PAGSUGOD sa 1916, nagpadayon pa ang Dakong Gubat—sa ulahi nailhang Gubat sa Kalibotan I. Kapig tuig na kining nakakalas ug daghang kinabuhi sa magkakontrang partido.

Ang Enero 1, 1916 nga Watch Tower miingon: “Tungod sa dakong gubat sa Europe, daghan ang nahimong relihiyoso ug nabalaka sa ilang kaugmaon.” Ang maong artikulo midugang: “Magmaaktibo diha sa atong pribilehiyo, sa atong kahigayonan, nga dili maluya kondili magmadasigon alang sa Diyos ug sa Iyang Mensahe.”

Ang tinuig nga teksto sa 1916 nagdasig sa mga igsoon nga magpabiling ‘kusganon sa pagtuo’ sumala sa Roma 4:20. Gihimo kana sa daghang Estudyante sa Bibliya ug nadawat nila ang dagayang panalangin ni Jehova.

Ang mga representante sa Watch Tower Society nga nailhang mga pilgrim nagbiyahe sa lainlaing lungsod aron maghatag ug pagdasig ug instruksiyon sa mga Estudyante sa  Bibliya. Pagka-1916, halos usa ka milyong kilometro ang nabiyahe sa mga 69 ka pilgrim.

Sa pakigpulong sa pilgrim nga si Walter Thorn sa kombensiyon sa Norfolk, Virginia, gikompara niya ang Kristohanong pakig-away sa Dakong Gubat: “Gibanabana nga mga 20 ngadto sa 30 ka milyon ang naggunit ug armas. . . . Wala mahibalo ang kalibotan nga may lain pang grupo [sa mga sundalo]. Sila ang mga sundalo sa Ginoo, ug sama sa sundalo ni Gideon, sila nakiggubat dili pinaagig literal nga armas. Sila nakiggubat para sa kamatuoran ug pagkamatarong, ug sila nakig-away sa maayong pakig-away sa pagtuo.”

Niadtong ulahing bahin sa 1916, kapin sa milyon ang nasamdan o namatay sa gubat sa France nga gitawag ug First Battle of the Somme. Lisod ang kahimtang niadtong panahona pero padayong gisuportahan sa kugihang mga igsoon sa France ang mga klase, o kongregasyon. Ang  Enero 15, 1916 nga Watch Tower nag-imprenta sa sulat ni Joseph Lefèvre—Estudyante sa Bibliya nga napugos sa pagbiya sa iyang baryo sa Denain, France, dihang gisakop kini sa Germany niadtong 1914. Miadto siya sa habagatang Paris ug nakig-uban sa nag-inusarang kongregasyon sa maong siyudad. Wa madugay, siya na ang nagdumala sa tanang tigom bisan pag masakiton.

Sa ulahi, si Joseph giubanan ni Théophile Lequime, nga mibiya sab sa Denain. Sa primero, si Brader Lequime miadto sa Auchel, France, diin iyang gisugdag hubad ang mga artikulo sa Watch Tower ug gipadala sa mga igsoon sa ubang dapit sa France nga wala pa masakop. Napugos siya pagbiya sa Auchel kay gidudahan sa mga militar ang iyang buluhaton. Para kang Brader Lefèvre, tubag sa iyang pag-ampo ang pag-abot ni Brader Lequime.

Gipanalanginan gyod ang ilang buluhaton sa Paris. Si Brader Lefèvre mireport: “Mga 45 na mi sa among klase . . . Daghan ang nakaamgo sa kanindot ug sa pribilehiyo sa pagpahinungod, ug paspas ang ilang pag-uswag sa espirituwal. Halos tanang membro ang motambong sa senemanang tigom sa testimonya.”

Samtang nagpadayon ang gubat, daghang igsoon ang gikuwestiyon tungod sa isyu sa neyutralidad. Sa Great Britain, gipasar ang Military Service Act, nga nag-obligar sa tanang lalaki nga nag-edad ug 18 ngadto sa 40 nga magsundalo. Pero daghang Estudyante sa Bibliya ang determinado nga magpabiling neyutral.

Pananglitan, ang Abril 15, 1916 nga Watch Tower nag-imprenta sa sulat ni W. O. Warden nga taga-Scotland. Siya miingon: “Usa sa akong mga anak 19 anyos na. Siya nakahatag ug maayong pamatuod bahin sa Ginoo kay wala magsundalo. Kon patyon siya tungod niana, masaligon ko nga iyang madawat ang Grasya gikan sa Langit aron makapabilin  siyang matinumanon sa kamatuoran ug pagkamatarong.”

Gikasohan sab kay wala magsundalo si James Frederick Scott—batan-ong colporteur nga taga-Edinburgh, Scotland. Pero human mapresentar ang tanang ebidensiya, ang korte midesisyon pabor kang Brader Scott kay siya “apil sa mga exempted sumala sa Balaod.”

Galing lang, daghan ang wala pabori sa korte. Pagka-Septiyembre, sa 264 ka brader nga miaplay aron ma-exempted, 23 ang giasayn sa sibilyan nga serbisyo. Pero kadaghanan “gipatilaw ug klase-klaseng pag-antos,” giobligar sa “pagtrabaho para sa Kaayohan sa Nasod sama sa paghimog karsada, pag-quarry, ug uban pa,” mireport ang Oktubre 15, 1916 nga Watch Tower. Lima ra ka brader ang gipaboran sa korte nga dili apil sa militar nga serbisyo.

Pagka-Oktubre 16, 1916, ang nanguna sa mga Estudyante sa Bibliya niadto nga si Charles Taze Russell mibiyahe para sa pagdiskurso sa lainlaing lugar sa kasadpang United States. Pero wala na siya makauli. Martes sa hapon, Oktubre 31, si Brader Russell namatay sa edad nga 64 samtang nagsakay sa tren sa Pampa, Texas.

Daghang igsoon ang dili makatuong may makapuli sa papel ni Brader Russell. Giimprenta sa Disyembre 1, 1916 nga Watch Tower ang iyang mga tugon nga naghisgot sa iyang mga pangandoy bahin sa buluhaton nga iyang gipangunahan sa daghang tuig. Pero nagpabilin ang pangutana: Kinsay mopuli niya?

Tubagon kana sa sayong bahin sa 1917, panahon sa tinuig nga tigom sa Watch Tower Bible and Tract Society of Pennsylvania. Ang mga nanambong mibotar, ug halos magkahiusa ang resulta. Pero kadiyot ra diay ang maong panaghiusa, gawas pa, may grabeng paglutos nga moabotay.