መጽሐፍ ቅዱስን ስትማር ስለ ይሖዋ ብዙ ነገሮችን አውቀሃል። በተጨማሪም የተማርከውን ነገር ተግባር ላይ ለማዋል በሕይወትህ አንዳንድ ለውጦችን ሳታደርግ አትቀርም። ያም ሆኖ ራስህን ለይሖዋ ከመወሰንና ከመጠመቅ ወደኋላ እንድትል የሚያደርጉህ አንዳንድ ነገሮች ሊኖሩ ይችላሉ። በዚህ ምዕራፍ ላይ፣ ብዙዎች ከመጠመቅ ወደኋላ የሚሉባቸው አንዳንድ ምክንያቶች ምን እንደሆኑና እነዚህን እንቅፋቶች መወጣት የሚቻለው እንዴት እንደሆነ እንመለከታለን።

1. ከመጠመቅህ በፊት ምን ያህል እውቀት ሊኖርህ ይገባል?

ለመጠመቅ “የእውነትን ትክክለኛ እውቀት” ማግኘት ያስፈልግሃል። (1 ጢሞቴዎስ 2:4) እንዲህ ሲባል ግን ከመጠመቅህ በፊት፣ ሰዎች ለሚያነሷቸው የመጽሐፍ ቅዱስ ጥያቄዎች በሙሉ ምን መልስ መስጠት እንዳለብህ ልታውቅ ይገባል ማለት አይደለም። ከተጠመቁ ብዙ ዓመት የሆናቸው ክርስቲያኖችም እንኳ መማራቸውን መቀጠል ይኖርባቸዋል። (ቆላስይስ 1:9, 10) ይሁንና መሠረታዊ የሆኑትን የመጽሐፍ ቅዱስ ትምህርቶች ማወቅህ አስፈላጊ ነው። የጉባኤ ሽማግሌዎች በቂ እውቀት ይኖርህ እንደሆነና እንዳልሆነ ማወቅ እንድትችል ይረዱሃል።

2. ከመጠመቅህ በፊት ልትወስዳቸው የሚገቡ አንዳንድ እርምጃዎች የትኞቹ ናቸው?

ከመጠመቅህ በፊት ‘ንስሐ መግባትና መመለስ’ ይኖርብሃል። (የሐዋርያት ሥራ 3:19⁠ን አንብብ።) ይህም ሲባል ከዚህ በፊት ለፈጸምከው ኃጢአት ከልብ ልታዝንና ይሖዋ ይቅር እንዲልህ ልትለምን ይገባል ማለት ነው። በተጨማሪም አምላክ ከሚጠላቸው ነገሮች ለመራቅና እሱን በሚያስደስት መንገድ ለመኖር ቁርጥ ውሳኔ ማድረግ አለብህ። ከዚህም ሌላ በስብሰባዎች ላይ በመገኘትና ያልተጠመቅክ አስፋፊ ሆነህ በመስበክ በጉባኤው እንቅስቃሴዎች መሳተፍ ልትጀምር ይገባል።

3. ፍርሃት ወደኋላ እንዲያደርግህ ልትፈቅድ የማይገባው ለምንድን ነው?

አንዳንዶች ለይሖዋ ቃል የገቡትን ነገር ሳይፈጽሙ ሊቀሩ እንደሚችሉ ሲያስቡ ፍርሃት ያድርባቸዋል። እርግጥ ነው፣ አልፎ አልፎ ስህተት ልትሠራ እንደምትችል የታወቀ ነው፤ በመጽሐፍ ቅዱስ ውስጥ የተጠቀሱ አንዳንድ ታማኝ ወንዶችና ሴቶችም ስህተት ሠርተዋል። ሆኖም ይሖዋ አገልጋዮቹ ፍጹም እንዲሆኑ አይጠብቅባቸውም። (መዝሙር 103:13, 14⁠ን አንብብ።) አቅምህ የፈቀደውን ሁሉ ስታደርግ ይደሰታል! ደግሞም ይረዳሃል። እንዲያውም ይሖዋ ምንም ነገር “[ከእሱ] ፍቅር ሊለየን እንደማይችል” አረጋግጦልናል።—ሮም 8:38, 39⁠ን አንብብ።

 ጠለቅ ያለ ጥናት

4. ስለ ይሖዋ ይበልጥ ለማወቅ ጥረት አድርግ

5. እንዳትጠመቅ መሰናክል ሊሆኑብህ የሚችሉ ነገሮችን አሸንፍ

6. ይሖዋ እንደሚረዳህ እምነት ይኑርህ

7. ይሖዋ ላሳየህ ፍቅር ያለህን አድናቆት አሳድግ

 ማጠቃለያ

እንዳትጠመቅ እንቅፋት የሚሆንብህን ማንኛውንም ነገር በይሖዋ እርዳታ መወጣት ትችላለህ።

ክለሳ

• ከመጠመቅህ በፊት ምን ያህል የመጽሐፍ ቅዱስ እውቀት ሊኖርህ ይገባል?

• ከመጠመቅህ በፊት ምን ለውጦችን ማድረግ የሚኖርብህ ይመስልሃል?

• ፍርሃት ወደኋላ እንዲያደርግህ መፍቀድ የሌለብህ ለምንድን ነው?