Le táan u kaʼansaj Jesús tu luʼumil Judeaoʼ tʼaanaj tiʼ tamanoʼob, junpʼéel baʼax u kʼaj óol le máaxoʼob uʼuyikoʼ. Baʼaleʼ le baʼax tu yaʼaloʼ chéen junpʼéel kettʼaan. Le judíoʼoboʼ kʼaʼajtiʼob le baʼaxoʼob u yaʼalmaj Davidaʼ: «Jéeobaeʼ ku kanáantken jeʼex u beetik juntúul j-kanan tamaneʼ. Mix baʼal ken u bineltten» (Salmo 23:1, 2, TNM). Tiʼ uláakʼ salmoeʼ, Davideʼ tu yaʼalaj tiʼ le israelitaʼoboʼ: «Koʼoneʼex xoltal tu táan Jéeoba, le Máax Beetmiloʼonoʼ. Tumen letiʼ k-Dios, u kaajaloʼon yéetel ku kanáantkoʼon jeʼex u kanáantaʼal tamanoʼobeʼ» (Salmo 95:6, 7, TNM). Jeʼex túun k-ilkoʼ, yáanal le Leyoʼ suuk u keʼetel le israelitaʼob yéetel tamanoʼoboʼ.

Le israelitaʼoboʼ ku keʼeteloʼob yéetel «tamanoʼob» yanoʼob ichil junpʼéel «corral», tumen tiaʼanoʼob kaʼach yáanal u Ley Moiseseʼ. Le Leyoʼ bey jeʼex u baʼpach junpʼéel corraleʼ, tumen tu kanáantoʼob tiʼ le baʼaxoʼob ku beetik u maasil kaajoʼob yanoʼob tu baʼpachoʼoboʼ. Baʼaleʼ yaan tiʼ le israelitaʼoboʼ beyoʼob jeʼex tamanoʼob beetaʼan loob tiʼobeʼ. Jesuseʼ tu yaʼalaj: «Jach tu jaajil kin waʼalikteʼex: Le máax maʼ tu yokol tu jool u corral le tamanoʼob, baʼaxeʼ ku naʼakal yaanal tuʼux utiaʼal u yookleʼ, juntúul j-ookol yéetel juntúul máax ku tokik baʼaloʼob tiʼ máak. Baʼaleʼ le máax ku yokol tu jool le corraloʼ letiʼe j-kanan tamanoʼ» (Juan 10:1, 2).

Le máakoʼoboʼ kʼaʼajtiʼob le máaxoʼob tsʼoʼok u yaʼalikoʼob letiʼob le Mesías wa Cristooʼ. Letiʼobeʼ beyoʼob j-ookoloʼobeʼ. Le máakoʼoboʼ maʼ unaj u binoʼob tu paach le máakoʼob beyaʼ. Baʼaxeʼ unaj u binoʼob tu paach le «j-kanan tamanoʼ».

Jesuseʼ tu yaʼalaj: «Tiʼ letiʼeʼ ku jeʼekʼabtaʼal le jool tumen le máax kanáantik le jooloʼ. Le tamanoʼob túunoʼ ku yuʼubikoʼob u juum u tʼaan. Le j-kanan tamanoʼ ku tʼankoʼob tu kʼaabaʼob yéetel ku jóoʼskoʼob teʼ corraloʼ. Le ken tsʼoʼokok u jóoʼsik u yalakʼ tamanoʼobeʼ ku bin táanil, le tamanoʼob túunoʼ ku binoʼob tu paach tumen u kʼaj óoloʼob bix u juum u tʼaan. Letiʼobeʼ maʼ kun binoʼob tu paach juntúul máax maʼ u kʼaj óoloʼobiʼ, baʼaxeʼ yaan u púutsʼloʼobtiʼ tumen maʼ u kʼaj óoloʼob bix u juum u tʼaan yaanal máakoʼobiʼ» (Juan 10:3-5).

Juan Bautistaeʼ bey jeʼex le máak jeʼekʼabt u jool le corraloʼ, tumen tu yaʼalaj tiʼ le israelitaʼob ku keʼeteloʼob yéetel tamanoʼob unaj u tsaypachtikoʼob Jesusoʼ. Yaan tamanoʼob tiʼ u luʼumil Galilea yéetel Judeaeʼ tsʼoʼok u kʼaj óoltikoʼob u tʼaan Jesús. ¿Tuʼux ken u bisoʼob ken u jóoʼsoʼob? ¿Baʼax utsil ken u taastiʼob ikil u tsaypachtikoʼob? Maʼ xaaneʼ yaan tiʼ le máaxoʼob uʼuyikoʼ tu tukloʼob lelaʼ, tumen «letiʼobeʼ maʼ tu naʼatoʼob le baʼaxoʼob táan kaʼach u yaʼalaʼaltiʼoboʼ» (Juan 10:6).

Jesuseʼ tu yaʼalaj: «Jach tu jaajil kin waʼalikteʼex: Teen le joonaj tuʼux ku yokol le tamanoʼoboʼ. Teen le u jaajil j-kanan tamanoʼ, tuláakal le máaxoʼob tsʼoʼok u taaloʼob táan u yaʼalikoʼob letiʼob le u jaajil j-kanan tamanoʼ, chéen j-ookoloʼob yéetel ku tokikoʼob baʼaloʼob tiʼ máak. Baʼaleʼ le tamanoʼoboʼ maʼ tu yuʼuboʼob u tʼaanoʼobiʼ. Teen le joonajoʼ; jeʼel máaxak ka okok teʼ joonajaʼ yaan u salvarkuba; yaan u yokol, yaan u jóokʼol yéetel yaan u kaxtik suʼuk utiaʼal u jaante» (Juan 10:7-9).

Jesuseʼ táan u tʼaan tiʼ junpʼéel baʼax túumben. Le máaxoʼob uʼuyikoʼ u yojloʼob maʼ letiʼ u jool u núuptʼaanil le Ley tsʼaʼantiʼoboʼ. Le oʼolal táan u yaʼalik tiʼ le máakoʼob beyoʼob tamanoʼob ka jóokʼkoʼob tuʼux yanoʼob utiaʼal u yookloʼob tuláakʼ corraloʼ. ¿Baʼax utsil jeʼel u kʼamkoʼobeʼ?

Jesuseʼ tu tsolaj baʼax meyajil ku beetik: «Teneʼ taalen utiaʼal ka yanakteʼex kuxtal yéetel utiaʼal ka yaʼabchajak u kʼiinil a kuxtaleʼex. Teen le jach maʼalob j-kanan tamanoʼ; le jach maʼalob j-kanan tamanoʼ ku kʼubik u kuxtal yoʼolal le tamanoʼoboʼ» (Juan 10:10, 11). Jesuseʼ tsʼokaʼaniliʼ u yáax  aʼalik tiʼ u disipuloʼob utiaʼal u líiʼsik u yóoloʼobeʼ: «Maʼ a chʼaʼikeʼex saajkil, chan múuchʼ tamaneʼex, tumen a Taataʼexeʼ tsʼoʼok u yaʼalik yaan u tsʼáaikteʼex le Reinooʼ» (Lucas 12:32). Le máaxoʼob yanoʼob ichil u ‹chan múuchʼ tamanoʼoboʼ› yaan u bisaʼaloʼob tumen Jesús tiʼ uláakʼ corral, beyoʼ yaan u yantal ‹kuxtal tiʼob yéetel yaan u yaʼabtal u kʼiinil u kuxtaloʼob›. Lelaʼ letiʼe baʼax ken u kʼam le máaxoʼob beyoʼob tamanoʼob kun máanoʼob tuláakʼ corraloʼ.

Ka tsʼoʼokeʼ Jesuseʼ tu yaʼalaj xan: «Yaan xan ten uláakʼ tamanoʼob minaʼanoʼob teʼ corralaʼ, yaan xan in taaskoʼob, yéetel yaan u yuʼubikoʼob in tʼaan; yaan u pʼáatloʼob junmúuchʼ yéetel leloʼobaʼ, yáanal u kʼab juntúuliliʼ j-kanan taman» (Juan 10:16). Le «uláakʼ tamanoʼob minaʼanoʼob teʼ corral» tu yaʼalaj Jesusoʼ maʼ letiʼe u ‹chan múuchʼ tamanoʼob› tsʼoʼok u yaʼalik kun tiaʼalintik le Reinooʼ. Le kaʼa jaats tamanoʼobaʼ maʼ junpʼéeliliʼ esperanza yaantiʼobiʼ. Baʼaleʼ tu kaʼajaatsiloʼob ku kʼamkoʼob u yutsil le baʼax ken u beet Jesusoʼ. Letiʼeʼ tu yaʼalaj: «Le oʼolal u yaabiltmen le Taataoʼ, tumen kin kʼubik in kuxtal» (Juan 10:17).

Yaʼab tiʼ le máakoʼob yanoʼoboʼ tu yaʼaloʼob: «Le máakaʼ okaʼan demonio tiʼ yéetel tsʼoʼok u chokotal u pool». Baʼaleʼ yanoʼobeʼ seguernaj u yuʼubikoʼob baʼax ku yaʼalik le maʼalob j-Kanan Tamanoʼ. Letiʼobeʼ tu yaʼaloʼob: «Juntúul máak okaʼan demonio tiʼeʼ maʼatech u tʼaan beyaʼ. Tsʼoʼoleʼ juntúul demonioeʼ maʼ tu páajtal u tsʼáaik u sáasilil u yich le chʼóopoʼoboʼ, ¿máasaʼ?» (Juan 10:20, 21). Letiʼobeʼ tʼaanajoʼob tiʼ le ka tu tsʼakaj Jesús le máak chʼóop desde ka síijeʼ.