Unaj k-paklan áantikba utiaʼal k-maas meyajtik Dios

LE MÁAXOʼOB u kʼáatoʼob ka u maas tsʼáa u yóol u familiaʼob u meyajtoʼob Diosoʼ ku paklan áantikubaʼob. Le ka beetaʼab le yáax wíinkoʼob tumen Jéeobaoʼ, letiʼeʼ tu yeʼesaj u kʼaʼabéetil u paklan áantikubaʼob: Evaeʼ unaj kaʼach u yáantik Adán (Gén. 2:18). Bey túunoʼ, le ken tsʼoʼokok u beel máakeʼ, le íichamtsil yéetel le atantsiloʼ unaj u paklan áantikubaʼob (Ecl. 4:9-12). Le taatatsiloʼob yéetel le paalaloʼob xanoʼ kʼaʼabéet u paklan áantikubaʼob utiaʼal u beetkoʼob le baʼaxoʼob ku yaʼalik Jéeobaoʼ.

Adoración ich familiai

Barry yéetel Heidieʼ cinco u paalaloʼob, letiʼobeʼ tsʼoʼok u yilkoʼobeʼ tuláakal unaj yáantaj utiaʼal ka páajchajak u xookoʼob mantatsʼ ich familiai. Barryeʼ ku yaʼalik: «Cada wa baʼax kʼiineʼ kin waʼalik tiʼ in paalal ka u xakʼaltoʼob wa baʼax xookil maʼ sen talam u naʼataʼal utiaʼal ka u tsoloʼob ken xooknakoʼon ich familiailiʼ. Yaan kʼiineʼ kin waʼaliktiʼob ka u líiʼsubaʼob yéetel wa baʼax xookil tiʼ ¡Despertad! utiaʼal ka u yaʼaloʼob baʼax tu kanoʼobiʼ. Tsʼoʼoleʼ k-ensayartik baʼax jeʼel k-aʼalik ken jóoʼkoʼon kʼaʼaytajeʼ, beyoʼ cada utúul tiʼ k-paalaleʼ ku líiʼskuba utiaʼal u tsikbal yéetel u yuumil naj». Heidieʼ ku yaʼalik xan: «Tuláakloʼoneʼ k-beetmaj u listai baʼaxoʼob k-kʼáat beet ichil u kaajal Jéeoba yéetel cada wa baʼax kʼiineʼ k-xakʼaltik ichil u xookil k-familia utiaʼal k-ilik wa táan k-chukpachtikoʼob». Le sukuʼun yéetel u yatnaʼ u yéeymoʼob upʼéel áakʼab utiaʼal maʼ u chaʼantkoʼob televisión beyoʼ ku páajchajal u xook tuláakal le familia tubeeloʼ.

Muchʼtáambaloʼob

Mike yéetel Deniseʼ kantúul u paalaloʼob. ¿Baʼax utsiloʼob anchajtiʼob ikil u paklan áantkubaʼob? Mike ku yaʼalik: «Yaan kʼiineʼ, kex k-kʼáat kʼuchul táanil tiʼ u káajal le muchʼtáambaloʼoboʼ maʼatech u béeytal, baʼaleʼ t-ileʼ ken áantajnak tuláakaleʼ ku béeytal k-kʼuchul tu yorai». Deniseʼ ku yaʼalik: «Le mejentak kaʼach k-paalaloʼ k-aʼaliktiʼob tiʼ baʼax unaj u yáantajoʼob. Jeʼex Kim, k-hijaeʼ ku yáantken chak janal yéetel ku listokintik u mesai le jaanloʼ». Michael, u hijoʼobeʼ, ku yaʼalik: «Tu áakʼabiloʼob marteseʼ ku yantal kaʼach muchʼtáambal t-otoch. Le oʼolaleʼ k-ilik jabik tuláakal ichil le najoʼ, k-limpiartik yéetel k-tsolik u sillailoʼob». Matthew, uláakʼ u hijoʼobeʼ, ku yaʼalik xan: «Tu kʼiinil le muchʼtáambaloʼoboʼ, k-taataeʼ ku yilik u séeb pʼatik u meyaj yéetel ku yilik wa k-líiʼsmakba yéetel le baʼax kun xokbiloʼ». ¿Baʼax utsiloʼob tsʼoʼok u kʼamikoʼob?

U yáantaj tuláakaleʼ ku taasik utsiloʼob

Mikeeʼ ku yaʼalik: «Teen yéetel Deniseʼ káaj k-beetik k-precursoril tu jaʼabil 1987, teʼ kʼiinoʼob jeʼeloʼ, óoxtúul tiʼ k-paalaloʼobeʼ láayliʼ tiʼ kajaʼanoʼob t-otocheʼ. K-hija yéetel utúul tiʼ k-hijoeʼ tu beetaj xan u precursoriloʼob, u maasiloʼoboʼ tsʼoʼok u táakpajloʼob tiʼ jujumpʼéel meyajoʼob tu najil Betel. Tuláakloʼoneʼ tsʼoʼok k-áantik cuarenta máakoʼob utiaʼal ka u kʼub u kuxtaloʼob tiʼ Jéeoba yéetel ka okjaʼanakoʼob. Tsʼoʼok xan k-táakpajal tiʼ u beetaʼal kúuchiloʼob utiaʼal u adorartaʼal Jéeoba táanxel luʼumiloʼob».

Jeʼex túun k-ilkoʼ u paklan áantikuba máakeʼ ku taasik yaʼab utsiloʼob. ¿Tsʼoʼok wa a tuklik uláakʼ bix jeʼel a paklan áantikabaʼex ichil a wotocheʼ? Wa ka beetikeʼ yaan u páajtal a wáantik a familia u maas tsʼáa u yóol u meyajt Dios.

[U tsolajil le oochel teʼ táan juʼun 28]

U jóoʼsik máak u súutukil utiaʼal u kanik baʼax ken u yaʼal ken jóokʼok kʼaʼaytajeʼ ku taasik utsiloʼob