GĨCIGO GĨA 4
Ũrĩa Mũngĩhũthĩra Mbeca Wega
“Ũndũ o wothe ũgĩthugundwo ũrũmagio na kũrĩĩrũo kĩrĩra.”
Ithuothe nĩ tũbataraga mbeca nĩguo tũhingĩrie famĩlĩ citũ maũndũ marĩa irabatara. (Thimo 30:8) Makĩria ma ũguo, ‘mbia nĩ mwĩgito.’ (Kohelethu 7:12) No ũkorũo ũrĩ ũndũ mũritũ kwarĩrĩria maũndũ ma mbeca hamwe na mũthuri kana mũtumia waku, no ndũkanetĩkĩrie mbeca ikorũo nĩcio kĩhumo kĩa mathĩna thĩinĩ wa kĩhiko kĩanyu. (Aefeso 4:32) Mwĩhokanagei hĩndĩ ĩrĩa mũraarĩrĩria mũigana wa mbeca iria mũkũhũthĩra.
1 GĨAI NA MŨBANGO MWEGA
ŨRĨA BIBILIA YUGAGA: “Nĩ mũndũ ũrĩkũ wanyu, akĩenda gwaka nyũmba ndaya na igũrũ, ũtangĩamba gũikara thĩ, agatare mbia iria cia kũmĩakithia, amenye kana arĩ na cia kũigana cia kũmĩrĩkia?” (Luka 14:28) Nĩ wega mũbange mũrĩ hamwe ũrĩa mũrĩhũthagĩra mbeca cianyu. (Amosi 3:3) Tuai nĩ kĩĩ mũrabatara kũgũra na nĩ mbeca cigana mũngĩona cia kĩndũ kĩu. (Thimo 31:16) Gũkorũo atĩ mũrĩ na mbeca cingĩgũra kĩndũ kĩna ti kuuga no mũhaka mũkĩgũre. Geriai gwĩthema thiirĩ. Hũthĩrai o mbeca iria mwĩ nacio.
ŨRĨA ŨNGĨKA:
-
Angĩkorũo nĩ mwatigia mbeca mũthia-inĩ wa mweri, arĩrĩriai mũrĩ hamwe ũrĩa mũgwĩka nacio
-
Mahũthĩro mangĩkĩra mbeca cianyu, bangai ũrĩa mũkũnyihanyihia mahũthĩro manyu. Kwa ngerekano, ithenya rĩa kũgũra irio mũkawa-inĩ, no mũrugage mũciĩ
2 KORŨO ŨRĨ MWĨHOKEKU NA ŨGĨE NA MAWONI MAAGĨRĨRU
ŨRĨA BIBILIA YUGAGA: “Tũgeragia gũthugunda maũndũ o marĩa mangĩonwo maagĩrĩire nĩ Mwathani, na towe wiki o na monwo marĩ maagĩrĩru nĩ andũ o nao.” (2 Akorintho 8:21) Umĩraniai ngoro ũhoro-inĩ wĩgiĩ mbeca iria muonaga na iria mũhũthagĩra.
Hĩndĩ ciothe aranagĩria na mũthuri kana mũtumia waku rĩrĩa ũratua matua maritũ megiĩ mbeca. (Thimo 13:10) Kwaranĩria wega maũndũ-inĩ megiĩ mbeca nĩ gũgũtũũria thayũ thĩinĩ wa kĩhiko kĩanyu. Ririkanaga atĩ mbeca iria wonaga nĩ cia famĩlĩ yaku, no ti ciaku ũrĩ wiki.
ŨRĨA ŨNGĨKA:
-
Iguithanĩriai nĩ mbeca cigana o ũmwe wanyu angĩhũthĩra ategũtinda akĩũria ũrĩa ũngĩ
-
Mũtigeterere nginya rĩrĩa mathĩna mariumĩra nĩguo mwarĩrĩrie ũhoro wa mbeca