Ku-Filemoni 1:1-25
1 UPawulu, isiboshwa + ngenxa kaKristu Jesu, noThimothewu + umfowethu, kuFilemoni isisebenzi esithandekayo esikanye naso,
2 naku-Apifiya udadewethu, naku-Arkiphu + isosha esikanye nalo, nasebandleni elisendlini yakho: +
3 Kwangathi ungathola umusa omkhulu* nokuthula okuvela kuNkulunkulu uBaba wethu naseNkosini uJesu Kristu.
4 Ngihlale ngimbonga uNkulunkulu wami uma ngikhuluma ngawe emithandazweni yami, +
5 njengoba ngiqhubeka ngizwa ngokholo nothando onalo ngeNkosi uJesu nangabo bonke abangcwele.
6 Ngithandazela ukuba ukuhlanganyela kwakho okholweni kukwenze uvume zonke izinto ezinhle esinazo ngoKristu.
7 Ngoba ngathola injabulo nenduduzo enkulu ngokuzwa ngothando lwakho, ngenxa yokuthi izinhliziyo* zabangcwele ziye zavuseleleka ngawe, mzalwane.
8 Ngenxa yalesi sizathu, nakuba nginenkululeko enkulu ngoKristu yokukuyala ukuba wenze okufanele,
9 nokho ngincamela ukukunxusa ngesisekelo sothando, njengoba nginguPawulu indoda esikhulile, yebo, manje futhi eyisiboshwa ngenxa kaKristu Jesu.
10 Ngikunxusa ngokuphathelene nomntanami engaba uyise + kuye lapho ngisejele,* u-Onesimu. +
11 Wayengelona usizo kuwe kodwa manje usewusizo kimi nakuwe.
12 Ngimbuyisela kuwe, yebo yena, inhliziyo yami uqobo.*
13 Ngingathanda ukumgcina ngapha ukuze angikhonze esikhundleni sakho njengoba ngiboshiwe ngenxa yezindaba ezinhle. +
14 Kodwa angifuni ukwenza lutho ngaphandle kwemvume yakho, ukuze isenzo sakho esihle singenziwa ngempoqo kodwa ngokuzithandela kwakho. +
15 Mhlawumbe ngempela kungalesi sizathu eqa okwesikhashana,* ukuze uphinde ube naye phakade,
16 engasesona isigqila + kodwa esengaphezu kwesigqila, esengumfowethu othandekayo, + ikakhulukazi kimi, kodwa kakhulu kangakanani-ke kuwe, enyameni naseNkosini.
17 Ngakho, uma ungibheka njengomngane,* mamukele ngomusa ngendlela obuyongamukela ngayo.
18 Ngaphezu kwalokho, uma ekonile nganoma iyiphi indlela noma ekukweleta noma yini, kwenze kube yisikweletu sami.
19 Mina Pawulu ngibhala ngesandla sami siqu: ngizokukhokhela—ngingasayiphathi eyokuthi ungikweleta ngisho noqobo lwakho.
20 Yebo, mfowethu, kwangathi ngingathola lolu sizo kuwe ngokuqondene neNkosi; vuselela inhliziyo yami* ngoKristu.
21 Ngikubhalela lokhu ngiqiniseka ukuthi uzolalela, ngiyazi ukuthi uzokwenza ngisho nangaphezu kwalokhu engikushoyo.
22 Kodwa kanye nalokho, ngilungisele nendawo yokuhlala, ngoba ngithemba ukuthi ngemithandazo yenu ngizobuyiselwa kini. *+
23 Abakhonzayo kuwe ngu-Ephafra, + isiboshwa esikanye nami kuKristu Jesu,
24 kanye noMarku, u-Aristarku, + uDema + noLuka, + izisebenzi engikanye nazo.
25 Umusa omkhulu* weNkosi uJesu Kristu ube nomoya eniwubonisayo.
Imibhalo yaphansi
^ Noma, “umusa ongafanelwe.”
^ Noma, “uthando lomzwelo.”
^ NgesiGreki, “ngiboshiwe.”
^ Noma, “uthando lwami lomzwelo.”
^ NgesiGreki, “ihora.”
^ NgesiGreki, “njengohlanganyela kanye nawe.”
^ Noma, “uthando lwami lomzwelo.”
^ Noma, “ngizokhululelwa nina.”
^ Noma, “Umusa ongafanelwe.”