Kaka mutindu Nzambi kele mpeve, bawanzio mpi kele bampeve; bo ke monanaka ve mpi bo “ke vandaka ve ti nsuni mpi mikwa.” Bawanzio ya mbote ke vandaka na zulu mpi bo ke vandaka ti nswa ya kumonana na ntwala ya Nzambi.—Luka 24:39; Matayo 18:10; Yoane 4:24.

Bantangu ya nkaka, bawanzio vandaka kumonana ti nitu ya bantu sambu na kulungisa na ntoto mikumba yina Nzambi vandaka kupesa bo mpi na nima ya kulungisa yo, bo vandaka kulwata diaka nitu ya kimpeve.—Bazuzi 6:11-23; 13:15-20.

Ata Biblia ke monisaka bawanzio bonso babakala mpi ntangu bo ke bakaka nitu ya kimuntu bo ke monanaka ntangu yonso bonso babakala, kele ve ti bawanzio ya babakala to ya bankento. Bo ke kwelaka ve mpi bo ke butaka ve bana ya bawanzio. Diaka, bawanzio butukaka ntete ve na ntoto bonso bantu—yo vanda bonso babebe, bana, to bambuta. Yehowa muntu gangaka bawanzio, yo yina Biblia ke bingaka bo “bana ya Nzambi ya kieleka.”—Yobi 1:6; Nkunga 148:2, 5.

Biblia ke tubilaka “bandinga ya bantu mpi ya bawanzio.” Diambu yai ke monisa nde bigangwa ya kimpeve ke vandaka na ndinga mpi ke tubaka. Ata Nzambi me sadilaka bawanzio sambu na kusolula ti bantu, yandi ke pesaka beto ve nswa ya kusamba to ya kusambila bo.—1 Bakorinto 13:1; Kusonga 22:8, 9.

Bawanzio kele bamiriade ya bamiriade, ziku bo kele bamiliare. *—Daniele 7:10; Kusonga 5:11.

Bawanzio kele mayele mpi “ngolo mingi kibeni” kuluta bantu. Ya kieleka, bo lenda tambula nswalu kibeni, mpi kukwenda ntama kibeni kuluta bandilu ya ntoto.—Nkunga 103:20; Daniele 9:20-23.

Ata bawanzio kele ti mayele mingi mpi ngolo mingi ya kimpeve, bo ke vandaka ti bandilu, mpi bo me zaba ve mambu ya nkaka.—Matayo 24:36; 1 Piere 1:12.

Nzambi gangaka bawanzio ti kimuntu, bikalulu ya yandi ke zolaka, mpi kimpwanza ya kupona. Diaka, bonso bantu bo lenda pona kusala mambu ya mbote to ya mbi. Diambu ya mawa kele nde bawanzio ya nkaka ponaka na kukolama na Nzambi.—Yude 6.