¿Wawanakarux Diosat yatichañäspati?

JICHHÜRUNAKANXA, wawanakar Diosat yatichañ tuqit kunaymanitwa amuyapxi. Janiw awk taykanakarux wawanakapar Diosat yatichapxañapax waktʼkiti sasaw yaqhip markanakanx sapxi. Ukat Diosar yupaychir familian jilsupki uka wawanakax janiw mayni wawanakjamäpkiti, sasaw sapxaraki.

¿Jumax kamsasmasa? Aka aynachañ uñstki uka arunakatxa, ¿kawknïris jumatakix walikïski?

● Janiw awk taykanakax wawanakapar Diosat yatichapxañapäkiti.

● Diosat yatichañatakixa, awk taykanakax wawanakapan jilsuñapkamaw suytʼapxañapa.

● Wawanakapax jiskʼäsipki ukhaw awk taykanakax Diosat yatichapxañapa. Ukampis jilsupxani ukhax jupanak pachpa sum yatxatapxañapatakiw chʼamañchtʼapxañapa.

● Wawanakax jan kamsasakiw awk taykapan creencianakapar iyaw sapxañapa.

¿Diosat yatiqasax wawanakax janit sum jakasipkaspa?

Munasiri awk taykanakax janiw wawanakapan jan walin uñjasipxañap munapkiti, jan ukasti sum jakasipxañapwa munapxi. Ukampisa, wawanakar janiw Diosat yatichañäkiti sasin sapki uka jaqinakan arunakapax ¿chiqäpachati? Diosar yupaychir familian jilsupki uka wawanakax kunjamäpxisa, ukwa yatxattʼat jaqinakax walja maranakan yatxatawayapxi. Ukat yatxatasax ¿kunsa jupanakax sapxi?

Diosar yupaychir familian jilsuwayapxi uka wawanakaxa, jan walin jikxatasiñat sipansa, sum jakasipxañapatakiw yanaptʼawayi. Uka yatxatäwinakat parlasaxa, mä revistax akham sasaw qhanañchi: “Awk taykapampi sum apasipxañapatakiw Diosat yatiqañax wawanakar yanaptʼi” sasa. * Uka revistax akham saskakiwa: “Wawanakatakix Diosat yatiqañasa ukat Jupar yupaychañasa wali wakisiriwa, ukat familiapampi sum apasiñatakiw yanaptʼaraki” sasa (Social Science Research, 2008 maranwa uka revistax apsusiwayi). Uka arunakaxa, kunjamtï Jesusax siskäna uka arunakjamarakiwa, jupax akham sänwa: “Kusisiñanïpxiw khitinakatix ajay tuqin aynachtʼatäpxatap amuyasipxi ukanakaxa” sasa (Mateo 5:3).

Diosat yatichañatakix awk taykanakax wawanakapan jilsuñapkamaw suytʼapxañapa sasin sapki ukanakatxa, ¿kamsaraksnasa? Chiqansa, wawanakax jiskʼäsipki ukhax “jankʼakiw” taqi kuns yatiqapxi, kunjamtï qhiyax um chʼamthapkixa ukhama, ukwa ukham sir jaqinakax jan amuyapkiti. Ukhamax niyakixay wawanakax jankʼak yatiqapxchixa, awk taykanakax kunsa yatichapxani uk sum amuytʼasipxañapawa. ¿Sum sarnaqapxañapatak yatichäwinaktï yatichapxani? Jan ukax ¿yaqhanakat jan wali amuyunaka ukat luräwinaka yatiqasipxañapatakich wawanakapar jaytapxani?

¿Kun lurañas wakisispa?

Nayratpachaw religionanakax jaqinakan uñisisipxañapataki ukat yaqhachasipxañapataki wiytawayi. Ukhamasti, ¿kunsa awk taykanakax wawanakapan jan ukhamar purtʼasipxañapatakix lurapxaspa? Ukat ¿kunjamsa jaqi masisar munasiñ yatichapxaspa?

Uk yatiñatakix aka kimsa jisktʼanakan qhanañchäwip yatiñaw wakisi: 1) ¿Kunsa wawanakar yatichañäspa? 2) ¿Khitinakas yatichapxañapa? 3) ¿Kunjamsa sum yatichapxaspa?

[Qhanañchäwi]