ASU BEBIAÉ
6: Melep
JÔME NALÉ A TINAN
Éfia melep é ne tinane na e liti zen, nge na e ye’ele. Biyoñ biziñ, nalé a sili na be sôane mbia fulu mongô a ne bi. Ve jame da, é wô’ô fe tinane na wo ve mongô ñye’elan a lat a mbamba ntaban asu ya na, a ji’a yeme nyoñe mbamba mintyi’an ényiñe jé.
AMU JÉ É NE MFI
Melu ma, bebiaé be nji dañe beta ve bone bap melep amu ba ko woñe na, mongô a yen émien ane zezé jôm. Ve bebiaé be ne fek, ba ta’a mbamba metiñe bongô ba yiane tôñ, a ba volô be na be tôñe me.
“É ne mfi na be kate bongô mame ba yiane bo a ma be nji yiane bo, nalé é volô be na be bo benya bôtô be ne bitôlô. Nge be nji be ve melep, ba ye bo ane sitima a ne teke’e jôme ba dutu nye, a ye su’ulane nyoñe mendim si.”—Pamela.
JAM Ô NE BO
Bo’o avale wo te tyik. Nge bone bôé ba bene tôñe metiñe môé, va’a be fonos ja yian. Ve jame da, bo’o ôjeja’a ya se’e benyo bon éyoñ ba wulu avale wo yi.
“Me wô’ô se’e bone bam amu be ne mewôk a to ke na ba nyiñ émo é ne njalan a éngana’a. Nse’an wo volô be na be ji’a kañese melep éyoñe ja sili.”—Christine.
ÑYE’ELANE YA BIBLE: “Jôm ése môt a mias, nje éte fe a ye kôan.”—Begalate 6:7.
Bii mbamba mfasan. Éyoñe wo ve mongô melep, te vuan ôkala wé, ngule jé, a aval ékop a te bo bo. Melebe ma dañe lôt éyoñe ma yian a ékobe a te bo: éve’an é ne na, nge mongô a te dimine belane téléfôn, be ne nye nye vaa, nge tyi’i biyoñe ba ye bo be va’a nye téléfon. Ve, ô kale’e nene bikobe bié a to ke na bi ne zezé mam.
“Ma jeñe na me yemelane nge mone wom a te vañe bo melo, nge dimine wô’ô jam éziñ. Nsela’ane a ne zañe mbia fulu ba yiane fit a ékop ja sili melep.”—Wendell.
ÑYE’ELANE YA BIBLE: “Te soñane benyo bon, be za [bili ate’e] minlem.”—Becolossien 3:21.
Liti’i nye’an. Melebe me wô’ô bo tyi’ibi ya kañese a tôñ asu bongô éyoñ ba yeme na, nsôñane bebiaé be bili ô ne njalan a nye’an.
“Éyoñe monafam wongan a mbe a bo’o bikop, bi mbe bi kate nye na bia wô’ô nye mvaé amu mbamba mintyi’an a nga nyoñe melu mvus. Bi mbe bi timine nye na, jam a te bo d’aye bo na bi mane vuane mame mete, ve a yiane tyendé jam a te bo a kañese melep, a bi ne valé nge a yi mvolan.”—Daniel.
ÑYE’ELANE YA BIBLE: “Nye’an wo ajaé jibi, a ô ne mvam.”—1 Becorinthien 13:4.
