Yobu 33:1-33
33 “Kaakano Yobu, wulira ebigambo byange;Wuliriza byonna bye ŋŋamba.
2 Laba! Nteekwa okwasamya akamwa kange;Olulimi lwange luteekwa okwogera.
3 Ebigambo byange birangirira obugolokofu bw’omutima gwange,+N’emimwa gyange gyogera mu bwesimbu bye mmanyi.
4 Omwoyo gwa Katonda gwe gwantonda,+Era omukka gw’Omuyinza w’Ebintu Byonna gwampa obulamu.+
5 Nziraamu bw’oba ng’osobola;Yanja ensonga zo mu maaso gange; weeteeketeeke okuwoza.
6 Laba! Nze nninga ggwe mu maaso ga Katonda;Nange nnabumbibwa mu ttaka.+
7 N’olwekyo tontya,Ebigambo byange tebijja kukuzitoowerera.
8 Mazima oyogedde nga mpulira,Mpulidde ng’ogamba nti,
9 ‘Ndi mulongoofu, tewali kibi kye nnakola;+Ndi mulongoofu, sirina nsobi gye nnakola.+
10 Naye Katonda afuna ensonga kw’asinziira okunziyiza;Antwala ng’omulabe we.+
11 Ateeka ebigere byange mu nvuba;Yekkaanya amakubo gange gonna.’+
12 Naye toli mutuufu kwogera bw’otyo, n’olwekyo ka nkuddemu:
Katonda asukkulumye ku bantu.+
13 Lwaki omwemulugunyaako?+
Olw’okuba tazzeemu bigambo byo byonna?+
14 Katonda ayogera enfunda n’enfunda,Naye tewali assaayo omwoyo,
15 Mu kirooto, mu kwolesebwa okw’ekiro,+Ng’abantu bali mu tulo otungi,Nga beebase ku bitanda byabwe.
16 Aggula amatu gaabwe,+N’awandiika by’abayigiriza mu mitima gyabwe,
17 Asobole okuggya omuntu ku bikolwa ebibi+Era amuziyize okuba n’amalala.+
18 Katonda amuwonya okukka mu kinnya,*+N’okuttibwa n’ekitala.*
19 Era obulumi omuntu bw’aba nabwo ng’ali ku kitanda kye,N’okulumwa amagumba buli kiseera, bimukangavvula,
20 Ne yeetamwa* emmere,N’agaana n’okulya emmere ewooma.+
21 Omubiri gumuggwaako,Amagumba agataalabikanga ne gakukunala.
22 Asemberera ekinnya,*Obulamu bwe busemberera abo abaagala okumutta.
23 Naye bw’afuna omubaka,*Amuwolereza omu mu lukumi,Okutegeeza omuntu ekituufu,
24 Katonda amukwatirwa ekisa n’agamba nti,‘Muwonye okukka mu kinnya!*+
Nzudde ekinunulo!+
25 Omubiri gwe ka gudde buggya okusinga bwe gwali ng’akyali muvubuka;+Era k’abe n’amaanyi nga bwe yali mu buvubuka.’+
26 Ajja kwegayirira Katonda+ amusaasire,Ajja kujaganya ng’alabye amaaso ga Katonda,Era Katonda obutuukirivu bwe ajja kuddamu abuwe omuntu.
27 Omuntu oyo aligamba abantu nti,‘Nnayonoona+ ne nkola ekitali kituufu,Naye saafuna ekyo ekyali kiŋŋwanira.*
28 Annunudde ne sikka mu kinnya,*+Era ndiraba ekitangaala.’
29 Mu butuufu ebintu ebyo byonna Katonda abikolera omuntuEnfunda n’enfunda,
30 Okumuggya mu kinnya,*Ayakirwe ekitangaala eky’obulamu.+
31 Ssaayo omwoyo Yobu! Mpuliriza!
Sirika nneeyongere okwogera.
32 Bw’oba olina ky’ogamba, kiŋŋambe.
Yogera kubanga njagala kukakasa obanga oli mutuufu.
33 Bw’oba tolina kya kwogera, mpuliriza;Sirika nkuyigirize ebintu eby’amagezi.”
Obugambo Obuli Wansi
^ Oba, “n’eky’okulwanyisa.”
^ Oba, “ntaana.”
^ Obut., “Obulamu bwe ne bwetamwa.”
^ Oba, “entaana.”
^ Oba, “malayika.”
^ Oba, “ntaana.”
^ Era kiyinza okuvvuunulwa, “Era tekyangasa.”
^ Oba, “ntaana.”
^ Oba, “ntaana.”