Galtzeʼel ni racné saʼ nacyibu xomod toib piloto né toib copiloto ni rony pensary toibsi mod. Diti ronyibu pensary ló laʼsiyibu, xalagary ngú, ronyibu pensary ni más galán par guiropcayibu dada órni guicalóyibu galnagan.

NI NÁ LA BIBLIA: «Ma diti nacyibu chop, ma nacyibu toibsi beʼel» (Mateo 19:6).

«Guiropcayibu non gacnéyibu saʼyibu modcu xcaltzeelyibu sarebuʼni» (Christopher).

Pal galtzeʼel diti racnéyibu saʼyibu, órni rioʼ toib galnagan xalagary gony reglaryibu galnagancu ragotzyibu dool saʼyibu, ni góc toib galnagan mitien rac toib galnagandaʼ.

«Nigolú rasac que galtzeʼel gony dxiin toibsi. Pal tzeʼela né naʼ diti ñonydo dxiin toibsi ñacdo xomod buñ ni rabés toibsi lainy toib yoʼ ni diti rioʼ de acuerdo par gony toib cós ni ma goniʼ» (Alexandra).

BUNY PENSARY LÓ NDEʼ

• ¿Ronylo pensary que bidxiich ni ronylo ganar nacni nosi par looy la?

• ¿Raquiin tzoʼlo toiblo par guisaclo sacró la?

• ¿Diti tampa radzaklo xfamil tzeʼelo ná layibu raguaʼyibu sacró la?

PAR GUININÉLO TZEʼELO

• ¿Ló xí cós sacró ronydo dxiin toibsi?

• ¿Ló xí cós labúu ñonydo láani más galán?

• ¿Xí cós labúu gonydo par labúu gonydo dxiin más galán guiropcado?

NI LABÚU GONYLO:

• Buny pensary que galtzeʼel nacni xomod toib galrraguit de tenis. ¿Xí labúu ñonyibu par naguityibu toibsi né diti ñonyibu gan saʼyibu?

• Xalagary gonylo pensary ximod labúu gonylo gan, buny pensary ximod labúu gonyto gan guiropcato.

«Diti noʼ xi portín ganto chú láabu nap razón. Ni más galán láani ngú guiguaʼto goxtiguie lainy xcaltzeelto» (Ethan).

NI NÁ LA BIBLIA: «Diti nosi tzoʼto galrrasaʼ por cós ni caquiinto, xalagary ngú guirá ór coltzoʼ galrrasaʼ por stipnés» (Filipenses 2:​3, 4).