Yai kele mambu yina bantu mingi ya ke belaka maladi ya kudiyangisa na mabanza tubaka. Keti nge to muntu ya nkaka ya nge ke zolaka mingi me kudiwaka dezia mutindu yai?

Kana yo kele mutindu yina, zaba nde nge kele ve nge mosi. Bantu mingi bubu ke belaka maladi yai, yo vanda bo mosi to bantu ya bo ke zolaka mingi.

Ntembe kele ve nde beto ke zinga “bantangu ya mpasi mpi ya nku” mpi yo ke nata bamaladi mingi. (2 Timoteo 3:1) Rapore ya Kimvuka ya Ke Talaka Mambu ya Sante na Ntoto ya Mvimba (OMS) monisaka nde na ntoto ya mvimba, muntu mosi na kati ya bantu nana ke nwanaka ti maladi yai. Na 2020, maladi ya COVID-19 salaka nde ntalu ya bantu yina ke belaka maladi ya basusi kukuma mingi (26%) kuluta na 2019. Mpi ntalu ya bantu yina ke niokwamaka na mabanza kumaka mingi (28%) kuluta na 2019.

Yo kele mfunu na kuzaba ntalu ya bantu yina ke belaka maladi ya basusi mpi ke niokwamaka na mabanza. Kansi yo kele diaka mfunu mingi na kuzaba mambu ya nge to bantu ya nge ke zolaka mingi lenda sala sambu na kudiwa mbote kibeni.

Kana nge ke niokwama ve na mabanza disongidila nge kele mbote mpi mambu ke kwendila mbote na nitu. Nge lenda nwana ti basusi, kusala kisalu na mutindu ya mbote mpi kuwa ntomo ya luzingu.

• KE TENDULA VE nde nge ke ngolo ve to nde nge salaka kima mosi ya mbi.

• KELE maladi yina ke salaka nde muntu kukuma ti basusi ya mingi mpi yandi kuma kuyindula diaka ve mbote, yandi kudiyala diaka ve mpi yandi kuma bisala-sala.

•   Yo lenda sala nde muntu kukuka ve kusala kinduku ti bantu ya nkaka mpi yandi kuka ve kusala mambu ya yo ke lombaka kusala konso kilumbu sambu na kuzinga.

• Yo lenda baka bantu ya bamvula yonso, ya bampusu ya nitu yonso, ya makanda to ya mabundu yonso, bayina me tangaka to ve, bamvwama to bansukami.

Kana nge to muntu ya nge ke zolaka me kuma kudiwa ve mbote, me kuma kudia to kulala na mpasi, kele ti basusi ya ke mana ve to me kuma mawa-mawa, yo lenda lomba nde nge sosa munganga sambu yandi sadisa nge na kuzaba nki ke kwendila ve.

Yezu Kristu, muntu ya kuluta mayele tubaka nde: “Bantu yina kele na mavimpi ya mbote ke vandaka na mfunu ya munganga ve, kansi bayina kele na maladi bantu ke vandaka na mfunu na yandi.” (Matayo 9:12) Bambefo yina ke sosaka lusadisu ya minganga mpi ke bakaka bankisi ya mbote lenda beluka mpi minganga lenda sadisa bo na kuzinga na kiese. Yo ta vanda mbote na kubaka lusansu nswalu kana nge ke kudiwa mpenza ve mbote mpi yo ke baka ntangu mingi. a

Ata Biblia kele ve mukanda ya minganga, mambu yina yo ke tubaka lenda sadisa beto na kuniokwama ve na mabanza. Beto ke lomba nge na kutadila masolo ya ke landa yina ke tubila mutindu Biblia lenda sadisa beto na kunwana ti maladi ya kuniokwama na mabanza.