Bible no mu no, Greek kasafua a·naʹsta·sis a wɔkyerɛ ase “owusoɛr” no, dza ɔkyerɛ nye “bɔsoɛr” anaa “bɔsoɛr egyina bio.” Sɛ wonyan obi fi owu mu a, mbrɛ ɔtse no ara na ɔbɛyɛ.​—1 Corinthfo 15:12, 13.

 Kasafua owusoɛr mmpue wɔ Hebrew Kyerɛwnsɛm a wɔtaa frɛ no Ahyɛmu Dadaw no mu, naaso ɔka ho asɛm. Dɛ mfatoho no, Nyankopɔn nam nkɔnhyɛnyi Hosea do bɔɔ anohoba dɛ: “Mebɛsa hɔn tsir efi adakamaa no tum nsa; mobɔpon hɔn efi owu nsa.”​—Hosea 13:14; Job 14:13-​15; Isaiah 26:19; Daniel 12:​2, 13.

 Henfa na wobenyan nyimpa ma wɔaatsena? Wobenyan nyimpa binom akɔ sor ma wɔnye Christ eekedzi hen. (2 Corinthfo 5:1; Nyikyerɛ 5:​9, 10) Bible no frɛ iyi “owusoɛr a odzi kan.” Dza ɔkyerɛ nye dɛ owusoɛr fofor bedzi iyi ekyir aba. (Nyikyerɛ 20:6; Philippifo 3:​11) Dɛm owusoɛr yi dze, wobenyan ewufo ma wɔaabɛtsena asaase yi do, na nyimpa pii na wobenyan hɔn.​—Ndwom 37:29.

 Wobesi dɛn enyan ewufo? Nyankopɔn ama Jesus tum a ɔdze benyan ewufo. (John 11:25) Jesus benyan “hɔn a wɔwɔ [nkaa] nda mu nyina” asan aba nkwa mu bio. Ansaana nyimpa no rubowu no, mbrɛ nna no suban tse, biribi a ɔwɔ noho a ɔbɛma akaa no, nye dza nna ɔwɔ n’adwen mu no na wɔdze benyan no. (John 5:​28, 29) Hɔn a wobenyan hɔn akɔ sor no benya sunsum nyimpadua. Na hɔn a wobenyan hɔn aba asaase do no benya honam nyimpadua a bɔn biara nnyi mu.​—Isaiah 33:24; 35:​5, 6; 1 Corinthfo 15:42-​44, 50.

 Woananom na wobenyan hɔn? Bible no ka dɛ “owusoɛr bi bɛba a hɔn a wɔtsen nye hɔn a wɔnntsen so bɔsoɛr.” (Asomafo Ndwuma 24:15) Anokwafo binom tse dɛ Noah, Sarah, nye Abraham ka hɔn a wɔtsen no ho. (Genesis 6:9; Hebrewfo 11:11; James 2:​21) Hɔn a wɔnntsen no nye nyimpa a woenntum ammfa Nyankopɔn ne mbra annyɛ edwuma, osiandɛ woennya hokwan ennsua noho adze.

 Naaso, hɔn a wɔawe ataa do dɛ wobedzi bɔn, na wɔyɛ hɔn hwee a ɔnnkɛyɛ yie no rinnya owusoɛr. Sɛ nyimpa a wɔtse dɛm no wu a, wobenya daa ɔsɛɛ a wonnyi enyidado biara dɛ wɔbɛsan atsena ase bio.​—Matthew 23:33; Hebrewfo 10:26, 27.

 Ebɛn aber na owusoɛr no bɛba? Bible no ma yehu dɛ hɔn a wobenyan hɔn akɔ sor no bɛhyɛ ase wɔ Christ ne ba mu. Iyi hyɛɛ ase wɔ afe 1914. (1 Corinthfo 15:21-​23) Naaso wɔ Jesus Christ ne Mfrenhyia Apem Tumdzi no mu na hɔn a wobenyan hɔn ma wɔaabɛtsena asaase no do no bɛba. Dɛm aber no, wobesiesie asaase no ma aadan paradise.​—Luke 23:43; Nyikyerɛ 20:​6, 12, 13.

 Ebɛnadze ntsi na yebotum agye owusoɛr no edzi? Bible no ka nyimpa baakron bi a wowuwui na wonyaan hɔn no ho asɛm, na nna no mu biara so adasefo wɔ hɔ. (1 Ahemfo 17:17-​24; 2 Ahemfo 4:​32-​37; 13:20, 21; Luke 7:​11-​17; 8:​40-​56; John 11:38-​44; Asomafo Ndwuma 9:​36-​42; Asomafo Ndwuma 20:​7-​12; 1 Corinthfo 15:​3-6) Lazarus no wusoɛr no dze, nna ɔda mu fua osiandɛ nna Lazarus ewu ma oedzi ndaanan. Naaso Jesus nyaan no. Ɔyɛɛ dɛm anwanwadze yi wɔ nyimpa pii hɔn enyim. (John 11:39, 42) Hɔn a nna wɔsoɛr tsia Jesus no mpo anngye dɛm anwanwadze yi ho kyim, dɛm ntsi wɔbɔɔ pɔw dɛ woboku Jesus na Lazarus nyina.—John 11:47, 53; 12:​9-​11.

 Bible no ma yehu dɛ Nyankopɔn wɔ tum a ɔdze bɛma nyimpa asan aba nkwa mu bio, na ɔpɛ paa so dɛ onyan ewufo. Osian tum kɛse a Nyankopɔn wɔ no ntsi, ɔkaa hɔn a ɔpɛ dɛ onyan hɔn ba nkwa mu no nyina, na onyim hɔnho biribiara. (Job 37:23; Matthew 10:30; Luke 20:37, 38) Nyankopɔn botum enyan ewufo asan aba nkwa mu bio, na ɔpɛ paa dɛ ɔbɛyɛ dɛm so! Bble no reka owusoɛr a ɔbɛba no ho asɛm no, ɔkaa faa Nyankopɔn ho dɛ: “Ibenya akɔndɔ wɔ wo nsaano edwuma ho.”​—Job 14:15.

Atorsɛm a ɔfa owusoɛr ho

 Atorsɛm: Ɔkra no a ɔbɛsan abɛhyɛ nyimpadua no mu no na wɔfrɛ no owusoɛr.

 Nokwasɛm: Bible no ka dɛ ɔkra no ɔno ara nye nyimpa no, na ɔnnyɛ biribi a ɔhyɛ nyimpa no mu a ɔnodze ɔkɔ do tsena ase wɔ nyimpa no wu ekyir. (Genesis 2:7; Ezekiel 18:4) Sɛ wonyan obi a, ɔnnyɛ ne kra bi na ɔbɛsan abɛhyɛ no mu, na mbom wɔbɛsan abɔ no fofor dɛ ɔkra tseasefo.

 Atorsɛm: Wobenyan nyimpa binom na wɔaasɛɛ hɔn wɔ hɔ no ara.

 Nokwasɛm: Bible no ka dɛ “hɔn a wɔayɛ dza omuo no” benya “afɔdzi wunyan.” (John 5:​29) Naaso, dza wɔbɛyɛ wɔ hɔn wusoɛr no ekyir na wobegyina do eebu hɔn atsɛn, na nnyɛ dza wɔyɛe ansaana woruwu no bi a. Jesus kaa dɛ: “Ewufo bɛtse Nyankopɔn Ba ne ndze, na hɔn a wɔbɛtse [anaa wobetsie no] no benya nkwa.” (John 5:​25) Dɛm aber no, nyimpa a wobenyan hɔn a wɔdze dza wobosua no bɛyɛ edwuma no, wɔbɛkyerɛw hɔn edzin wɔ “nkwa nwoma no mu.”​—Nyikyerɛ 20:12, 13.

 Atorsɛm: Sɛ wonyan nyimpa no a, ne nyimpadua a ɔdze wui no, dɛmara na ɔdze bɔsoɛr.

 Nokwasɛm: Sɛ obi wu a, ne nyimpadua no porɔw na ɔsɛɛ koraa.​—Ɔsɛnkafo 3:​19, 20.