ទីបញ្ចប់នៃទុក្ខវេទនាជិតមកដល់ហើយ!
ទីបញ្ចប់នៃទុក្ខវេទនាជិតមកដល់ហើយ!
សូមស្រមៃថាលោកអ្នកកំពុងរស់នៅក្នុងពិភពលោកមួយដែលគ្មានទុក្ខវេទនា ពោលគឺពិភពលោកដែលគ្មានឧក្រិដ្ឋកម្ម សង្គ្រាម ជំងឺ និងមហន្តរាយធម្មជាតិ។ សូមគិតទៅមើល តើលោកអ្នកនឹងមានអារម្មណ៍យ៉ាងណា បើជារៀងរាល់ព្រឹកពេលលោកអ្នកភ្ញាក់ឡើង គ្មានការព្រួយបារម្ភអំពីការគ្មានស្ថិរភាពខាងសេដ្ឋកិច្ច ការរើសអើង ឬការជិះជាន់ណាទៀត? ប៉ុន្តែ តើលោកអ្នកគិតថារឿងទាំងអស់ស្ដាប់ទៅមិនអាចកើតឡើងបានទេឬ? ការពិត គ្មានមនុស្សជាតិណាម្នាក់ ឬអង្គការណាមួយរបស់មនុស្សអាចធ្វើឲ្យមានស្ថានភាពបែបនោះបានទេ។ ប៉ុន្តែ ព្រះបានសន្យាថានឹងបំផ្លាញចោលដើមហេតុទាំងអស់ដែលបណ្ដាលឲ្យមនុស្សរងទុក្ខវេទនា រួមទាំងដើមហេតុដែលយើងបានពិគ្រោះនៅអត្ថបទមុន។ សូមកត់សម្គាល់សេចក្ដីសន្យាទាំងប៉ុន្មានក្នុងគម្ពីរដែលជាបណ្ដាំរបស់ព្រះ មានដូចតទៅ:
◼ នឹងមានការគ្រប់គ្រងល្អ
«ព្រះនៃស្ថានសួគ៌ទ្រង់នឹងតាំងនគរ១ឡើង ដែលមិនត្រូវបំផ្លាញឡើយ ហើយអំណាចហ្លួងក៏មិនត្រូវផ្ទេរដល់សាសន៍ដទៃណាដែរ គឺនឹងបំបាក់បំបែក ហើយលេបបំបាត់នគរទាំងនោះវិញ នគរនោះនឹងស្ថិតស្ថេរនៅអស់កល្បជានិច្ច»។—ដានីយ៉ែល ២:៤៤
នគរឬរាជាណាចក្ររបស់ព្រះគឺជារដ្ឋាភិបាលនៅស្ថានសួគ៌។ ព្រះបានជ្រើសរើសលោកយេស៊ូគ្រិស្តឲ្យធ្វើជាអ្នកគ្រប់គ្រង។ លោកយេស៊ូនឹងគ្រប់គ្រងជំនួសការគ្រប់គ្រងទាំងអស់របស់មនុស្សជាតិ។ លោកនឹងមិនគ្រាន់តែធ្វើឲ្យបំណងប្រាថ្នារបស់ព្រះបានសម្រេចនៅស្ថានសួគ៌ប៉ុណ្ណោះទេ តែលោកក៏នឹងធ្វើឲ្យសម្រេចនៅផែនដីដែរ។ (ម៉ាថាយ ៦:៩, ១០) រដ្ឋាភិបាលនេះនឹងមិនជំនួសដោយការគ្រប់គ្រងរបស់មនុស្សជាតិណាមួយទេ ពីព្រោះរដ្ឋាភិបាលនេះជា«រាជាណាចក្រដែលស្ថិតស្ថេរជានិរន្តរ៍របស់លោកយេស៊ូគ្រិស្ត ដែលជាអ្នកសង្គ្រោះនិងជាម្ចាស់របស់យើង»។ នេះច្បាស់ជានឹងនាំឲ្យមានសន្ដិភាពជារៀងរហូត។—ពេត្រុសទី២ ១:១១
◼ នឹងគ្មានសាសនាមិនពិតទៀត
«សាថានចេះតែក្លែងខ្លួនជាទេវតានៃពន្លឺ។ ដូច្នេះ មិនមែនជាការអស្ចារ្យទេ ដែលអ្នកបម្រើរបស់វាក៏ចេះតែក្លែងខ្លួនជាអ្នកបម្រើនៃសេចក្ដីសុចរិតដែរ។ ប៉ុន្តែទីបញ្ចប់របស់ពួកគេនឹងសមនឹងការដែលពួកគេបានធ្វើ»។
សាសនាមិនពិតនឹងត្រូវបកអាក្រាតឲ្យឃើញថាជាស្នាដៃរបស់មេកំណាច ហើយនឹងត្រូវបំផ្លាញពីផែនដី។ ការរើសអើងនិងការបង្ហូរឈាមក្នុងនាមសាសនានឹងលែងមានទៀត។ នេះនឹងឲ្យអស់អ្នកដែលស្រឡាញ់«ព្រះដ៏ពិតនិងជាព្រះដែលមានជីវិតរស់នៅ»គោរពប្រណិប័តន៍លោកដោយមាន«ជំនឿតែមួយ»។ នោះក៏នឹងឲ្យពួកគេគោរពប្រណិប័តន៍លោក«ដោយមានការដឹកនាំពីសកម្មពលរបស់លោកនិងដោយសេចក្ដីពិត»។ នេះពិតជាសេចក្ដីសុខសាន្តនិងសាមគ្គីភាពមែន!—ថែស្សាឡូនិចទី១ ១:៩; អេភេសូរ ៤:៥; យ៉ូហាន ៤:២៣
◼ នឹងធ្វើឲ្យមនុស្សទៅជាល្អឥតខ្ចោះ
«ព្រះនឹងនៅជាមួយនឹងពួកគេដោយខ្លួនលោកផ្ទាល់។ លោកនឹងជូតអស់ទាំងទឹកភ្នែកចេញពីភ្នែករបស់ពួកគេ ហើយសេចក្ដីស្លាប់នឹងលែងមានទៀត ទុក្ខព្រួយ ការស្រែកយំ និងការឈឺចាប់ក៏នឹងលែងមានទៀតដែរ។ អ្វីៗដែលធ្លាប់កើតឡើងពីមុន នោះបានកន្លងបាត់អស់ហើយ»។—ការបើកបង្ហាញ ២១:៣, ៤
ព្រះយេហូវ៉ាធ្វើឲ្យការទាំងនេះកើតឡើងតាមរយៈលោកយេស៊ូជាបុត្ររបស់លោក ដែលបានផ្ដល់ជីវិតដើម្បីមនុស្សជាតិក្នុងពិភពលោក។ (យ៉ូហាន ៣:១៦) ក្រោមការដឹកនាំរបស់លោកយេស៊ូ មនុស្សជាតិនឹងមានភាពល្អឥតខ្ចោះ។ ទុក្ខវេទនានឹងលែងមានទៀត ពីព្រោះ«ព្រះនឹងនៅជាមួយនឹងពួកគេដោយខ្លួនលោកផ្ទាល់» ហើយលោកនឹងជូត«អស់ទាំងទឹកភ្នែកចេញពីភ្នែករបស់ពួកគេ»។ ឆាប់ៗខាងមុខនេះ ភាពមិនល្អឥតខ្ចោះហើយទុក្ខវេទនារបស់មនុស្សជាតិនឹងកន្លងបាត់អស់ ដូចបទគម្ពីរចែងថា៖ «ពួកអ្នកសុចរិតនឹងបានស្រុកទុកជាមរដក ហើយនឹងនៅក្នុងស្រុកនោះជានិច្ច»។—ទំនុកតម្កើង ៣៧:២៩
◼ នឹងគ្មានពួកវិញ្ញាណកំណាចទៀត
«ទេវតានោះ[យេស៊ូគ្រិស្ត]ចាប់នាគ ជាពស់ដំបូងបង្អស់ ដែលជាមេកំណាចនិងជាសាថាន រួចបានចងវាទុកអស់មួយពាន់ឆ្នាំ។ ទេវតានោះបោះវាទៅក្នុងទីជ្រៅបំផុត រួចបិទជិត ហើយបិទត្រាលើទីជ្រៅបំផុតដើម្បីឃុំវា មិនឲ្យបំភាន់ប្រជាជាតិនានាទៀត»។—ការបើកបង្ហាញ ២០:២, ៣
ឥទ្ធិពលទាំងអស់របស់សាថាននឹងលែងមានទៀត ពេលដែលសាថាននិងពួកវិញ្ញាណកំណាចបានត្រូវចងទុកនិងបោះទៅក្នុង«ទីជ្រៅបំផុត» ជាស្ថានភាពមួយដែលលែងមានសកម្មភាពទាំងអស់។ ពួកវានឹងមិនអាចកាន់កាប់ទៅលើមនុស្សជាតិដើម្បីសម្រេចបំណងដ៏អាក្រក់របស់ពួកវាទៀតទេ។ យើងពិតជានឹងមានអារម្មណ៍ធូរស្រាលណាស់! ពេលរស់នៅក្នុងពិភពលោកមួយដែលគ្មានឥទ្ធិពលពីសាថាននិងពួកវិញ្ញាណអាក្រក់។
◼ «គ្រាចុងក្រោយបង្អស់»នឹងចប់
«គ្រាចុងក្រោយបង្អស់»នឹងត្រូវបញ្ចប់ដោយអ្វីដែលលោកយេស៊ូបានហៅថា«ទុក្ខវេទនាជាខ្លាំង»។ លោកបានមានប្រសាសន៍ថា៖ «នឹងមានទុក្ខវេទនាជាខ្លាំង ដែលមិនធ្លាប់មានតាំងពីកំណើតពិភពលោករហូតដល់ឥឡូវនេះ ហើយក៏នឹងមិនមានដូច្នោះទៀតឡើយ»។—ម៉ាថាយ ២៤:២១
ទុក្ខវេទនានេះគឺខ្លាំងដោយសារនឹងមានអន្តរាយកើតឡើងដែលមិនធ្លាប់មានពីមុនមកទេ។ នេះនឹងនាំមកដល់ទីផ្ដាច់ព្រ័ត្រនៅ«សង្គ្រាមដែលនឹងកើតឡើងនៅថ្ងៃដ៏ធំរបស់ព្រះដែលមានឫទ្ធានុភាពខ្លាំងក្លាបំផុត»ដែលគេស្គាល់ថា«ហាម៉ាគេដូន»។—ការបើកបង្ហាញ ១៦:១៤, ១៦
មនុស្សគ្រប់ទីកន្លែងដែលស្រឡាញ់សេចក្ដីសុចរិតទន្ទឹងចាំទីបញ្ចប់នៃរបៀបរបបពិភពលោកដ៏អាក្រក់នេះ។ សូមពិចារណាពរមួយចំនួនដែលពួកគេនឹងទទួលនៅក្រោមការគ្រប់គ្រងនៃរាជាណាចក្ររបស់ព្រះ។
ព្រះនឹងធ្វើច្រើនជាងនោះទៅទៀត!
«មនុស្សមួយក្រុមធំ»នឹងរួចជីវិតចូលទៅក្នុងពិភពលោកថ្មីដែលមានតែសេចក្ដីសុខសាន្ត: បណ្ដាំរបស់ព្រះចែងថា«មនុស្សមួយក្រុមធំ»ដែលមិនអាចរាប់ចំនួនបាន នឹង«ចេញផុតពីគ្រាទុក្ខវេទនាដ៏ខ្លាំង»ហើយរួចជីវិតចូលទៅក្នុងពិភពលោកថ្មីដ៏សុចរិត។ (ការបើកបង្ហាញ ៧:៩, ១០, ១៤; ពេត្រុសទី២ ៣:១៣) ពួកគេនឹងទទួលសេចក្ដីសង្គ្រោះតាមរយៈលោកយេស៊ូគ្រិស្តដែលជា«កូនចៀមរបស់ព្រះ ដែលដកយកភាពខុសឆ្គងរបស់ពិភពលោកចេញ»។—យ៉ូហាន ១:២៩
ការអប់រំពីព្រះនឹងផ្ដល់ប្រយោជន៍ដ៏អស្ចារ្យ: ក្នុងពិភពលោកថ្មី«គ្រប់ទាំងអស់នឹងស្គាល់ព្រះយេហូវ៉ា នៅពេញពាសលើផែនដី»។ (អេសាយ ១១:៩) ការអប់រំពីព្រះនឹងរួមបញ្ចូលការណែនាំអំពីរបៀបរស់នៅដោយសុខសាន្តជាមួយមនុស្សទាំងអស់ និងការថែរក្សាបរិស្ថានធម្មជាតិ។ ព្រះសន្យាថា៖ «អញនេះ គឺយេហូវ៉ា ជាព្រះនៃឯង ជាអ្នកដែលបង្រៀនឲ្យឯងបានទទួលប្រយោជន៍ ហើយក៏នាំឯងទៅក្នុងផ្លូវដែលឯងគួរដើរ»។—អេសាយ ៤៨:១៧
មនុស្សជាទីស្រឡាញ់នឹងត្រូវប្រោសឲ្យរស់ឡើងវិញ: កាលលោកយេស៊ូនៅផែនដី លោកបានប្រោសឡាសាជាមិត្តសម្លាញ់របស់លោកឲ្យរស់ពីស្លាប់ឡើងវិញ។ (យ៉ូហាន ១១:១, ៥, ៣៨-៤៤) ដូច្នេះហើយ លោកយេស៊ូបានបង្ហាញនូវអ្វីដែលលោកនឹងធ្វើដល់កម្រិតមួយធំជាង ក្រោមការគ្រប់គ្រងនៃរាជាណាចក្ររបស់ព្រះ។—យ៉ូហាន ៥:២៨, ២៩
សេចក្ដីសុខសាន្តហើយសេចក្ដីសុចរិតនឹងមានជារៀងរហូត: ក្រោមការគ្រប់គ្រងរបស់គ្រិស្ត ពួកអ្នកប្រឆាំងច្បាប់នឹងលែងមានទៀត។ តើយើងដឹងយ៉ាងដូចម្ដេច? ពីព្រោះលោកយេស៊ូអាចមើលឃើញចិត្តរបស់ពួកគេ ហើយលោកនឹងប្រើសមត្ថភាពនេះដើម្បីដឹងថាអ្នកណាជាមនុស្សសុចរិតនិងជាមនុស្សទុច្ចរិត។ អស់អ្នកដែលមិនព្រមកែប្រែរបៀបរស់នៅដ៏អាក្រក់របស់ខ្លួននឹងមិនត្រូវអនុញ្ញាតឲ្យរស់នៅក្នុងពិភពលោកថ្មីរបស់ព្រះឡើយ។—ទំនុកតម្កើង ៣៧:៩, ១០; អេសាយ ១១:៣, ៤; ៦៥:២០; ម៉ាថាយ ៩:៤
យើងទើបតែបានពិចារណាទំនាយពីរបីក្នុងចំណោមទំនាយជាច្រើនដែលមានក្នុងគម្ពីរ។ ទំនាយទាំងនោះបញ្ជាក់ពីជាគ្រាដ៏អស្ចារ្យដែលនឹងមកដល់។ ពេលរាជាណាចក្ររបស់ព្រះគ្រប់គ្រងមកលើផែនដី«សេចក្ដីក្សេមក្សាន្តដ៏បរិបូរ»នឹងមានជារៀងរហូត។ (ទំនុកតម្កើង ៣៧:១១, ២៩) ដើមហេតុទាំងអស់ដែលបណ្ដាលឲ្យមនុស្សជាតិឈឺចាប់និងរងទុក្ខវេទនានឹងត្រូវបញ្ចប់។ យើងអាចជឿការទាំងនេះបាន ដោយសារព្រះសន្យាថា៖ «មើល! ខ្ញុំកំពុងធ្វើអ្វីៗទាំងអស់ថ្មី . . . ពាក្យទាំងនេះគួរឲ្យទុកចិត្ត ហើយក៏ពិតត្រង់»។—ការបើកបង្ហាញ ២១:៥
[រូបភាពនៅទំព័រ៦]
