Tó o bá fẹ́ mọ ẹnì kan, ó ṣeé ṣe kó jẹ́ pé ohun tí wàá kọ́kọ́ béèrè lọ́wọ́ rẹ̀ ni pé, “Kí ni orúkọ rẹ?” Tó o bá bi Ọlọ́run ní ìbéèrè yẹn, ìdáhùn wo lo rò pé ó máa fún ẹ?

“Èmi ni Jèhófà. Èyí ni orúkọ mi.”​—Aísáyà 42:8.

Orúkọ náà ṣe pàtàkì sí Ọlọ́run fúnra rẹ̀. Kò sí ẹnì kankan tó fún Ọlọ́run ní orúkọ yìí, òun ló fún ara rẹ̀. Jèhófà fúnra rẹ̀ sọ pé: “Èyí ni orúkọ mi fún àkókò tí ó lọ kánrin, èyí sì ni ìrántí mi láti ìran dé ìran.” (Ẹ́kísódù 3:15) Nínú Bíbélì, orúkọ Ọlọ́run ìyẹn Jèhófà fara hàn ju àwọn orúkọ oyè míì lọ, bí Olódùmarè, Baba, Olúwa, tàbí Ọlọ́run. Kódà ó tún fara hàn ju àwọn orúkọ míì lọ, bí Ábúráhámù, Mósè, Dáfídì, àti Jésù. Ìdí ni pé Jèhófà fẹ́ kí gbogbo èèyàn mọ orúkọ òun gangan. Bíbélì sọ pé: “Kí àwọn ènìyàn lè mọ̀ pé ìwọ, ẹni tí orúkọ rẹ̀ ń jẹ́ Jèhófà, Ìwọ nìkan ṣoṣo ni Ẹni Gíga Jù Lọ lórí gbogbo ilẹ̀ ayé.”​—Sáàmù 83:18.

Orúkọ náà ṣe pàtàkì sí Jésù. Nínú àdúrà àwòṣe tí àwọn èèyàn mọ̀ sí Àdúrà Olúwa, Jésù kọ́ àwọn ọmọlẹ́yìn rẹ̀ pé kí wọ́n máa bẹ Ọlọ́run pé: “Kí orúkọ rẹ di sísọ di mímọ́.” (Mátíù 6:9) Jésù fúnra rẹ̀ gbàdúrà pé: “Baba, ṣe orúkọ rẹ lógo.” (Jòhánù 12:28) Bí Jésù ṣe máa fi ògo fún orúkọ Ọlọ́run ló ṣe pàtàkì jù sí i, ìdí nìyẹn tó fi sọ nínú àdúrà rẹ̀ pé: “Mo ti sọ orúkọ rẹ di mímọ̀ fún wọn, ṣe ni èmi yóò sì sọ ọ́ di mímọ̀.”​—Jòhánù 17:26.

 Orúkọ náà ṣe pàtàkì sí àwọn tó mọ Ọlọ́run. Àwọn èèyàn tó jọ́sìn Ọlọ́run láyé àtijọ́ mọ̀ pé tí wọ́n bá fẹ́ rí ààbò àti ìgbàlà, ó ṣe pàtàkì pé kí wọ́n mọ orúkọ Ọlọ́run. “Orúkọ Jèhófà jẹ́ ilé gogoro tí ó lágbára. Olódodo sá wọ inú rẹ̀, a sì dáàbò bò ó.” (Òwe 18:10) “Ẹni tí ó bá ń ké pe orúkọ Jèhófà ni yóò yè bọ́.” (Jóẹ́lì 2:32) Bíbélì fi hàn pé orúkọ Ọlọ́run máa fi ìyàtọ̀ sáàárín àwọn tó ń jọ́sìn Ọlọ́run àti àwọn tí kò sìn ín. “Nítorí gbogbo àwọn ènìyàn, ní tiwọn, yóò máa rìn, olúkúlùkù ní orúkọ ọlọ́run tirẹ̀; ṣùgbọ́n àwa, ní tiwa, yóò máa rìn ní orúkọ Jèhófà Ọlọ́run wa fún àkókò tí ó lọ kánrin, àní títí láé.”​—Míkà 4:5; Ìṣe 15:14.

Ó jẹ́ ká dá Ọlọ́run tòótọ́ mọ̀. Ọ̀pọ̀ àwọn ọ̀mọ̀wé Bíbélì ló gbà pé orúkọ náà Jèhófà túmọ̀ sí “Alèwílèṣe.” Jèhófà fúnra rẹ̀ jẹ́ ká mọ ìtúmọ̀ orúkọ rẹ̀ nígbà tó ń sọ nípa ara rẹ̀ fún Mósè pé: “Èmi Yóò Jẹ́ Ohun Tí Èmi Yóò Jẹ́.” (Ẹ́kísódù 3:14) Torí náà, orúkọ yẹn ní ìtúmọ̀ tó jinlẹ̀ ju pé kéèyàn kàn pe Ọlọ́run ní Ẹlẹ́dàá ohun gbogbo. Orúkọ yẹn jẹ́ ká mọ̀ pé Ọlọ́run ní agbára láti ṣe ohunkóhun, ó sì lè lo ìṣẹ̀dá rẹ̀ èyíkéyìí láti ṣe ohunkóhun tó bá ní lọ́kàn. Àwọn orúkọ oyè kan ń tọ́ka sí ipò Ọlọ́run, àṣẹ tó ní tàbí agbára rẹ̀. Àmọ́ orúkọ rẹ̀ gangan ló sọ irú ẹni tó jẹ́ ní pàtó àti ohun tó lè ṣe.

Ó jẹ́ ká mọ̀ pé Ọlọ́run nífẹ̀ẹ́ wa. Ìtúmọ̀ orúkọ Ọlọ́run fi hàn pé ó nífẹ̀ẹ́ gbogbo nǹkan tí ó dá títí kan àwa èèyàn. Bí Ọlọ́run ṣe sọ orúkọ rẹ̀ fún wa jẹ́ kó dá wa lójú pé ó fẹ́ ká mọ òun. Kò retí pé ká béèrè lọ́wọ́ òun, fúnra rẹ̀ ló sọ ọ́ fún wa. Láìsí àní-àní, Ọlọ́run fẹ́ ká mọ̀ pé òun kì í ṣe àdììtú, àmọ́ òun jẹ́ ẹni tó wà lóòótọ́, a sì lè sún mọ́ òun.​—Sáàmù 73:28.

Tá a bá ń lo orúkọ Ọlọ́run, ńṣe là ń fi hàn pé a nífẹ̀ẹ́ rẹ̀. Àpẹẹrẹ kan rèé, ká sọ pé o pàdé ẹnì kan tó o fẹ́ bẹ̀rẹ̀ sí í bá ṣọ̀rẹ́, o wá sọ fún un pé orúkọ rẹ gangan lo fẹ́ kó máa pè ẹ́, àmọ́ gbogbo ìgbà tí ẹni náà bá ti rí ẹ, orúkọ míì ló máa ń pè ẹ́. Báwo ló ṣe máa rí lára ẹ? Ó ṣeé ṣe kó o máa rò ó pé ẹni náà kò ṣe tán láti di ọ̀rẹ́ rẹ. Bẹ́ẹ̀ náà ló rí pẹ̀lú Ọlọ́run. Jèhófà ti sọ orúkọ rẹ̀ fún ọmọ aráyé, ó sì gbà wá níyànjú pé ká máa lò ó. Tá a bá ń lo orúkọ náà, ńṣe là ń jẹ́ kí Jèhófà mọ̀ pé a fẹ́ sún mọ́ ọn. Kódà, Ọlọ́run máa ń fiyè sí àwọn tó ń ronú nípa orúkọ rẹ̀ tàbí àwọn tó ń pa orúkọ rẹ̀ mọ́ nínú ọkàn wọn!​—Málákì 3:16.

Tá a bá fẹ́ mọ Ọlọ́run, ìgbésẹ̀ àkọ́kọ́ ni pé ká mọ orúkọ rẹ̀. Àmọ́, a ò gbọ́dọ̀ jẹ́ kó parí síbẹ̀. Ó tún yẹ ká mọ irú ẹni tó jẹ́.