Кижиниҥ јӱрӱминде кандый бир јаман неме боло берзе, улус: «Нениҥ учун мындый неме болуп калган?» — деп сурайт. Је Агару Бичикте бу сурактыҥ каруузы јарт бичилип калган.

1. Јаман кайдаҥ келген?

Сатана Дьявол Кудайга удура тӱймеен кӧдӱрген. Ончо јайаандар ого бажырзын деп кӱӱнзеп, ол баштапкы улусты, Адам ла Еваны, бойыныҥ јанына тартып алган. Ол мыны тӧгӱнниҥ болужыла эткен (Башталганы 3:1—5). Сатана Евага Кудай сенеҥ чынды јажырып турган деп айткан. Анайда ок олор Кудайдыҥ сӧзин укпаза да ырысту јӱрер деген. Сатана Еваны слер «ӧлбӧзигер» деп сӧстӧрлӧ тӧгӱндеп баштаган. Оныҥ учун Агару Бичикте Сатана Дьявол — «тӧгӱнчи ле тӧгӱнниҥ адазы» деп адалат (Иоанн 8:44).

2. Адам ла Ева нени талдаган?

Иегова Адам ла Еваны сӱӱп, олорго керектӱ немени ӱзе берип салган. Олорго Эдем садтыҥ кандый ла агажыныҥ јиилегин јиирге јараар болгон. Је јӱк ле бир агаштыҥ јиилегин јибезин деп јакарылган (Башталганы 2:15—17). Ева дезе Кудайдыҥ сӧзин укпай, Агару Бичикте айдылганыла, «јиилекти ӱзӱп, јип ийген». Оноҥ Адам бу агаштыҥ јиилегин база јиген (Башталганы 3:6). Мынайып, олор Кудайдыҥ јасагын бузып салган. Адам ла Евага толо кеминде болгонынаҥ улам, јастырбай јӱрерге кӱч эмес болгон. Оныҥ учун олорды биле-тура Кудайга удура барган деп айдарга јараар. Мындый керегиле олор Кудайдыҥ кӧрӱм-санаазын керекке албай, бойыныҥ кӧрӱм-санаазыла јӱрерге турганын кӧргӱскен. Олор јаҥыс ла бойлоры керегинде сананганынаҥ улам бойлорыныҥ да, бала-барказыныҥ да јӱрӱмин ӱреп салган (Башталганы 3:16—19).

3. Адам ла Еваныҥ талдап алган јӱрӱми неге экелген?

Адам ла Ева Кудайга удура кинчек эдип, толо кеминде эмес болуп калган. Мынаҥ улам бала-барказы база толо кеминде эмес болуп калган. Агару Бичикте Адам керегинде мынайып айдылган: «Кинчек телекейге бир кижи [Адам] ажыра келген, кинчек ажыра ӧлӱм келген. Анайып ончо улус ӧлӱмдӱ боло берген» (Римдегилерге 5:12).

Улус башка-башка шылтактардаҥ улам шыралап јат. Кезикте бойыстыҥ јастыраларыстаҥ улам шыралап јадыс. А кезикте — ӧскӧ улустыҥ јастыраларынаҥ улам. Ол эмезе сакыбаган јанынаҥ јеткерге учурап каладыс. (Экклезиаст 9:11 кычырыгар.)

 ТЕРЕҤЖИДЕ КӦРӰГЕР

4. Улустыҥ кыйын-шыразында кем бурулу?

Кӧп улус телекейле Кудай башкарат деп бӱдет. Је бу чын андый ба? ВИДЕОНЫ кӧрӱгер.

Иаков 1:13 ле 1 Иоанн 5:19 кычырып, суракты шӱӱжип ийигер:

• Кудай улустыҥ кыйын-шыразында бурулу ба?

5. Сатананыҥ башкарузы неге экелди?

1. А. Адам ла Ева Райда јадып турган толо кеминде улус болгон. Је олор Сатанага бӱдӱп, Иеговага удура барган

2. Б. Тӱймееннеҥ улам телекей кинчекле, кыйын-шырала, ӧлӱмле толуп калган

3. В. Иегова кинчекти, кыйын-шыраны ла ӧлӱмди јоголтып салар. Улус толо кемине једип, ойто райда јадар

 6. Бис шыралап турзаас, Иеговага ачу болот

Кудай бистиҥ кыйын-шырабысты кӧрӱп турган ба? Давид каанныҥ ла апостол Пётрдыҥ сӧстӧрин кӧрӱп ийзеер де. Сарын 31:7 ле 1 Пётр 5:7 кычырып, суракты шӱӱжип ийигер:

• Иегова кыйын-шырагарды кӧрӱп, слерди килеп турган деп сананзаар, слерде кандый сезимдер болот?

 ТӦС ШӰӰЛТЕЗИ

Сатана Дьявол ло баштапкы улус, Адам ла Ева, бастыра кыйын-шырада бурулу. Иеговага улустыҥ кыйын-шыразын кӧрӧргӧ ачу болот, је удабас ол кыйын-шыраны јоголтып салза, јаманныҥ изи де артпас.

Нени билип алдыгар?

• Сатана Еваны канайып тӧгӱндеген?

• Адам ла Еваныҥ тӱймеени бала-барказына кандый тӱбек экелген?

• Иеговага бистиҥ кыйын-шыраны кӧрӧргӧ ачу болот деп, бис кайдаҥ билерис?