Biblian yatichäwinakapa

¿Kunas Diosan Reinopaxa?

Aka yatichäwixa, kawkïr jisktʼanaktï jumax jisktʼasirïta ukwa pachpa Bibliamampi yatxatañ yanaptʼätam. Jumatï munsta ukhaxa, Jehová Diosan Qhanañchirinakapampiw aka jisktʼanakat yatxatasma.

1. ¿Kunas Diosan Reinopaxa?

Jehová Diosan gobiernopawa. Uka gobiernowa akapachankir gobiernonaka lanti uttʼayasini ukat Diosan munañap phuqayani aka uraqinsa ukhamarak alaxpachansa. Chiqpachansa, taqiniw Diosan Reinopampi apnaqatäñ muntanxa. (Daniel 2:44; Mateo 6:9, 10 liytʼäta.)

Mä gobiernonxa mä apnaqirix utjañapapuniwa, Jehová Diosax Jesucristo Yuqaparuw Reyit uttʼayi, ukhamat Reinopan apnaqañapataki. (Lucas 1:30-33 liytʼäta.)

2. ¿Kunatsa Jesusax suma apnaqirixa?

Jesusax wali khuyaptʼayasiri, taqi kuns chiqapar uñjiri ukat jaqir yanaptʼañatakis chʼamanirakiwa, ukatwa suma apnaqirixa (Mateo 11:28-30). Jiwatat jaktayatäxasinxa alaxpacharuw sarxi, ukampis janiw ukhatpach apnaqañ qalltkänti (Hebreos 10:12, 13). Jan ukasti, Awkipan kupïxapanwa autoridad katuqañapkam suyaskäna. (Daniel 7:13, 14 liytʼäta.)

3. ¿Khitinakas Jesusamp chik apnaqapxani?

Jesusax Diosan yupaychirinakapat mä qhawqhanimpiw apnaqanini sasaw Bibliax qhanañchi. Daniel 7:27 qillqatarjamaxa, jupanakax ‘alaxpachankir Diosan markaparu katuyatäpxaniwaʼ. Ukankapxañapatakixa Jehová Diosax Jesusan apostolanakaparuw nayraqat ajlliwayi. Jichhürunakanxa, ukhamarakiw iyawsäwin chachanakaru ukat warminakar ajlliski. Ukat Jesusjamarakiw jiwatat jaktayatäsinxa alaxpachar sarapxani. (Juan 14:1-3; 1 Corintios 15:42-45 liytʼäta.)

¿Qhawqhanis alaxpachar sarapxani? Mä qhawqhanikiwa, “jiskʼa tama” sasaw Jesusax jupanakar säna (Lucas 12:32). Jesusamp chikax 144.000 ukhanikiw aka Uraqxar apnaqanipxani. (Apocalipsis 20:6, ; 14:1 liytʼäta.)

  4. ¿Kunapachas apnaqañ qalltxäna?

Jesusax 1914 maranwa reyit uttʼayatäxäna. * Uka qhipatxa, Supayampiru saxranakapampiruw alaxpachat aka Uraqir jaquqanïna (Apocalipsis 12:7-10, 12). Ukat aksaruxa, jan waltʼäwinakax jukʼampiw jilxatawayi. Chʼaxwäwinakasa, uraq khathatinakasa, usunakasa, machʼanakasa ukat kunaymani jan waltʼäwinakasa aka qhipa urunakan jakasitaswa qhan uñachtʼayi (2 Timoteo 3:1-5). Taqi khitinakatï Diosan apnaqäwipat walja bendicionanak katuqañ munapki jupanakaxa Diosan uttʼayat Jesucristo Reyiparuw arkapxañapa. (Lucas 21:7, 10, 11, 31, 34, 35 liytʼäta.)

5. ¿Diosan Reinopax kunanaks lurani?

Uraqpachan yatiyasiskatapatwa, millón millón jaqinakax Diosan chiqa yatichäwinakap yatxatawayapxi (Mateo 24:14). Ukampis janiw ukakïkiti, kunapachatï jan wali jaqinakar tʼunjani ukhaxa, Jesusamp apnaqayasiñ munapki uka “walja jaqinaka[rux]” qhispiyaniwa. (Apocalipsis 7:9, 10, 13-17 liytʼäta.)

Waranq maranakanxa, aka Uraq mä paraisoruw tukuyani. Ukatsti Awkiparuw apnaqañapataki taqi kuna katuyxani (1 Corintios 15:24-26). ¿Diosan Apnaqäwipat yaqhanakar parlañ munasmati? (Salmo 37:10, 11, 29 liytʼäta.)

Jukʼamp yatxatañatakixa, ¿Kunsa Bibliax chiqpachapuni yatichi? aka libron 8 ukat 9 jaljanakap uñxattʼäta, ukax Jehová Diosan Qhanañchirinakapan luratawa.

[Qhanañchäwi]