ICIPANDE ICIKALAMBA | BAMALAIKA—BUSHE E KO BABA? CINSHI TUFWILE UKWISHIBILA ICISHINKA?
Bushe Kwaliba Bamalaika Ababipa?
Ee, bamalaika babipa e ko baba. Bafumine kwisa? Ilyo Lesa abumbile bamalaika, alibapeele insambu sha kuisalila. Nomba ilyo tapalakokola ukutula apo Lesa abumbiile abantu ba kubalilapo Adamu na Efa, malaika umo alipondokeele Lesa, kabili alilengele Adamu na Efa bapondokela Lesa. (Ukutendeka 3:1-7; Ukusokolola 12:9) Baibolo tayalanda ishina lya kwa uyu malaika nelyo umulimo alebomba ku muulu. Nomba ilyo uyu malaika apondweke, Baibolo yatendeke ukumwita ati Satana, ishiwi ilipilibula ukuti “Uukaanya,” no kuti Kaseebanya, icalola mu kuti “Uwa lwambo.”—Mateo 4:8-11.
Ku ca bulanda, kwali bamalaika na bambi abapondweke. Mu nshiku sha kwa Noa, bamalaika abo Baibolo ishalumbula impendwa “bashile ififulo fyabo ifyabalinga” ku muulu kabili baishile pe sonde no kufwala imibili ya bantunse pa kuti balecita ubulalelale na banakashi. Lelo Lesa tabumbile bamalaika ukuti balecita ifya musango uyu.—Yuda 6; Ukutendeka 6:1-4; 1 Petro 3:19, 20.
Finshi fyacitikiile balya bamalaika babipa? Ilyo Lesa aletele ilyeshi ku konaula abalecita ifyabipa, balya bamalaika babipa balibwelelemo ku cifulo ca mipashi. Na lyo line, Lesa tabasuminishe ukubwelela ku “fifulo ifyo bakwete pa kubalilapo,” lelo alengele babe mu cifulo umwaba imfifi ya ku mupashi umo beta ati Tartari. (Yuda 6; 2 Petro 2:4) Ifi fibanda fitungululwa na Satana Kaseebanya “kateka wa fibanda” kabili ‘uuifungushanya kwati ni malaika wa lubuuto.’—Mateo 12:24; 2 Abena Korinti 11:14.
Baibolo isambilisha ukuti Ubufumu bwa kwa Mesia, ubwaba ku muulu, bwatendeke ukuteka mu 1914. * Ilyo Ubufumu bwatendeke ukuteka, Satana ne fibanda fyakwe balibatamfishe ku muulu kabili tababasuminishe ukulayako. Kanshi ifi pe sonde pafula sana ububifi, filangilila fye ukuti Satana ne fibanda fyakwe baliba ne cipyu icikalamba kabili balafwaya ukulufya abantu abengi.—Ukusokolola 12:9-12.
Na lyo line, ifi ubunkalwe no bubifi fifulile mu calo filanga fye ukuti nomba line Satana ne fibanda fyakwe bali no kuleka ukuteka icalo. Nomba line fye, ifi ifibumbwa fya mupashi tafyakakwate amaka ya kulufya abantu. Ubufumu bwa kwa Lesa bukateka abantu mu paradaise pa myaka 1,000. Kabili pa numa ya myaka 1,000 Satana ne fibanda fyakwe bakabapeela inshita iinono iyakwesha abantu pa muku wa kulekeleshako. Lyena pa numa bakonaulwa umuyayaya.—Mateo 25:41; Ukusokolola 20:1-3, 7-10
^ para. 6 Nga mulefwaya ukwishibilapo na fimbi pa Bufumu bwa kwa Lesa, belengeni icipandwa 8 mu citabo citila Bushe Cinshi Baibolo Isambilisha? Ici icitabo calembwa ne Nte sha kwa Yehova kabili kuti mwacisanga na pa www.dan124.com/bem.
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Bushe Satana Kuti Akwata Amaka pa Bantu?
Finshi Satana abomfya pa kulufya abantu kabili kuti mwacita shani pa kuti muicingilile?
AMASUKO KU MEPUSHO YA MU BAIBOLO
Bushe Ifibanda E ko Fyaba?
Bushe ifibanda finshi? Ni kwi uko fyafumine?
