Tsʼáa u diosboʼotikil ken tsʼaʼabaktech yéetel tsʼáa le bukaʼaj ku páajtaleʼ

JÉEOBA, k-taata yaan teʼ kaʼanoʼ, jach u yaabiltmoʼon, le oʼolal jeʼex u yaʼalik le Bibliaoʼ ku kanáantikoʼon mantatsʼ (1 Ped. 5:7). Upʼéel bix u beetikeʼ letiʼe ken u yáantoʼon utiaʼal ka chúukpajak k-óol k-meyajtoʼ (Isa. 48:17). Letiʼeʼ u kʼáat ka k-kʼub óol tiʼ le áantaj ku tsʼáaik ken k-aktáant talamiloʼob wa ken chiʼichnakchajkoʼonoʼ. Koʼox ilik bix u yeʼesik u Ley Moisés lelaʼ.

Yoʼolal u yaabilaj Jéeoba tiʼ máaxoʼob meyajtikeʼ tu tsʼáaj upʼéel Ley tuʼux ku yaʼalik ka áantaʼak le máaxoʼob jach óotsiloʼoboʼ, jeʼex le minaʼan u taataʼoboʼ, le x-kimen íichamoʼoboʼ yéetel le j-táanxel luʼumiloʼob yanoʼob tu luʼumil Israeloʼ (Lev. 19:9, 10; Deu. 14:29). Jéeobaeʼ u yojel teʼ kʼiinoʼobaʼ yaan tiʼ le máaxoʼob meyajtikoʼ unaj u yáantaʼaloʼob tumen u maasil sukuʼunoʼoboʼ (Sant. 1:27). Le oʼolaleʼ wa ku péeksaʼal utúul sukuʼun tumen Jéeoba utiaʼal ka u yáantoʼoneʼ unaj k-kʼamik yéetel kiʼimak óolal.

Yáaxeʼ, le Bibliaoʼ ku yaʼalikeʼ le máaxoʼob meyajtik Diosoʼ unaj u tsʼáaikoʼob le bukaʼaj ku páajtaleʼ. ¿Kʼajaʼan wa tech u tsikbalil le x-kimen íicham jach óotsil ilaʼab tumen Jesús tu temploi Jerusaleneʼ? (Luc. 21:1-4.) Maʼ xaaneʼ, letiʼeʼ tu kʼamaj le áantaj ku yaʼalik le Ley kʼaʼabéet u tsʼaʼabal tiʼ le koʼoleloʼob kimen u yíichamoʼoboʼ. Baʼaleʼ, letiʼeʼ maʼatech u kʼaʼajsaʼal tumen máatbil u beetik baʼaxoʼob kʼaʼabéettiʼ, baʼaxeʼ ku kʼaʼajsaʼal tumen tu tsʼáaj le bukaʼaj yantiʼ yéetel tuláakal u puksiʼikʼaloʼ. Le baʼax tu beetoʼ tu taasaj kiʼimak óolal tiʼ, tumen le Bibliaoʼ ku yaʼalikeʼ «yaan [maas] kiʼimak óolal u tsʼaʼabal wa baʼax tiʼ u kʼaʼamal wa baʼax» (Hch. 20:35). Yoʼolal baʼax ku yaʼalik le tekstoaʼ, ¿bix unaj k-tsʼáaik «tiʼ uláakʼ máakoʼob» utiaʼal ka yanaktoʼon xan kiʼimak óolal? (Luc. 6:38.)

¿Bix jeʼel k-boʼotik tiʼ Jéeoba u yutsiloʼob toʼoneʼ?

Le salmistaoʼ tu kʼáataj: «¿Bix jeʼel u páajtal in boʼotik tiʼ Yuumtsil, tuláakal le uts u beetmajtenoʼ?» (Sal. 116:12). ¿Baʼax utsiloʼob tu kʼamaj tiʼ Jéeoba? Kanáantaʼab tumen Jéeoba tu kʼiinil «saajkil bey xan kʼiʼinamil». Le salmistaoʼ ku yaʼalik xan: «Tu tokajen tiʼ kíimil». Le oʼolal letiʼeʼ taakchaj u yilik bix jeʼel u boʼotik tiʼ Jéeobaeʼ. ¿Bix úuchik u beetik? Letiʼeʼ tu yaʼalaj: «Yaan in tsʼoʼokbesik in tsʼaa tʼaanoʼob tiʼ Yuumtsil» (Sal. 116:3, 4, 8, 10-14). Bey túunoʼ, le salmistaoʼ tu chʼaʼatuklaj u tsʼoʼokbesik tuláakal baʼax u yaʼalmaj tiʼ Jéeoba yéetel chúukpaj u yóol u meyajte.

Toʼoneʼ bey xan unaj k-beetikoʼ. Unaj k-beetik tuláakal baʼax ku yaʼalik u leyoʼob Jéeoba. Le oʼolaleʼ, kʼaʼabéet k-tsʼáaik táanil ichil k-kuxtal k-adorartik Jéeoba yéetel k-chaʼik u nuʼuktaʼal k-kuxtal tumen u kiliʼich muukʼ (Ecl. 12:13; Gal. 5:16-18). U jaajileʼ, mix bikʼin jeʼel u páajtal k-boʼotik tiʼ Jéeoba tuláakal le baʼax tsʼoʼok u beetik t-oʼolaloʼ. Baʼaleʼ kex beyoʼ  jeʼel k-kiʼimakkúuntik u yóol wa ka chúukpajak k-óol meyajteʼ (Pro. 27:11). Lelaʼ jach jeʼel u taasiktoʼon kiʼimak óolaleʼ.

Unaj k-áantaj utiaʼal ka maas muʼukʼaʼanchajak le múuchʼuliloʼ

U jaajileʼ jejeláas bix k-áantaʼal teʼ múuchʼuliloʼ. Yéetel u yáantaj le múuchʼuliloʼ Jéeobaeʼ tsʼoʼok u tsʼáaiktoʼon yaʼab kaʼansaj ku keʼetel yéetel janal; tsʼoʼok u yáantkoʼon k-pʼat le kaʼansajoʼob ku taal tiʼ le religionoʼob maʼatech u kaʼansikoʼob u jaajiloʼ bey xan tiʼ uláakʼ baʼaxoʼob maʼ maʼalobtakiʼ (Juan 8:32). Le kaʼansajoʼob ku tsʼáaik «le palitsil chúukpajaʼan u yóol yéetel yaan u naʼat» teʼ muchʼtáambaloʼob yéetel teʼ asambleaʼoboʼ ku tsʼáaiktoʼon u páajtalil k-páaʼtik k-kuxtal teʼ Paraíso tuʼux maʼ kun yantal mix upʼéel muʼyajiloʼ (Mat. 24:45-47). U jaajileʼ jach yaʼab utsiloʼob tsʼoʼok k-kʼamik teʼ múuchʼuliloʼ yéetel yaʼab xan le kun seguer k-kʼamikoʼ. Kux túun toʼon, ¿baʼax jeʼel u páajtal k-beetik utiaʼal k-áantaj teʼ múuchʼuliloʼ?

Apóstol Pabloeʼ ku yaʼalik: «Tuláakal le wíinkliloʼ maʼalob taablil yéetel kʼaxaʼanil tu baatsil tu yoʼolal nupaʼanil tuláakal u xéexetʼaloʼob; yéetel wa cada junxéetʼ le wíinklil ku meyaj maʼaloboʼ, tuláakal ku bin u nojochtal yéetel ku bin u chʼíijil ich yaakunaj» (Efe. 4:15, 16). Kex tiʼ le sukuʼunoʼob yéeyaʼanoʼob utiaʼal u binoʼob kaʼan ku tʼaan le tekstoaʼ, bey xan u yúuchul ichil u maasil máaxoʼob meyajtik Diosoʼ. Lelaʼ ku yáantkoʼon k-ileʼ tuláakloʼon jeʼel u páajtal k-áantaj ichil le múuchʼulil utiaʼal k-paklan muʼukʼaʼankúuntik k-óoloʼ. ¿Bix jeʼel u páajtal k-beetkeʼ?

Upʼéel bixeʼ letiʼe ka k-il k-líiʼsik u yóol u maasiloʼ (Rom. 14:19). Uláakʼ bix jeʼel k-áantajeʼ letiʼe ka k-eʼes ichil k-kuxtal le modos ku taal tiʼ le kiliʼich muukʼ ken múul meyajnakoʼon yéetel le sukuʼunoʼoboʼ (Gal. 5:22, 23). Uláakʼ bixeʼ letiʼe k-kaxtik bix jeʼel «k-beetik uts tiʼ tuláakal, yáax táanileʼ tiʼ le sukuʼunoʼob[oʼ]» (Gal. 6:10; Heb. 13:16). Jeʼex tu yaʼalil Pabloeʼ, le táankelmoʼob, nukuch máakoʼob, xiiboʼob yéetel koʼoleloʼoboʼ, wa ku yeʼeskoʼob yaabilajeʼ jeʼel u yáantajoʼob utiaʼal ka maas muʼukʼaʼanchajak le múuchʼuliloʼ.

Tsʼoʼoleʼ, unaj u meyajtoʼon baʼaxoʼob k-ojel, k-muukʼ yéetel k-taakʼin utiaʼal k-kʼaʼaytik le maʼalob péektsiloʼ. Jesucristoeʼ tu yaʼalaj: «Sibil ta kʼamjilakeʼex, siʼex túun» (Mat. 10:8). Le oʼolaleʼ beet tuláakal le ku páajtal utiaʼal a kʼaʼaytik le Reinooʼ yéetel utiaʼal a kaʼansik uláakʼ máakoʼob (Mat. 24:14; 28:19, 20). ¿Kux túun wa maʼ tu páajtal a beetik yaʼab jeʼex a kʼáateʼ? Tuukulnen tiʼ le koʼolel kimen u yíicham jach óotsil chʼaʼachiʼitaʼab tumen Jesuseʼ. Kex maʼ yaʼab le tu tsʼáajoʼ, Jesuseʼ tu yaʼaleʼ maas yaʼab tiʼ le tu tsʼáaj u maasiloʼoboʼ, tumen tuláakal le yantiʼ tu tsʼáajoʼ (2 Cor. 8:1-5, 12).

Unaj k-tsʼáaik u diosboʼotikil le áantaj ku tsʼaʼabaltoʼonoʼ

Baʼaleʼ yaan kʼiineʼ teech kun kʼaʼabéettal a wáantaʼal tumen u maasil le sukuʼunoʼoboʼ. Teʼ súutukoʼob beyaʼ unaj a kʼamik le áantaj ku tsʼáaikoʼoboʼ, tumen lelaʼ le kun áantkech a aktáant le chiʼichnakiloʼob yaan teʼ yóokʼol kaabaʼ. Jéeobaeʼ u tsʼaamaj xiiboʼob noʼojaʼanoʼob utiaʼal u kanáantoʼob yéetel yaabilaj le múuchʼuliloʼ. Ken yanaktech wa baʼax chiʼichnakileʼ letiʼobeʼ jach jeʼel u yáantkechoʼobeʼ (Hch. 20:28). Le ancianoʼob yéetel u maasil teʼ múuchʼuliloʼ baʼax u kʼáatoʼobeʼ u líiʼsoʼob a wóol, u kanáantechoʼob yéetel u yáantechoʼob ken kʼaʼabéetchajak (Gal. 6:2; 1 Tes. 5:14).

Bey túunoʼ, maʼalob ka a wil a tsʼáaik u diosboʼotikil yoʼolal le áantaj ku tsʼáaiktech le sukuʼunoʼoboʼ. Maʼ u tuʼubultecheʼ, leloʼ upʼéel bix u yeʼesiktech u yutsil Dios (1 Ped. 4:10). Maʼ k-kʼáat tuukul jeʼex u maasil máakoʼob maʼatech u tsʼáaikoʼob u diosboʼotikil le baʼaxoʼob ku beetaʼal tu yoʼolaloʼoboʼ.

Maʼ unaj k-obligartik u maasil ka u yáantoʼoniʼ

Teʼ carta tu tsʼíibtaj Pablo tiʼ le múuchʼulil  yaan kaʼach Filiposoʼ, tu yaʼalaj tu yoʼolal Timoteo: «Minaʼanten uláakʼ máak utiaʼal ka tuukulnak keet tin wéetel jeʼel bix letiʼeʼ yéetel tu jaajil ka u kaxant a wutsileʼex». Ka tsʼoʼokeʼ tu yaʼalaj: «Tumen tuláakal ku kaxtikoʼob chéen u yutsiloʼob, yéetel maʼ tu tsʼáaikoʼob tu yóoloʼob baʼax u káat Cristo Jesús» (Fili. 2:20, 21). Yoʼolal le baʼaxoʼob tu yaʼalaj Pablooʼ, maʼalob ka k-tukle: «¿Baʼax unaj in beetik utiaʼal maʼ in kaxtik chéen in wutsil?».

Mix utéen unaj k-obligartik le sukuʼunoʼob utiaʼal ka u yáantoʼonoʼoboʼ. ¿Baʼaxten? Tukult lelaʼ: ¿Máasaʼ k-tsʼáaik u diosboʼotikil tiʼ le sukuʼunoʼob ken u yáantoʼon yéetel wa bajux utiaʼal k-aktáantik wa baʼax talamiloʼ? Baʼaleʼ ¿máasaʼ maʼ ken k-obligartoʼob ka u yáantoʼonoʼob? Bey xan u yúuchul yéetel le tiempo ku jóoʼskoʼob utiaʼal u yáantkoʼonoʼoboʼ, kex kʼáat ka xiʼikoʼob t-iknaleʼ, maʼ unaj k-tukultik wa tuláakal súutukil ken u máansoʼob t-iknaliʼ. Baʼax k-kʼáateʼ ka áantaʼakoʼon yéetel kiʼimak óolal tumen le sukuʼunoʼoboʼ, maʼ tumen táan k-obligartkoʼobiʼ.

Kex le sukuʼunoʼob u kʼáatoʼob u yáantechoʼoboʼ yaan kʼiineʼ maʼ kun béeytal u beetkoʼob jach jeʼex unajeʼ. Baʼaleʼ teʼ súutukiloʼob beyoʼ Jéeobaeʼ yaan u yáantkech, jeʼex tu beetil yéetel le salmistaoʼ (Sal. 116:1, 2; Fili. 4:10-13).

Bey túunoʼ, unaj k-kʼamik le áantaj ku tsʼáaik Jéeobaoʼ, jeʼex le ku tsʼáaik tu kʼiinil táan k-muʼyajoʼ (Sal. 55:22). Letiʼeʼ u kʼáat ka k-kʼame bey xan ka k-tsʼáa u nib óolalil. Jéeobaeʼ u kʼáat xan ka k-tsʼáa baʼax yantoʼon yéetel kiʼimak óolal. Le oʼolaleʼ, chʼaʼatukult yéetel tuláakal a «puksiʼikʼal» a tsʼáaik le bukaʼaj ku páajtal utiaʼal u adorartaʼal Jéeobaoʼ (2 Cor. 9:6, 7). Beyoʼ ken tsʼaʼabaktech xan wa baʼaxeʼ yaan a tsʼáaik u diosboʼotikil, yéetel ken a tsʼáa xan wa baʼaxeʼ yaan a tsʼáaik le bukaʼaj ku páajtaleʼ.

[U tsolajil le oochel teʼ táan juʼun 31]

«¿Bix jeʼel u páajtal in boʼotik tiʼ Yuumtsil, tuláakal le uts u beetmajtenoʼ?» (Sal. 116:12)

▪ Kaxt bix jeʼel a beetik «uts tiʼ tuláakal[eʼ]»

▪ Mantatsʼ ilawil a líiʼsik u yóol yéetel a wáantik u maasil

▪ Beet tuláakal le ku páajtal utiaʼal a kaʼansik u maasil tiʼ le Bibliaoʼ