KWÕJ ke bwilõñ kõn kajjitõk in? Jet armej rej bwilõñ kõn kajjitõk in kõnke ekkar ñan tõmak ko aer, Anij ejjab nana im lãj. Bõtab, elukkuun lõñ armej ro rainin rej l̦õmn̦ak bwe Anij elãj. Etke?

Jet ro me rar el̦l̦ã im mour jãn jorrããn ko ãinwõt m̦akũtkũt lal̦, taibuun ak l̦añ ko rel̦l̦ap, im men ko ãierl̦o̦kwõt rej kajjitõk: “Etke Anij ej kõtl̦o̦k bwe men kein ren wal̦o̦k? Ejjel̦o̦k an kea kõn kõj ke? Ke ta, ej ke wal̦o̦k men kein kõnke Anij enana im lãj?”

Ro jet rej bar inepata ñe rej riiti bwebwenato ko ilo Baibõl̦ ãinwõt bwebwenatoon Ibwijleplep eo ilo tõre ko an Noa. Armej rein rej l̦õmn̦ak ippãer make im ba, ‘El̦aññe el̦ap yokwe ippãn Anij, etke ear m̦an aolep armej ro ilo tõre eo? E ke juon Anij enana im lãj?’

Kwõnañin ke baj l̦õmn̦ak ippam̦ make kõn kajjitõk kein? Ñe juon en kar kwal̦o̦k kajjitõk kein ñan kwe, enaaj ke kar pen am̦ uwaake? Eokwe, jen etale bar juon kajjitõk me emaroñ jipañ kõj.

Jedike nana im lãj kõnke jejel̦ã oktak eo ikõtaan men ko rem̦m̦an im men ko renana. El̦ap ad oktak jãn menninmour ko. Ri Kõm̦anm̦an eo ad ear kõm̦anm̦an kõj “ilo wãween wõt E.” (Jenesis 1:27) Mel̦el̦ein men in bwe ear letok ñan kõj maroñ eo ñan anõke wãween ko rem̦m̦an ippãn, ãinwõt yokwe im men ko ãierl̦o̦kwõt. Ear bar letok ñan kõj maroñ eo ñan kile im jel̦ã ta ko rem̦m̦an im ta ko renana. L̦õmn̦ak m̦õk kõn men in: El̦aññe el̦ap ad dike nana im lãj, mel̦el̦ein bwe el̦apl̦o̦k an Anij diki men kein.

Baibõl̦ ej kam̦ool bwe el̦apl̦o̦k an Anij dike nana im lãj. Ej ba: “Kõm̦m̦an ko aõ im l̦õmn̦ak ko aõ reutiej jãn ko ami.” (Aiseia 55:9, UBS) Ñe jej ba bwe Anij elãj, mel̦el̦ein men in bwe jej ukot ta eo eoon in ej ba. Enaaj kar ejjel̦o̦k oktak ñe jej ba bwe kõm̦m̦an im l̦õmn̦ak ko ad reutiejl̦o̦k jãn ko an Anij. M̦okta jãn ad kajju l̦õmn̦ak im ba bwe Anij elãj, enaaj kar em̦m̦an ñe ewõr kein kam̦ool ñan naan ko ad. Ijello̦kun ad l̦õmn̦ak bwe Anij enana im lãj, jen etale etke jet iaan kõm̦m̦an ko an remaroñ kõm̦m̦an ad l̦õmn̦ak bwe enana im lãj. Ñan jipañ kõj kõm̦m̦ane men in, jen lale ta mel̦el̦ein ñe juon “enana im lãj.”

Jemaroñ kile el̦aññe juon armej enana im lãj kõn unin kõm̦m̦an ko an. Juon armej me enana im lãj ej juon eo im em̦õn̦õn̦õ in loe an ro jet eñtaan im ejjab kea ñe rej jorrããn. Ñan waanjoñak, jen ba bwe ewõr juon em̦m̦aan me ej kauwe l̦addik eo nejin kõnke ekõn̦aan wõt kõmetak im kabũrom̦õj ajri eo. Jemaroñ ke ba bwe em̦m̦aan in enana im lãj? Aet. Bõtab, ñe em̦m̦aan in en kar juon eo im ej kauwe l̦addik eo nejin kõnke ekõn̦aan katakin e im kõjparok e jãn men ko renana, jen kar ke ba bwe em̦m̦aan in enana im lãj? Jaab. Kõnke ekkã ad jaje etke armej ro rej kõm̦m̦ane jet men, ekkã ad m̦õkaj im bõk l̦õmn̦ak ko rebõd kõn er. Bõlen em̦õj an juon l̦õmn̦ak rot in kõn kwe.

Jen lale ruo iaan un ko unin an jet armej l̦õmn̦ak bwe Anij enana im lãj. Un eo kein kajuon ej kõn jorrããn ko rej itok jãn m̦akũtkũt lal̦ ko, taibuun ak l̦añ ko rel̦l̦ap, im men ko ãierl̦o̦kwõt. Im un eo kein karuo ej ñe jej riiti bwebwenato ko ilo Baibõl̦ kõn wãween an kar Anij kaje armej ro. Jenaaj etale men kein im lale el̦aññe em̦ool bwe Anij enana im lãj.