Apros avek Bondye

I rod sa ki bon dan nou

1 LERWA 14:13

“ZEOVA pe egzamin tou leker e i konn tou panse ek lentansyon.” (1 Kronik 28:9) Sa parol enspire i merit ranpli nou leker avek lapresyasyon pour sa gran lentere ki Zeova i annan dan nou. Zeova i rod sa ki bon dan nou leker menm si nou enparfe. Sa i evidan dan son parol ki i ti dir konsernan Abiya dan 1 Lerwa 14:13.

Abiya ti sorti dan en move fanmir. Son papa, Lerwa Yarobam, ti sef sa fanmir ki ti’n vir ledo avek Zeova. * Zeova ti deside pour detrir konpletman fanmir Yarobam “zis parey enn i tir malpropte zannimo.” (1 Lerwa 14:10) Me Zeova ti donn lord ki zis Abiya ki ti byen malad ki ti pou ganny en lanterman respektab dan fanmir Yarobam. * Akoz? Bondye i eksplike: “En bon keksoz anver Zeova Bondye Izrael in ganny vwar dan li dan lakaz Yarobam.” (1 Lerwa 14:1, 12, 13) Ki sa parol i dir nou lo Abiya?

Labib pa dir ki Abiya ti en adorater fidel Bondye. Me kantmenm sa, i ti annan en keksoz bon dan li a en serten degre. Sa bon keksoz ti “anver Zeova” e petet i ti annan pour fer avek Son ladorasyon. Serten profeser i sizere ki Abiya ti fer en pelerinaz kot tanp Zerizalenm oubyen i ti tir bann gard ki son papa ti’n met an plas pour anpes bann Izraelit al Zerizalenm.

Menm si nou pa konn egzakteman sa ki Abiya ti fer, sa ki nou konnen se ki sa kalite dan li ti remarkab. Premyerman i ti senser. Sa bon keksoz ti “dan li” setadir i ti dan son leker. Dezyenmman, i ti eksepsyonnel. Abiya ti demontre sa kalite menm si i ti “dan lakaz Yarobam.” En profeser i dir: “Bann zonm ki kontinyen fer bann bon keksoz menm si zot pe viv dan en move landrwa ek fanmir i merit en gran felisitasyon.” En lot i dir ki sa bon keksoz dan Abiya ti “evidan . . . , zis parey bann zetwal i briy plis ler i fer nwanr e bann pye sed i pli zoli ler lezot pye dibwa otour zot napa fye.”

Me sa ki pli enportan se ki sa parol dan 1 Lerwa 14:13 i ansenny nou en zoli keksoz lo Zeova e sa ki i rode dan nou. Mazinen ki en bon keksoz ti ganny “vwar dan” Abiya. I evidan ki Zeova ti egzamin leker Abiya ziska i ti trouv en pti latras sa ki bon dan li. Konpare avek larestan son fanmir, en ekriven ti dir ki Abiya ti parey en perl dan “en ta pti ros.” Zeova ti kontan pour vwar sa bon keksoz dan li e i ti rekonpans li par demontre mizerikord zis anver li dan sa move fanmir.

Pa i rekonfortan pour konnen ki Zeova i rod e apresye sa ki bon dan nou, malgre nou lenperfeksyon? (Psonm 130:3) Lefet ki nou konn sa, sa i devret pous nou pour vin pli pros avek Zeova, sa Bondye ki egzamin nou leker pour rod sa ki bon dan nou, menm si i zis en pti latras.

[Not anba lo paz]