JEN ba bwe ewõr juon m̦õttam̦ im el̦ap am̦ kautieje. Bõtab, juon raan ear kõm̦m̦ane juon men me kwõjjab mel̦el̦e ta unin an kar kõm̦m̦ane. Jet armej rej ruruwe im kananaiki im ba bwe armej in m̦õttam̦ enana im lãj. Kwõnaaj ke m̦õkaj im errã ippãn armej rein? Ak kwõnaaj ke kõttar m̦okta bwe kwõn maroñ bõk mel̦el̦e jãn eo m̦õttam̦? El̦aññe ejako jãn ijo bwe en maroñ kõmel̦el̦eik eok, kwõnaaj ke kijenmej wõt im jab m̦õkaj im ba bwe enana im lãj?

M̦okta jãn am̦ ba jabdewõt, bõlen enaaj em̦m̦anl̦o̦k ñe kwõj kal̦apl̦o̦k am̦ mel̦el̦e kõn eo m̦õttam̦. Bõlen kwõmaroñ kajjitõk ippam̦ make, ‘Ewi joñan aõ jel̦ã kajjien armej in m̦õtta im ta men ko rem̦m̦an kõn e me rej kõm̦m̦an aõ kõn̦aan m̦õttaiki?’ Em̦m̦an ñe kwõj l̦õmn̦ak kake men kein. Jemaroñ ke bar l̦õmn̦ak kõn men kein m̦okta jãn ad kajju ba bwe Anij enana im lãj?

Bõlen emaroñ pen am̦ mel̦el̦e kõn unin an kar Anij kõm̦m̦ane jet men, ak bõlen kwõj pok kõn etke ej kõtl̦o̦k bwe jet men ren wal̦o̦k. Elõñ armej renaaj ba ñan eok bwe Anij enana im lãj im renaaj kõn̦aan bwe kwõn errã ippãer. Ñe enaaj wal̦o̦k men in, kwõnaaj ke kijenmej wõt im jab m̦õkaj im kananaik Anij? Uwaak eo am̦ enaaj alikkar ekkar ñan joñan am̦ jel̦ã kajjien Anij. Kwõn kajjitõk ippam̦ make, ‘Ta men ko rem̦m̦an me Anij ear kõm̦m̦ani ñan ña?’

El̦aññe el̦ap am̦ eñtaan ilo mour eo am̦, bõlen enaaj pidodo am̦ ba bwe ejjel̦o̦k men en̦ em̦m̦an Anij ear kõm̦m̦ane ñan kwe. L̦õmn̦ak m̦okta kõn men in. Anij ej kõm̦m̦ani men ko rem̦m̦an ñan kwe im kwõjjab aikuj n̦aruon kõnke ejjab kõm̦m̦an bwe kwõn iioon apañ ilo mour eo am̦. Ãinwõt ad kar etale, Setan eo ej “irooj in lal̦ in,” im ejjab Jeova. (Jon 12:31) Unin an wõr kalijekl̦o̦k im nana ilo lal̦ in ej kõn Setan. Bareinwõt, unin ad iioon apañ ko ej kõn ad jab weeppãn im kõnke jirilo̦k ak jorrããn ko rej pãd im̦aan men otemjej.

Ta ko em̦õj an Anij kõm̦m̦ani kadede ñan kõj? Baibõl̦ ej ba bwe Anij “ear kõm̦anm̦an lañ im lal̦.” Baibõl̦ ej bar kwal̦o̦k bwe ear kõm̦anm̦an ãnbwinnid ilo juon wãween ekabwilõñlõñ. Ej bar ba bwe Jeova ej ‘irooj in mour ko ad.’ (Sam 124:8; 139:14; Daniel 5:23, UBS) Ta mel̦el̦ein men in?

Mel̦el̦ein men in bwe jeban kar mour el̦aññe en kar jab Anij, eo im ej ad Ri Kõm̦anm̦an. (Jerbal 17:28) Anij ear letok elõñ menin letok ko ñan kõj. Juon iaan men kein ej mour. Bareinwõt, jej loe aolep menin kõm̦anm̦an ko an reaiboojoj ipel̦aakid. Ear bar kamaroñ kõj bwe jen yokwe im en wõr m̦õttad. Bareinwõt, ear kamaroñ kõj ñan nemaki m̦õñã ko, jibwe pein ro jej yokwe er, roñjake al ko, im ãtbwin wũt ko enno̦ bwiier. Aolep men kein rej menin letok jãn Anij. (Jemes 1:17) Aolep jeraam̦m̦an kein rej kam̦ool bwe Jeova ej juon m̦õttad eo ekkar bwe jen lõke im kautieje.

Jouj im jab ebbeer el̦aññe kwõj make kile bwe ej pen wõt ñan am̦ tõmake im lõke Anij. Bõlen kwõj l̦õmn̦ak rot in kõnke kwõjjab lukkuun jel̦ã kajjien. Ãindein kõj armej, ekkã ad jab lõke ro jet el̦aññe jejjab lukkuun jel̦ã kajjier. Kõnke elukkuun kadu katak in im katak ko jilu m̦oktal̦o̦k, jejjab maroñ kwal̦o̦k aolep un ko unin an armej ro ba bwe Anij enana im lãj. Eñin unin enaaj em̦m̦an ñe kwõj kal̦apl̦o̦k am̦ jel̦ã kõn Anij. Kõmij lukkuun tõmak bwe el̦aññe kwõnaaj kõm̦m̦ane men in, kwõnaaj jel̦ã m̦ool eo kõn Anij. * (Lale kõmel̦el̦e ko itulal̦.) Anij enana ke im lãj? Ejjab. Ilo m̦ool, ‘Anij ej yokwe.’​—1 Jon 4:8.