ASU BISOÉ
9: Avale môt ô né
JÔME NALÉ A TINAN
Avale môt ô né, é nji tinane ve jôé dôé a éyeka’a jôé. Ja tinane fe mbamba mefulu wo tôñ, mame wo buni, a mefulu môé womien ô bili. Nya ajôô a ne na, avale môt ô né, da fombô mam mese ma bo na ô bo fo’o womien, été a atan.
AMU JÉ É NE MFI
Éyoñe wo nyan avale môt ô né, ô ne ngule ya kamane mam wo buni a lôte na ô kañese’e na, bemvôé bôé mbe be liti wo avale wo yiane wulu.
“Abui bôt e ne ane bemannequin bi lôô menda ba kuane biyé. Be nji tobe biyé ba yiane be jalé, bôte befe mbe ba tobe bie.”—Adrian.
“Me nga yé’é na ma bo mame me ne zôsô ja’a éyoñ é nji be tyi’ibi. Me ne ngule ya yemelane benya bemvôé bam a avale ba bo mam, a avale mamiene ma bo éyoñe me ne a be.”—Courtney.
ÑYE’ELANE YA BIBLE: “A te boan éfunan a si nyô: ve mi veñesa’an ñveñesane ya bo minsisim mienane mimfefé.”—Beromain 12:2.
JAM Ô NE BO
Jeñe na ô yem avale môt ô né éyoñe ji, a avale môt wo yi na ô bo melu ma zu a zene ya yeme vôm ô ne ngul, vôm ô ne atek, a mame wo buni. Mbamba zene ya bo de a ne na, ô ve biyalane ya minsili mi.
Vôm ô ne ngul: Atyeñe mboane mam avé me bili? Mbamba mefulu mevé me bili? (Éve’an: Ye ba yeme ma ane môt a wô’ô kui awolo? Ye ma yeme jôé mamien? Ye ma saé a nlem ôse? Ye me ne akap?) Mbamba be mame mevé ma bo?
MELEP: Ye wo kate kui na ô yemelane mbamba mefulu ô bili? Sili’i bebiaé bôé, nge mvôé jôé ô too je ndi, be kate wo mbamba be mame ba yene be wo a amu jé.
ÑYE’ELANE YA BIBLE: “Ve na, môt ase a fombô’ô mboane wé émien, wôna a ye bi ava’a dé de aso ve be émien, te so be môt mfe.”—Begalate 6:4.
Vôm ô ne atek: Da sili na me bo mintyendane vé? Éyoñ évé nje me ne ji’a ku meve’ele? Ma yiane dañe saé fulu njôane nlem mefola mevé ya ényiñe jam?
ÑYE’ELANE YA BIBLE: “Nge bi ajô na, bi se ke abé, bi adu’u biabebien.”—1 Jean 1:8.
Mame wo buni: Metiñe mevé ma tôñ, a amu jé? Ye ma buni Zambe? Beamu bevé be nga yemete mbunane wome na Zambe a vee? Mimboane mi mam mivé ma yene na mi nji bo zôsô, a amu jé? Mam mevé ya melu ma zu me too me ndi?
ÑYE’ELANE YA BIBLE: “Mfasan wo ye ba’ale wo, nya fe’e a ye lôñe wo nka’alé.”—Minkana 2:11, Mfefé Nkôñelan.
You May Also Like
BIYALANE YA MINSILI 10 BISOÉ BIA SILI BEBIEN
Me ne ne za?
Éyoñe wo yeme mam wo buni, mefulu môé ma dañ abeñ, minsôñane miôé, a vôme wo yiane ve ngul, nalé a volô wo na ô nyoñe mbamba mintyi’an éyoñe môt a kômbô tindi wo na ô bo jam é ne abé.
