U yantal junpʼéel meta tiʼ máakeʼ maʼ u kʼáat u yaʼal chéen u tsʼíiboltik wa baʼaxiʼ, baʼaxeʼ u kʼáat u yaʼal u yilik u béeykuntik. Utiaʼal leloʼ unaj u planeartik bix ken u beetil yéetel u tsʼáaik u yóoliʼ.

Yaan metaseʼ séeb jeʼel u béeykuntik máakeʼ, pero uláakʼoʼobeʼ jeʼel u biskoʼob yaʼab mesoʼob wa tak añoseʼ. Wa yaantech junpʼéel meta yaʼab tiempo ken u bistech a chukpachtikeʼ maʼalob ka a tsʼáa uláakʼ metas maas mejentak utiaʼal u yáantkechoʼob.

Wa ka cumplirtik a metaseʼ jach maʼalob ken a wuʼuyilaba, yaan a maas biskaba yéetel u maasil yéetel yaan u kiʼimaktal a wóol.

Yaan a wuʼuyikaba maʼalob: Wa ka tsʼáaik metas mejentak ichil a kuxtal yéetel ka wilik a cumplirtikoʼobeʼ yaan a tsʼíiboltik ka yanaktech uláakʼ metas maas nuuktak. Leloʼ yaan xan u yáantkech utiaʼal a aktáantik le problemas ku yantaltech sáamsamaloʼ.

Yaan a maas biskaba yéetel u maasil: Tuláakal máak u kʼáat u bisuba yéetel máaxoʼob ku tsʼáaik u yóol u cumplirtoʼob u metasoʼob. Tsʼoʼoleʼ u paklan áantkuba máak yéetel juntúul u amigo utiaʼal u cumplirkoʼob junpʼéel meta yaantiʼobeʼ, ku beetik u bisubaʼob maas maʼalob.

Yaan u maas kiʼimaktal a wóol: Wa ka cumplirtik a metaseʼ jach maʼalob ken a wuʼuyilaba.

«Jach uts tin tʼaan in tsʼáaik in metas tumen beyoʼ mantatsʼ yaan baʼax in beete. Tsʼoʼoleʼ jach ku kiʼimaktal in wóol ken in wil jóokʼen yéetel le baʼax tin chʼaʼtukloʼ» (Christopher).

LE BIBLIAOʼ KU YAʼALIK: «Le máax táan u jach ilik tuʼux banda ku taal le iikʼoʼ maʼ kun paakʼal, le máax táan u jach ilik le múuyaloʼoboʼ maʼ kun cosechar» (Eclesiastés 11:4).

Utiaʼal a tsʼáaik a metas yéetel a cumplirkoʼobeʼ beet lelaʼ:

Yéey a metas. Tsʼíibt le baʼaxoʼob taak a beetkoʼ, kéen tsʼoʼokkeʼ ka yéeyik máakalmáak ken a yáax beetiʼ.

Tukult bix ken a béeykuntil. Beet lelaʼ:

• Tsʼíibt le fecha ka tuklik jeʼel u béeytal a tsʼoʼokbesikoʼ.

• Tsʼíibt baʼax ken a beet utiaʼal a béeykuntik.

• Tukult bey baʼax jeʼel u kʼáatal ta beeleʼ yéetel baʼax ken a beete.

Káajs desde bejlaʼeʼ. Maʼ a páaʼtik u yantaltech tuláakal utiaʼal a káajsik a beetik le baʼax a chʼaʼtukultmoʼ. Tukult baʼax yáax kʼaʼabéet a beetik yéetel beet tu séebaʼanil. Cada wa baʼax kʼiineʼ ilawil bix u bintech.

LE BIBLIAOʼ KU YAʼALIK: «Le baʼax ku chʼaʼtuklik le máax sáakʼóoloʼ ku jóokʼol maʼalobil» (Proverbios 21:5).