Jesuseʼ tu tsikbaltaj u kettʼaanil le diez x-chʼúupalaloʼob yéetel le talentos tu puʼukil le Olivoʼoboʼ. ¿Baʼax uláakʼ tu yaʼalaj tiʼ u apostoloʼob utiaʼal u yilkoʼob way yaneʼ yéetel baʼax kun eʼesik taʼaytak u xuʼulsaʼal tiʼ le yóokʼol kaabaʼ? Letiʼeʼ tu yaʼalajtiʼob u kettʼaanil le tamanoʼob yéetel le chivoʼoboʼ.

Utiaʼal u káajbaleʼ Jesuseʼ tu yaʼalaj: «Ken nojbeʼenkúuntaʼak u Paal máak yéetel ken yanak yéetel tuláakal le angeloʼoboʼ, yaan u kutal tu kiʼichkelem trono» (Mateo 25:31). Letiʼeʼ yaʼab u téenel tu yeʼesaj táan u tʼaan tiʼ letiʼ teʼ kettʼaanaʼ. Tu chʼaʼchiʼitaj yaʼab u téenel le tʼaan «u Paal máak[oʼ]» (Mateo 8:20; 9:6; 20:18, 28).

¿Baʼax kʼiin ken úuchuk le baʼax ku yaʼalik le kettʼaanaʼ? «Ken nojbeʼenkúuntaʼak» Jesús yéetel «ken yanak yéetel tuláakal le angeloʼoboʼ» bey xan ken kulak «tu kiʼichkelem trono». Letiʼeʼ tsʼoʼok u yáax tʼaan tiʼ «u Paal máak táan u taal yóokʼol le múuyaloʼob yéetel páajtalil bey xan yéetel nojoch nojbeʼenil» yéetel u angeloʼoboʼ. ¿Baʼax kʼiin ken úuchuk lelaʼ? «Chéen pʼelak u tsʼoʼokol le muʼyajil teʼ kʼiinoʼob» ku taaloʼ (Mateo 24:29-31; Marcos 13:26, 27; Lucas 21:27). Bey túunoʼ yaan u béeytal le ken tsʼaʼabak nojbeʼenil tiʼ Jesús. ¿Baʼax túun ken u beet ken tsʼoʼokok?

Jesuseʼ ku yaʼalik: «Ken nojbeʼenkúuntaʼak u Paal máak[eʼ] [...], u máakiloʼob tuláakal kaajoʼobeʼ yaan u muchʼkíintaʼaloʼob tu táan, letiʼ túuneʼ yaan u jatsik le máakoʼob jeʼex u beetik le j-kanan taman ku jatsik le tamanoʼob tiʼ le chivoʼoboʼ. Yaan u tsʼáaik le tamanoʼob tu x-noʼojoʼ, baʼaleʼ le chivoʼoboʼ tu x-tsʼíik» (Mateo 25:31-33).

Jesús túuneʼ ku yaʼalik baʼax kun aʼalbil tiʼ le tamanoʼoboʼ: «Le Rey túunoʼ yaan u yaʼalik tiʼ le máaxoʼob yanoʼob tu x-noʼojoʼ: ‹Koʼoteneʼex, teʼex tsʼoʼok a kiʼikiʼtʼantaʼaleʼex tumen in Taata, tiaʼalinteʼex le Reino beetaʼab a tiaʼaleʼex desde ka káaj u síijil wíinik way yóokʼol kaabeʼ[›]» (Mateo  25:34). ¿Baʼaxten le tamanoʼoboʼ yaan u kʼaʼamloʼob tumen le Reyoʼ?

Le Reyoʼ ku yaʼalik: «Wiʼijchajeneʼ ka ta tsʼáajeʼex baʼal in jaante, ukʼajchajeneʼ ka ta tsʼáajeʼex jaʼ in wukʼe. Kex maʼ a kʼaj óoleneʼexeʼ ta kʼameneʼex maʼalob. Ka pʼáat minaʼan in nookʼeʼ ta tsʼáajeʼex in nookʼ, kʼojaʼanchajeneʼ ka ta kanáanteneʼex, kʼaʼalen carceleʼ ka taaleʼex a wileneʼex». Le ka kʼáataʼab tumen le tamanoʼob wa «le utsul máakoʼob», baʼax kʼiin ka tu beetoʼob lelaʼ, aʼalaʼabtiʼob: «Tuláakal le baʼaxoʼob ta beeteʼex tiʼ juntúul u maas chichnil in sukuʼunoʼobaʼ, tiʼ teen ta beeteʼex» (Mateo 25:35, 36, 40, 46). Letiʼobeʼ maʼ tu beetoʼob baʼaloʼob maʼalobtak tiʼ le máaxoʼob yanoʼob teʼ kaʼanoʼ, teʼeloʼ maʼatech u kʼojaʼantal mix máakiʼ mix tech u wiʼijtal le máaxoʼob yanoʼ. Baʼaxeʼ tu beetoʼob tiʼ u sukuʼunoʼob Cristo yanoʼob way Luʼumeʼ.

¿Baʼax kun aʼalbil tiʼ le chivoʼob yanoʼob tu x-tsʼíik le Reyoʼ? Jesuseʼ ku yaʼalik: «Tiʼ le máaxoʼob túun yanoʼob tu x-tsʼíikoʼ [le Reyoʼ] yaan u yaʼaliktiʼob: ‹Náachkuntabaʼex tiʼ teen, teʼex le tsʼoʼok u kʼáataʼal kʼaas ta wóokʼoleʼexoʼ, ka xiʼikeʼex teʼ kʼáakʼ maʼatech u tuʼupul beetaʼan utiaʼal le Kʼaasilbaʼal yéetel u angeloʼoboʼ. Tumen wiʼijchajeneʼ baʼaleʼ maʼ ta tsʼáajeʼex baʼal in jaantiʼ, ukʼajchajeneʼ baʼaleʼ maʼ ta tsʼáajeʼex jaʼ in wukʼiʼ. Yéetel tumen maʼ a kʼaj óoleneʼexeʼ maʼ ta kʼameneʼex maʼalobiʼ; pʼáat minaʼan in nookʼeʼ, baʼaleʼ teʼexeʼ maʼ ta tsʼáajeʼexten in nookʼiʼ; kʼojaʼanchajen yéetel kʼaʼalen carceleʼ, baʼaleʼ maʼ ta kanáanteneʼexiʼ›» (Mateo 25:41-43). Le chivoʼoboʼ yaan u castigartaʼaloʼob tumen maʼ tu yeʼesoʼob yaabilaj tiʼ u sukuʼunoʼob Cristo yanoʼob way Luʼum kex tu yiloʼob kʼaʼabéet u beetkoʼobeʼ.

Le apostoloʼoboʼ tu naʼatoʼob baʼax kun úuchul tiʼ le máaxoʼob kun juzgartbiloʼoboʼ. Jesuseʼ tu yaʼalaj: «[Le Reyoʼ] yaan u [yaʼalik]: ‹Tu jaajil kin waʼalikteʼex: Tuláakal le baʼaxoʼob maʼ ta beeteʼex tiʼ juntúul u maas chichnil in sukuʼunoʼobaʼ, maʼ ta beeteʼex tiʼ teniʼ›. Le máakoʼob túunaʼ yaan u xuʼulsaʼaltiʼob utiaʼal mantatsʼ, baʼaleʼ le utsul máakoʼoboʼ yaan u tsʼaʼabaltiʼob kuxtal minaʼan u xuul» (Mateo 25:45, 46).

Le baʼaxoʼob tu yaʼalaj Jesús tiʼ u apostoloʼoboʼ ku beetik u tuukul tuláakal le máaxoʼob tsaypachtikoʼ, ku yáantkoʼob u yiloʼob baʼax unaj u beetkoʼob.