Estes comentarios son de persoas que están padecendo algunha enfermidade relacionada coa saúde mental. Sénteste identificado con algún deles? Quizais ti ou alguén da túa familia esteades a loitar contra sentimentos parecidos.

Podes ter a seguridade de que non es o único nesta situación. Moitas persoas vense afectadas por problemas relacionados coa saúde mental, sexan seus ou doutros seres queridos.

Non hai dúbida de que vivimos en “tempos críticos e difíciles de soportar”, e isto fai que teñamos moitas preocupacións (2 Timoteo 3:1, TNM). Segundo a Organización Mundial da Saúde (OMS), un estudo calculou que, por todo o mundo, unha de cada oito persoas sofre algunha clase de trastorno mental. Ademais, segundo a OMS, a pandemia da COVID-19 fixo que en 2020 aumentasen nun 26% os casos de ansiedade e nun 28% os trastornos depresivos graves.

É certo que é importante saber cantas persoas sofren ansiedade e depresión, pero máis importante aínda é saber o que podemos facer nós e a nosa familia para sentirnos o mellor posible.

Ter boa saúde mental implica sentirse ben e levar unha vida normal. Isto significa ser capaz de enfrontarse ás preocupacións diarias, de traballar de forma produtiva e de sentirse satisfeito na vida.

• NON É o resultado dunha personalidade débil ou de algo malo que se fixese.

• É un problema de saúde que provoca moita angustia á persoa que o sofre, dificúltalle controlar as emocións, e cambia a súa forma de pensar e de actuar.

• Moitas veces fai que á persoa lle sexa máis difícil relacionarse cos demais.

• Pode afectar a persoas de calquera idade, nivel educativo ou económico, cultura, raza, tribo ou relixión.

Ás veces, unha persoa pode empezar a notar cambios na súa personalidade, a sufrir trastornos no sono ou na alimentación, ou a pasar por períodos longos de estrés, de ansiedade ou de tristeza. Cando isto sucede, poida que a persoa necesite axuda profesional para entender cal é a causa destes cambios e como buscarlles solución. Onde se pode atopar a axuda necesaria?

O home máis sabio da historia, Xesucristo, dixo en certa ocasión: “Non son os sans senón os enfermos os que precisan de médico” (Mateo 9:12). A terapia e a medicación adecuadas poden facer que as persoas con problemas de saúde teñan menos síntomas, e poidan desfrutar dunha vida feliz e produtiva. Se os síntomas son graves ou duran moito tempo, o mellor é non pospoñer o tratamento. a

Aínda que a Biblia non é un libro de medicina, pode axudarnos a coidar da nosa saúde mental. Invitámoste a ler os seguintes artigos que explican como a Biblia pode axudarnos cando pasamos por problemas desta clase.