TIʼ U YÁAX TÁAN JUʼUNIL | ¿BAʼAXTEN UNAJ K-BEETIK BAʼAX UTS?
Máax maʼ tu beetik utseʼ kʼaas u bintiʼ
«Yaan horaeʼ jeʼel u salvarkech junpʼéel chan tuuseʼ» (Samantha, Sudáfrica).
Techeʼ ¿bey wa xan a tuukuloʼ? Maʼ xaaneʼ tuláakloʼon tsʼoʼok k-ilik jaaj baʼax ku yaʼalik Samantha. Baʼaleʼ le baʼax k-beetik tiʼ junpʼéel súutukil beyoʼ ku yeʼesik jach bixoʼon. Por ejemploeʼ wa maʼ k-kʼáat pʼáatal kʼasileʼ, maʼ xaaneʼ jeʼel k-tuuseʼ yéetel jeʼel k-aʼalik tuusnajoʼon yoʼolal junpʼéel baʼal maʼalobeʼ. Baʼaleʼ ken ojéeltaʼak u jaajileʼ tiʼ ken k-il u kʼaasiliʼ. Koʼox ilik baʼaxten.
LE TUUSOʼ KU XUʼULSIK LE CONFIANZAOʼ
Utiaʼal u biskuba máak yéetel wa máaxeʼ kʼaʼabéet u confiar tiʼ. Wa yaan confianzaeʼ jatsʼuts u biskubaʼob. Baʼaleʼ le confianzaoʼ maʼ chéen bey u taaloʼ. Le amigoʼoboʼ kʼaʼabéet u múul máanskoʼob tiempo, u tsikbaloʼob yéetel u jaajil u yóoloʼob, bey xan u paklan áantkubaʼob. U kʼaasileʼ chéen yéetel junpʼéel chan tuuseʼ jeʼel u xuʼulul le confianzaoʼ. Ken úuchuk leloʼ istikyaj u kaʼa creertaʼal máak.
¿Tsʼoʼok wa a tuʼusul tumen juntúul máax jach a yaabiltmaj? Wa beyoʼ maʼ xaaneʼ ta wuʼuyaj traicionartaʼabech yéetel yaachaj a wóol. U jaajileʼ deporsi bey u yuʼubikuba máakoʼ. Jeʼex tsʼoʼok k-ilkoʼ le tuusoʼ jeʼel u beetik u xuʼulul u biskuba kaʼatúul amigoʼobeʼ.
LE TUUSOʼ SÉEB U PÁAKʼAL
Tiʼ junpʼéel prueba beetaʼab tumen Robert Innes, juntúul profesor tiʼ economía tu Universidadil Californiaeʼ, ilaʼabeʼ «le tuusoʼ séeb u páakʼal». Le tuus túunoʼ bey junpʼéel pakʼbeʼen kʼojaʼanileʼ: wa ka biskaba yéetel máax yaʼab u tuuseʼ maas séeb kun káajal a beetik beyoʼ.
¿Baʼax unaj k-beetik utiaʼal maʼ u páakʼaltoʼon le tuusoʼ? Utiaʼal k-ojéeltikeʼ koʼox ilik baʼax ku yaʼalik le Bibliaoʼ.
