Kwa ki enplike pour konn non Bondye?

ESKI ou non i annan en sinifikasyon? Dan serten parti lemonn, i en koutim pour donn en zanfan en non ki annan en sinifikasyon. Sa non ki ganny swazir i kapab relye avek sa ki sa paran i krwar ladan, son bann valer oubyen son lespwar ek rev ki i annan pour son zanfan a lavenir.

Sa pratik pour donn bann non ki annan bokou sinifikasyon in egziste depi byen lontan. Dan letan Labib, souvan bann dimoun ti ganny donnen bann non ki ti annan en sinifikasyon par deryer. En non ti kapab endik rol ki en dimoun ti pou annan dan son lavi. Par egzanp, kan Zeova ti dir David ki rol son garson ti pou annan a lavenir, I ti dir: “Salomon [sorti dan en mo ki vedir “Lape”] i son non, lape ek trankilite mon pou anmenn lo pep Izrael pandan son renny.”—1 Kronik 22:9.

Parfwa Zeova ti donn en dimoun ki ti pou zwe en nouvo rol, en nouvo non. Madanm Abraam, ki pa ti kapab fer zanfan, ti ganny sa non Sara, ki vedir “Prenses.” Akoz? Zeova ti eksplike: “Mon pou beni li e osi fer li donn ou en garson, mon pou beni li e i pou vin bann nasyon, bann lerwa bann pep pou sorti dan son desandans.” (Zenez 17:16) Pour byen konpran akoz Sara ti ganny en nouvo non, i byen pour konpran ki nouvo rol i ti pou annan.

Me ki nou pou dir lo sa non ki pli enportan ki tou, Zeova? Ki i vedir? Kan Moiz ti demann Bondye konsernan Son non, Zeova ti reponn: “Mon pou vin sa ki mon oule vini.” (Egzod 3:14) Versyon Rotherham i tradwir sa verse koumsa: “Mon pou vin sa ki mon anvi vini.” Non Zeova i revele ki i en Bondye ki annan en kantite rol. Annou pran en legzanp byen senp: Kan en manman pe pran swen avek son bann zanfan, i kapab neseser ki i zwe diferan rol tou le zour. I kapab zwe rol en ners, en kwizinyen, ouswa en ansenyan dapre bezwen son zanfan. I parey avek Zeova, me lo en pli o nivo. Pour li kapab akonplir son plan ki ranpli avek lanmour pour limanite, Zeova i kapab vin sa ki i anvi e zwe nenport rol ki neseser. Konn Zeova par son non i alor enplik konpran e annan en lapresyasyon pour bann rol ki i zwe.

Me malerezman, labote son personnalite i ganny kasyet avek bann ki pa konn li par son non. Par kont kan ou etidye Labib, ou kapab apresye rol ki Zeova i annan konman en Konseye ki saz, en Sover pwisan e Enn ki donn avek zenerozite, zis pour mansyonn detrwa. Sinifikasyon non Zeova i sirman fer nou annan en gran ladmirasyon pour li.

Me kantmenm sa, i pa touzour fasil pour arive konn Bondye par son non. Sa lot lartik pou montre akoz.