Eski i posib pour konn Bondye par son non?

Si ou ti ganny envite pour adres e koz avek en personnaz enportan par son non pa sa ti pou en loner! Souvan bann dimoun enportan dan lasosyete i ganny adrese par bann tit parey “Msye Prezidan” oubyen “Onorab.” Alor si en dimoun dan en pozisyon enportan i dir ou: “Silvouple, apel mwan par mon non,” pa ou ti pou santi ou privilezye!

DAN son Parol Labib, sa vre Bondye i dir nou: “Mwan Zeova. Sa i mon non.” (Izai 42:8) Menm si li osi i annan en kantite tit parey “Kreater,” “Tou pwisan,” ek “Souvren Senyer,” Bondye in toultan donn son bann serviter sa privilez pour apel li par son non.

Par egzanp, en fwa profet Moiz ti konmans enplor Bondye par dir: “Eskiz mwan Zeova.” (Egzod 4:10) Zour ti annan inogirasyon tanp Zerizalenm, Lerwa Salomon ti konmans son lapriyer par dir: “O Zeova.” (1 Lerwa 8:22, 23) Kan profet Izai ti adres Bondye lo la par pep Izrael, i ti dir: “O Zeova, ou, nou Papa.” (Izai 63:16) I kler alor ki nou Papa ki dan lesyel i envit nou pour apel li par son non.

Nou’n vwar ki i enportan pour adres Zeova par son non, me pour vreman konn li par son non i enplik plis ki sa. Konsernan en dimoun ki kontan li e annan konfyans dan li, Zeova i promet: “Mon pou protez li parski i’n arive konn mon non.” (Psonm 91:14) I kler alor ki non Bondye i annan en gran lenportans vi ki i en fakter esansyel pour ganny son proteksyon. Ki ou bezwen fer pour konn Zeova par son non?