko maruwel rok.” I gaar Isabella, “Dabug ni nge tamra’ Jehovah ko maruwel ni gu ma rin’ ni bochan e gu ma tay ban’en nge chugur ngay mfin gu rin’.” Machane, chiney e ke yag ni nge thilyeg rogon ni ma rin’ boch ban’en.

Ki yog Kelsey ni gaar: “Bayi n’en ma bay ban’en nib t’uf ni nggu rin’, ma aram mug tay ngari chugur ngay mfin gu tabab i rin’. Ere, bayi n’en mu ug yor, ara dab gu mol, ara magafan’ug. De fel’ e re n’em ngog.” I yag ni nge ayuweg fare thin ni bay ko Proverbs 13:16 Kelsey. Be gaar e re thin ney: “Be’ nib gonop e gubin ngiyal’ ni ma tafinay mfini ngongol, machane be’ nib balyang e riyul’ ndariy ban’en ni manang.” I weliy rogon angin ni ke yib ngak u tomuren ni ke fal’eg i lemnag e re thin ney ni gaar: “Ba fel’ ni ngad lemnaged e n’en ni gad ra rin’ nge rogon ni ngad rin’ed e pi n’em u m’on riy. Chiney e bay ba ken e babyor ni gu ma tay u daken e tebel rog ni bay e schedule riy ni fan ko pi maruwel ni gu ra rin’ boch nga m’on, ma re n’ey e ma ayuwegeg ni nggu dugliy e ngiyal’ ni nggu rin’ reb nge reb e pi n’em riy, ma dab gu tay boch ban’en nge chugur ngay mfin gu rin’.”

I yog Kirsten ni gaar: “I chuw e pumoon rog me digeymad e bitir romow ni yad aningeg u gubin.” Ere mang kenggin e motochiyel u Bible e ke yag ni nge ayuweg? Be gaar e Proverbs 17:17 (BT): “Pi tafager e gubin ngiyal’ ni yad ma dag e t’ufeg rorad. Mang gam’engin e walag ni faanra dab ra puruy’naged e gafgow rorad?” Ki gay Kirsten e ayuw u lan e ulung. Ere mang angin ni ke yib ngak? I yog ni gaar: “Boor e kanawo’ ni ayuwegeg e pi fager rog riy. Boch i yad e ur chuw’iyed boch ban’en nib t’uf rog nge boch e floras, mar bad ra ted nga langan e mab rog. Dalip yay ni yib boch e walag ra ayuweged gag nge pi fakag ni nggu gachowriyed e chugum romad nga yugu reb e naun ni nggu warod gu pared ngay. Ma bagayad e ayuwegeg ni nggu pirieg e maruwel. Gubin ngiyal’ ni immoy e pi fager rog ni ngar ayuweged gag.”

Delphine ni kan weliy murung’agen ko fa binem e article e ku ma kireban’ ni bochan e yigoo ir. Nap’an ni lemnag urngin e magawon ni ke yib ngak, ma aram me yog ni gaar: “Nap’an ni gu ra yaliy yugu boch e girdi’ ma gowa ba fel’ rogon e par rorad, me gag e gu be par nda gur felfelan’ ma yigoo gag.” Reb e thin nu Bible ni ayuweg e aram fare thin ni bay ko Psalm 68:6 (BT). Be gaar e re thin nem: “Ma pi’ [Got] e tabinaw ko piin dakuriy be’ rorad.” I yog ni gaar: “Gu manang nre verse ney e gathi kemus ni be weliy murung’agen e tabinaw ni yima par riy. Ya ke tamilang u wan’ug nrayog ni nge pi’ Got bang ni nggu par riy nib pagan’ug, ma bay e girdi’ riy nib t’uf Jehovah rorad nrayog ni nggu pared nib fel’ thilmad. Machane gu manang ndabiyog ni nge chugur e tha’ u thilmad yugu boch e girdi’ ni faanra dab gguy rogon ni nge chugur thilmow Jehovah. Ere, fare thin ko Psalm 37:4 e ke ayuwegeg ko re magawon ney. Be gaar e re thin nem: ‘Ngar mu adag Somol me fel’ u wun’um, me pi’ ngom e tin ni ir e kari t’uf rom.’”

Tomur riy, ma aram me gaar: “Kug nang nib t’uf ni ngar gu chugurnageg ngak Jehovah. Ir e th’abi fel’ ni bay. Ngemu’ ma aram mu kug yoloy boch ban’en nga but’ nrayog ni nggu rin’ed yugu boch e girdi’ u taabang ni nggu felfelan’gad ngay ya nge yag ni yag boch e fager ngog nib t’uf Jehovah rorad. Gu fil rogon ni ngaug sap nga fel’ngin e girdi’ ma dab kug sap nga thibngirad.”

Riyul’ ni pi fager rodad ni yad ma pigpig ngak Got e dawor ra flontgad. Ka ma mada’nag e Pi Mich Rok Jehovah boch e magawon ni bod rogon e tin ni ka bay e girdi’. Machane, thin nu Bible e aram e n’en ni ma k’aring e girdi’ ni ngar ayuweged yugu boch e girdi’ u rogon nrayog rorad. Gad ba gonop ni faan gad ra guy rogon ni nge yag boch e fager ngodad ni aray rogon. Machane gur, rayog ni nge ayuwegdad e pi kenggin e motochiyel u Bible ni ngad athamgilgad u fithik’ boch e magawon ndabiyog ni ngad pithiged e ngiyal’ ney, ni bod rogon e m’ar nib gel nge be’ nib t’uf rodad ni ke yim’, fa?