Філіпіліктерге 3:1—21
3 Ал енді, бауырластарым, Иемізге шаттанып қуана беріңдер+. Бір нәрсені қайталап жазу мен үшін қиын емес, өйткені бұл сендерді қорғайды.
2 Арам адамдардан*, зияндық жасаушылардан және сүндеттелу рәсімін жақтаушылардан сақтаныңдар+!
3 Нағыз сүндеттелгендер+ — біздерміз, өйткені біз Құдай рухымен қасиетті қызмет атқарамыз, Мәсіх Исаны мақтан етеміз+ және өзімізге* сүйенбейміз.
4 Өзіне сүйенуге кімде толық негіз бар болса, сол — менмін.
Егер біреу өзіне сүйенуге негіз бар деп есептесе, менде онікінен де көп негіз бар:
5 мен сегізінші күні сүндеттелгенмін+, Исраил халқының бениямин руынан шыққанмын, еврейден туған таза евреймін+; заңды ұстануға келгенде, парызшыл болғанмын+,
6 құлшыныс танытуға келгенде, қауымды қудалаушы+, ал заңға сай әділ болуға келгенде, мінсіз болдым.
7 Бірақ кезінде өзім жетістік деп санағанның бәрін енді түкке тұрғысыз деп есептеймін*. Мұны Мәсіх үшін істедім+.
8 Иә, Ием Мәсіх Иса туралы аса құнды білім үшін мен бәрінен де бас тарттым. Мәсіх үшін бәрінен айырылдым, әрі оларды түкке тұрғысыз қоқыс санаймын. Осылайша онымен тығыз қарым-қатынаста
9 және бірлікте боламын. Бұған Заңды орындау арқылы әділ болғанымның емес, Мәсіхке сенгенімнің арқасында+ Құдайдан келген әділдік арқылы ие боламын+.
10 Менің мақсатым — Мәсіхті танып-білу, оның қайта тірілуінің құдіретін түсіну+ және сонікіндей өлімді қабылдап+, оның азаптарына ортақтасу+,
11 сондай-ақ өлімнен бірінші болып қайта тірілетіндердің арасында болу мүмкін болса, соған ұмтылу+.
12 Мен сыйымды алып қойдым не кемелділікке жеттім демеймін, бірақ Мәсіх Иса мені не үшін таңдаған болса+, мен де соны иемденемін бе, жоқ па — соны көрейін деп ұмтылудамын+.
13 Бауырластар, мен оны иемдендім деп есептемеймін, бірақ мынаны сеніммен айта аламын: өткенді ұмыт қалдырып+, алдағы нәрселерге ұмтылудамын+,
14 Құдайдың сыйына, яғни Мәсіх Иса арқылы шақырған көктегі өмірге+ жетуді мақсат етіп, жүгіріп келемін+.
15 Сондықтан арамызда кім рухани толысқан болса+, осылай ойласын. Ал қандай да бір нәрсе жайында басқа пікірде болсаңдар, Құдай сендерге мұны да ашады.
16 Алайда неге қол жеткізсек, сол бағыттан ауытқымай өмір сүре берейік.
17 Бауырластар, бәрің маған еліктеңдер+, біздің үлгімізге еліктеп жүргендерге де назар салыңдар.
18 Себебі көп адам Мәсіхтің азап бағанасының* жауындай әрекет етуде. Мен олар туралы көп рет айтқанмын, ал қазір көз жасымды төгіп айтып отырмын.
19 Олардың ақыры — өлім, құдайлары — өз қарны, ал мақтаныштары — ұятсыз істері. Олар осы дүниелік нәрселерді ғана ойлайды+.
20 Ал біздің отанымыз+ көкте*+. Біз сол жердегі құтқарушы Иеміз Иса Мәсіхті асыға күтудеміз+.
21 Ол барлығын өзіне бағындыруға+ қабілет беретін құдіретті күшімен біздің бейшара күйдегі денемізді өзінікі іспетті салтанатты денеге айналдырады+.
Сілтемелер
^ Сөзбе-сөз “Иттерден”.
^ Немесе “тәндік нәрселерге”.
^ Мүмкін: “Бірақ кезінде жетістік деп санағандарымның бәрінен өз еркіммен бас тарттым”.
^ Түсіндірмені қараңыз.
^ Немесе “біз көктің азаматтарымыз”.
