മുഖ്യലേഖനം | ബൈബിൾ—പിന്നിട്ട വഴികളിലൂടെ
കാര്യമാക്കേണ്ട കഥ
ബൈബിളിനെപ്പോലെ മറ്റൊരു പുസ്‌തകവും ഇല്ല. കാലങ്ങളായിട്ട്‌ ആളുകളുടെ വിശ്വാസത്തെ ഇതുപോലെ രൂപപ്പെടുത്തുന്ന പുസ്‌തകം വേറെയില്ല. എന്നാൽ അതേസമയം ഇത്രയേറെ പരിശോധനകളും വിമർശനങ്ങളും നേരിട്ട പുസ്‌തകവും മറ്റൊന്നില്ല.
ഉദാഹരണത്തിന്‌, നമ്മുടെ കൈവശം ഇരിക്കുന്ന ബൈബിളുകൾ, ആദിമ കൈയെഴുത്തുപ്രതികളുടെ ആശ്രയിക്കാൻ കൊള്ളാവുന്ന പകർപ്പുകൾത്തന്നെ ആണോ എന്ന കാര്യത്തിൽ ചില പണ്ഡിതന്മാർ സംശയം പ്രകടിപ്പിച്ചിട്ടുണ്ട്‌. “ബൈബിളിന്റെ ആദ്യകാലപ്രതി അതേ വിധത്തിൽ പകർത്തിയെഴുതിയിട്ടുണ്ട്‌ എന്നു നമുക്ക്‌ ഉറപ്പിച്ച്‌ പറയാനാകില്ല” എന്നാണ്‌ മതകാര്യങ്ങളിൽ പഠനം നടത്തുന്ന ഒരു പ്രൊഫസ്സറുടെ അഭിപ്രായം. “പകർപ്പുകളിൽ ധാരാളം പിശകുകൾ സംഭവിച്ചിരിക്കുന്നു. നൂറ്റാണ്ടുകൾകൊണ്ട്‌ ആദ്യകാലപ്രതികളിൽനിന്ന്‌ ഒരുപാട്‌ കാര്യങ്ങൾ നീക്കം ചെയ്യപ്പെട്ടിട്ടുണ്ട്‌. അങ്ങനെ നോക്കുമ്പോൾ ആദ്യത്തെ കൈയെഴുത്തുപ്രതിയിൽനിന്ന്‌ എണ്ണിയാൽ ഒടുങ്ങാത്ത വിധം വ്യത്യസ്‌തമാണ്‌ ഇന്നത്തെ പകർപ്പുകൾ,” എന്നും അദ്ദേഹം പറഞ്ഞു.
ചിലർ അവരുടെ മതപശ്ചാത്തലം കാരണം ബൈബിൾ വിശ്വസിക്കാൻ കൊള്ളാവുന്നതാണോ എന്നു സംശയിക്കുന്നവരാണ്‌. ഉദാഹരണത്തിന്‌, ബൈബിൾ വിശുദ്ധപുസ്‌തകം ഒക്കെയാണ്‌. പക്ഷേ അതിൽ ചില മാറ്റങ്ങൾ വരുത്തിയിട്ടുണ്ട്‌, എന്നാണ്‌ ഫൈസലിനെ കുടുംബാംഗങ്ങൾ പഠിപ്പിച്ചിരുന്നത്‌. ഫൈസൽ പറയുന്നു: “അതുകൊണ്ട്‌ ആരെങ്കിലും ബൈബിളിനെക്കുറിച്ച്‌ എന്നോടു സംസാരിക്കാൻ വന്നാൽ എനിക്ക്‌ വലിയ സംശയമാണ്‌.” അദ്ദേഹം തുടർന്ന്‌ ഇങ്ങനെ പറയുന്നു: “അവരുടെ കൈയിലിരിക്കുന്നത്‌ മാറ്റം വരുത്തിയ ബൈബിളാണല്ലോ?”
ബൈബിളിൽ മാറ്റം വരുത്തിയിട്ടുണ്ടോ ഇല്ലയോ എന്നത്‌ ചിന്തിക്കേണ്ട ഒരു കാര്യമാണോ? ഇനി പറയുന്ന ചോദ്യങ്ങൾ ശ്രദ്ധിക്കുക: മൂലപാഠത്തിൽ ഭാവിയെക്കുറിച്ചുള്ള ആശ്വാസം തരുന്ന വാഗ്‌ദാനങ്ങൾ ഉണ്ട്‌ എന്ന ഉറപ്പുള്ളതുകൊണ്ടല്ലേ നിങ്ങൾക്ക്‌ ഇന്ന്‌ അവ വിശ്വസിക്കാൻ കഴിയുന്നത്‌? (റോമർ 15:4) മാറ്റങ്ങൾ വരുത്തിയ, പിശകുകളുള്ള ബൈബിളാണ്‌ ഇപ്പോഴുള്ളതെങ്കിൽ ജോലി, കുടുംബം, ആരാധന എന്നീ പ്രധാന കാര്യങ്ങളിൽ തീരുമാനങ്ങളെടുക്കാൻ അതിലെ തത്ത്വങ്ങൾ നിങ്ങൾ ഉപയോഗിക്കുമോ?
ബൈബിളെഴുത്തുകാർ എഴുതിയ അന്നത്തെ എഴുത്തുകൾ ഇപ്പോൾ കാണാനില്ലെങ്കിലും കൈകൊണ്ടെഴുതിയ അവയുടെ ആയിരക്കണക്കിന്‌ പുരാതന പകർപ്പുകൾ ഇന്നും ലഭ്യമാണ്‌, അവ നമുക്കു പരിശോധിക്കാനും കഴിയും. ഈ കൈയെഴുത്തുപകർപ്പുകൾ നശിച്ചുപോകാതെ ഇത്രയും കാലം സൂക്ഷിക്കപ്പെട്ടത്‌ എങ്ങനെയാണ്‌? എതിർപ്പുകളെയും ആശയങ്ങൾ മാറ്റാൻ ഉള്ള ശ്രമങ്ങളെയും എല്ലാം എങ്ങനെയാണ്‌ അത്‌ മറികടന്നത്‌? പ്രശ്‌നങ്ങളെല്ലാം മറികടന്ന്‌ ബൈബിൾ ആളുകളുടെ കൈയിൽ എത്തിയിരിക്കുന്നത്‌ ബൈബിളിലുള്ള നിങ്ങളുടെ വിശ്വാസം വർധിപ്പിക്കുന്നില്ലേ? ഈ ചോദ്യങ്ങൾക്കുള്ള ഉത്തരം അടുത്ത ലേഖനങ്ങളിൽ കാണാം.