Imibuzo Evela Kubafundi Balo Magazini . . .

Iyini i-Armagedoni?

▪ Igama elithi “Armagedoni” lenza abantu abaningi bacabange ngembubhiso eqothula uyaca—impi yenuzi nenhlekelele enkulu engokwemvelo. NgokweBhayibheli, leli gama alibhekiseli kulezi zinto ezisanda kubalwa. Pho iyini i-Armagedoni okukhulunywa ngayo eBhayibhelini?

Igama elithi “Armagedoni” (“Har–Magedoni”) livela encwadini yeBhayibheli yesAmbulo. Libhekisela empini engavamile, ‘impi yosuku olukhulu lukaNkulunkulu uMninimandla onke,’ lapho ‘amakhosi omhlaba wonke owakhiwe’ ehlelelwa ukulwa empini yokugcina noNkulunkulu. ImiBhalo eminingi iyakhuluma ngale mpi.—IsAmbulo 16:14-16; Hezekeli 38:22, 23; Joweli 3:12-14; Luka 21:34, 35; 2 Petru 3:11, 12.

Yini ehilelekile kule mpi? Ngendlela engokomfanekiso, incwadi yesAmbulo iyasitshela: ‘Amakhosi omhlaba namabutho awo abuthana ngenjongo yokulwa nalowo ohlezi ehhashini nebutho lakhe.’ Lowo “ohlezi ehhashini” yiNdodana kaNkulunkulu, uJesu Kristu, omiswe uNkulunkulu ukuba ahole ibutho lezingelosi ekunqobeni izitha zikaNkulunkulu. (IsAmbulo 19:11-16, 19-21) UJeremiya 25:33 wembula ubuningi babantu abangamhloniphi uNkulunkulu abayobhujiswa: “Ababulewe nguJehova ngalolo suku ngokuqinisekile bayosukela komunye umkhawulo womhlaba kuze kube komunye umkhawulo womhlaba.”

Kungani i-Armagedoni idingeka? Izizwe ziyabenqaba ubukhosi bukaJehova, kunalokho ziqhakambisa obazo. (IHubo 24:1) Ukwedelela kwazo kuchazwe kumaHubo 2:2: “Amakhosi omhlaba ayama nezikhulu eziphakeme zibuthene ndawonye ngobunye ngokumelene noJehova nogcotshiweyo wakhe.”

Eqinisweni, laba bavukeli bafana nabantu abahlala ngenkani endaweni okungeyona eyabo, futhi abangagcini nje ngokuthi bathi leyo ndawo ingeyabo, kodwa ababuye bayonakalise. Namuhla izizwe zonakalisa futhi zingcolisa umhlaba. IZwi likaNkulunkulu lasibikezela lesi simo esidabukisayo: “Izizwe zaba nolaka, nolaka [lukaNkulunkulu] lwafika.” UNkulunkulu ‘uyochitha abachitha umhlaba.’ (IsAmbulo 11:18) I-Armagedoni iyindlela kaNkulunkulu yokuxazulula impikiswano yokuthi ubani onelungelo lokubusa abantu.—IHubo 83:18.

Iyofika nini i-Armagedoni? INdodana kaNkulunkulu yanikeza impendulo ecacile: “Ngokuphathelene nalolo suku nalelo hora akekho owaziyo, nazingelosi zasemazulwini naNdodana, kodwa nguBaba kuphela.” (Mathewu 24:36) Noma kunjalo, iNkosi eyiQhawe uJesu Kristu yanezela lesi sixwayiso mayelana ne-Armagedoni: “Bheka! Ngiyeza njengesela. Uyajabula ohlala ephapheme.” (IsAmbulo 16:15) Ngakho, le mpi yembulunga yonke ihlotshaniswa nokuba khona kukaKristu, iziprofetho zeBhayibheli ezibonisa ukuthi sekufikile.

I-Armagedoni iyobhubhisa ababi kuphela, futhi kuyoba ‘nesixuku esikhulu’ sabayosinda. (IsAmbulo 7:9-14) Lesi sixuku esikhulu siyobona ukugcwaliseka kwala mazwi: “Sekuyisikhashana nje, omubi abe engasekho; ngokuqinisekile uyoyibheka indawo yakhe, futhi uyobe engekho. Kodwa abamnene bayodla ifa lomhlaba, futhi ngempela bayothola injabulo enkulu ngokuchichima kokuthula.”—IHubo 37:10, 11.

[Amazwi acashunwe esihlokweni ekhasini 10]

“Abamnene bayodla ifa lomhlaba, futhi ngempela bayothola injabulo enkulu ngokuchichima kokuthula”