BISAG ang pagpamalaybalay mao gihapon ang pangunang paagi sa mga Saksi ni Jehova sa pagsangyaw, ang paggamit ug nindot nga mga displeyhanag basahon epektibo kaayo sa pagsangyaw sa maayong balita sa Gingharian sa Diyos. (Mat. 24:14) Ang mga igsoon naggamit ug cart, lamesa, ug booth sa pagsangyaw sa publiko. Dugang pa, ang mga kongregasyon sa tibuok kalibotan gisuplayan ug mga 250,000 ka cart. Unsay resulta?

Sa Dar es Salaam, Tanzania, halos 700 ka tawo ang nagpa-Bible study sukad nga gisugdan didto ang special metropolitan public witnessing niadtong 2014. Daghang interesado ang tigtambongan na sa mga tigom ug  mas nasuod sa Diyos. Pinaagi sa maong mga cart, kapig 250,000 ka literatura ang napanagtag ngadto sa mga tawo nga gikan sa mga nasod sa Africa ug sa ubang lugar sulod lang sa usa ka tuig.

Sa Solomon Islands, wala ray 2,000 ka magmamantala ang nagsangyaw sa dako kaayong teritoryo nga may kapig 300 ka isla. Busa, ang special metropolitan public witnessing dakog tabang aron masabwag ang binhi sa kamatuoran. Sa Honiara, ang kaulohan, napanagtag ang kapig 104,000 ka magasin ug kapig 23,600 ka brosyur. Kadaghanan sa nahatagan maoy gikan sa mga isla ug lagyo nga baryo nga walay Saksi. Sa usa lang ka hapon, 400 ka librong Unsay Tinuod nga Gitudlo sa Bibliya? ang napanagtag ug 60 ka tawo ang mihangyog pagtuon ug Bibliya sa balay.

Usa ka buntag, ang mga payunir nga si Michael ug Linda nagbutang ug displeyhanag literatura sa atubangan sa resort sa Margarita Island, Venezuela. Ang lalaking si Aníbal miduol sa cart ug midawat ug librong Gitudlo sa Bibliya. Giingnan niya sila nga ang iyang amahan namatay sa maong lugar pito ka tuig kanhi, ug sukad niadto nagmagul-anon ang iyang inahan. Pagkasunod semana mibalik si Aníbal ug miingon kang Michael ug Linda nga karon ang anibersaryo sa kamatayon sa iyang amahan. Nanawag siya sa iyang mama, ug gihangyo si Michael nga hupayon ni, ug gibuhat kadto ni Michael. Sukad adto, kanunay nang motawag ang mama ni Aníbal kang Michael ug Linda, ug ila siyang basahag makapahupayng teksto. Ang mama ni Aníbal mi-text,  “Karon dili na kaayo ko magul-anon kay inyo kong gihupay ug gitabangan nga molig-on ang akong pagtuo.”

May special metropolitan public witnessing sa 127 ka lokasyon sa 14 ka siyudad sa United States. Sa unang pito ka bulan sa 2015 nga tuig sa pag-alagad, nasugdan ang 8,445 ka pagtuon ug Bibliya. Kini nga paagi sa pagsangyaw nakatabang sab aron makabalik kadtong wala na makigbahin sa matuod nga pagsimba. Pananglitan, gitan-aw sa lalaking si Terry ang usa sa atong mga displeyhanag literatura sa Los Angeles, California, maong gipangutana siya sa magtiayong Saksi kon nakabasa na ba siya sa atong mga publikasyon. Siya miingon nga Saksi ni Jehova siya pero mga upat ka tuig nang dili aktibo. Gibasa ug gihisgotan nila ang Ezequiel 34:11, diin si Jehova nag-ingon: ‘Ako mismo ang mangita sa akong mga karnero ug atimanon ko sila.’ Gisultihan siya bahin sa atong website ug sa JW Broadcasting. Pagkasunod buntag, gi-email ni Terry ang brader, nga nag-ingon nga sa wala pa niya makita ang displeyhanag literatura, nangayo siyag pasaylo sa Diyos sa iyang pagbalewala sa mga tigom sa kongregasyon. Miampo sab siya nga masuod kang Jehova. “Dayon mahigalaon ko ninyong gitimbaya,” miingon siya. “Gibasahan ko ninyog makapadasig nga teksto ug gihatagag impormasyon nga akong gikinahanglan sa pagbalik sa organisasyon ni Jehova. Tubag gyod to sa akong pag-ampo.”

Dihay upat ka special metropolitan public witnessing sa Addis Ababa, Ethiopia. Sa tulo lang ka bulan, ang mga igsoon nakatanyag ug 37,275 ka publikasyon ug 629 ang nagpaduaw sa mga Saksi. Usa sa midawat ug librong Gitudlo sa Bibliya mao ang tigulang nga lalaki kinsa nagbasa dayon niini. Kaniadto, seminarista siya ug may mga pangutana bahin kang Jesus ug sa Gingharian  sa Diyos. Pagkaugma, mibalik siya sa displeyhanag literatura aron matubag ang iyang mga pangutana. Pagkasunod adlaw, nagpa-Bible study siya, ug sa hinapos sa semana, mitambong ug tigom sa unang higayon. Karon, regular na siya sa panagkatigom ug nag-uswag ang espirituwalidad.

 May Hudiyo nga miduol sa displeyhanag literatura sa Mexico ug nangutana sa duha ka brader kon duna ba silay basahon bahin sa kamatayon. Giingnan siya nga hurot na ang magasin bahin sa kamatayon, pero ila siyang gitanyagag basahon bahin sa umaabot. Gigunitan sa lalaki ang bukton sa brader ug miingon: “Di ko interesado sa umaabot. Gusto kong magpakamatay.” Dayon mihilak siya. Gipangutana siya sa brader kon ngano. “Bag-o lang kong namatyag anak,” siya mibakho. Busa gipakita nila ang kapitulo 7 sa librong Gitudlo sa Bibliya. Gibasa nila ang unang duha ka parapo ubos sa sub-ulohang “Sa Dihang Mamatay ang Usa ka Minahal” ug ang kataposan sa kapitulo, diin gipatin-aw ang paglaom sa patay. Kay natandog pag-ayo, gigunitan na pod niya ang bukton sa brader ug nangutana, “Tinuod ba gyod nâ?” Gipasaligan siya sa mga brader nga seguradong tumanon ni Jehova ang maong saad. “Unsay kinahanglan nakong buhaton aron makita pag-usab akong anak?” siya nangutana. Nakigsabot sila nga bisitahon siya sa balay. Pagbisita nila, eksayted kaayo siyang nagpaabot aron tun-an ang Bibliya.

“Gipanalanginan gyod ni Jehova ang maong kahikayan!” miingon ang usa ka nagapanawng magtatan-aw nga nagtabang sa pag-organisar sa special metropolitan public witnessing sa New York. “Epektibo kaayo ni nga paagi aron masangyawan ang linibo ka tawo. Tungod sab ani, nakontak ang daghang dili aktibo ug napalagpot—mga ‘nawalang karnero’—nga karon ginatabangan nga makabalik sa organisasyon.”—Ezeq. 34:15, 16.