၂၀၂၀၊ ခရစ်တော်ရဲ့ သေခြင်း အောက်မေ့ရာပွဲဟာ အလွန် ထူးခြားတယ်။ ရုပ်မြင်သံကြားနဲ့ ရေဒီယို အသံလွှင့်ရုံတွေမှာ အောက်မေ့ရာပွဲအစီအစဉ်ကို ဘာသာစကားများစွာနဲ့ အာဖရိကတစ်ခွင် ဒေသအသီးသီးဆီ ပထမဆုံးအကြိမ် ထုတ်လွှင့်ပေးလိုက်လို့ပါပဲ။

ဒီထုတ်လွှင့်မှုကြောင့် အောက်မေ့ရာပွဲ အစီအစဉ်ကို ကြေညာသူ ၄၀၇,၀၀၀ ကျော်သာမက စိတ်ဝင်စားသူ အမြောက်အမြား ကြည့်ရှုခွင့် ရကြတယ်။ ကြည့်ရှုသူအရေအတွက် အတိအကျ မသိရပေမဲ့ ထုတ်လွှင့်ပေးတဲ့ ဒေသတစ်ခွင်မှာ လူဦးရေ သန်း ၁၅၀ ကျော် နေထိုင်ကြတယ်။

COVID-19 ကပ်ရောဂါကြောင့် ကမ္ဘာ့တစ်ဝန်းက လူအများစုဟာ အောက်မေ့ရာပွဲကို ဗီဒီယိုချိတ်ဆက်မှုနဲ့ ပါဝင်ကြတယ်။ ဒါပေမဲ့ အာဖရိကရဲ့ ကြေညာသူတွေ နေထိုင်တဲ့ ဒေသတွေမှာတော့ အင်တာနက်ခ၊ ဖုန်းခ စျေးသိပ်ကြီးလို့ ဗီဒီယိုဖိုင်ကို တိုက်ရိုက် ကြည့်ရှုဖို့၊ ကူးယူဖို့ မတတ်နိုင်ကြဘူး။ ဒါကြောင့် အုပ်ချုပ်ရေးအဖွဲ့က ဌာနခွဲတချို့ကို အသံလွှင့်ကုမ္ပဏီတွေနဲ့ ဆက်သွယ်ညှိနှိုင်းဖို့ ခွင့်ပြုတယ်။ ဒီနည်းနဲ့ ဒေသတွင်း ရုပ်မြင်သံကြားနဲ့ ရေဒီယို အသံလွှင့်ရုံတွေကတစ်ဆင့် အောက်မေ့ရာပွဲ အစီအစဉ်ကို ထုတ်လွှင့်နိုင်ဖို့ပါ။

အောက်မေ့ရာပွဲ မတိုင်ခင် အင်ဂိုလာ၊ ဘီနင်၊ ကင်မရွန်း၊ ကုတ်ဒီဗွား၊ ကွန်ဂိုပြည်သူ့သမ္မတနိုင်ငံ၊ ဂိုင်ယာနာ၊ မာလာဝီ၊ မိုဇမ်ဘစ်၊ ဆီနီဂေါ၊ ဇမ်ဘီယာ၊ ဇင်ဘာဘွေစတဲ့ ဌာနခွဲ ၁၁ ခုက အသံလွှင့်ကုမ္ပဏီတွေနဲ့ ဆက်သွယ်ပြီး ၁၆ နိုင်ငံမှာရှိတဲ့ ဒေသ ၃၆ ခုကျော်မှာ အောက်မေ့ရာပွဲ ဟောပြောချက်ကို လူထုအတွက် ထုတ်လွှင့်ဖို့ စီစဉ်ခဲ့ကြတယ်။

အင်ဂိုလာ

ရေဒီယိုအသံလွှင့်ရုံ ခြောက်ခုက အောက်မေ့ရာပွဲ အစီအစဉ်ကို အစ်ဘင်ဒါ၊ ခီခွန်ဂို၊ ကမ်ဘန်ဒူ၊ ညာနေကာ၊ ပေါ်တူဂီ၊ အန်ဘန်ဒူစတဲ့ ဘာသာစကား ခြောက်မျိုးနဲ့ ထုတ်လွှင့်ဖို့ သဘောတူတယ်။ ရေဒီယိုအသံလွှင့်ရုံတွေက လူနေထူထပ်တဲ့ ဒေသတွေမှာ ထုတ်လွှင့်ပေးကြတယ်။

ကွန်ဂို ဒီမိုကရက်တစ် ပြည်သူ့သမ္မတနိုင်ငံ

ယေဟောဝါသက်သေတွေကို မကြိုက်တဲ့ မိသားစုတစ်စုမှာ ကျမ်းစာသင်သားတစ်ယောက်က အောက်မေ့ရာပွဲ အစီအစဉ်ကို တစ်ယောက်တည်း ကြည့်ဖို့ စီစဉ်ထားတယ်။ ဟောပြောချက်ကို ကြည့်တော့မယ့်ဆဲဆဲ အဖေက ဧည့်ခန်းကနေ လှမ်းခေါ်ပြီး “ဟောပြောချက် စတော့မယ်ဟေ့” လို့ ပြောတယ်။ ရုပ်မြင်သံကြားကနေ အောက်မေ့ရာပွဲ အစီအစဉ်ကို ကြည့်ဖို့ မိသားစုတစ်ခုလုံး ဧည့်ခန်းမှာ ရောက်နေမှန်း တွေ့ရတော့ သူ အံ့သြသွားတယ်။ သူ့မိသားစုဝင် ဆယ်ယောက် အောက်မေ့ရာပွဲကို ကြည့်ရှုခဲ့ကြတယ်။

လွီနာမြို့အနီး ရွာတစ်ရွာမှာ သက်သေခံ မဟုတ်သူတစ်ယောက်က “ကျွန်တော်တို့ရဲ့ ပါစတာတွေ ဘာမှ မလုပ်ဘူး။ ခင်ဗျားတို့ကျတော့ COVID-19 ကပ်ရောဂါဆိုက်ချိန်မှာတောင် ဘုရားသခင်ကို ဆက်ဝတ်ပြုနေကြတယ်။ ကျွန်တော်တို့လည်း လာနားထောင်မယ်” လို့ပြောတယ်။

ဂိုင်ယာနာ

နိုင်ငံ့ ရုပ်မြင်သံကြား အသံလွှင့်ရုံက အောက်မေ့ရာပွဲ အစီအစဉ်ကို တွီဘာသာစကားနဲ့ ထုတ်လွှင့်ပေးဖို့ သဘောတူတယ်။ အောက်မေ့ရာပွဲ အစီအစဉ်ကို ကြည့်ရှုကြဖို့ လူထုကို ကြော်ငြာပေးလိုက်သေးတယ်။ အောက်မေ့ရာပွဲသာမက ယေရှု ဘာကြောင့် အသေခံရသလဲ။ ဆင်းရဲဒုက္ခတွေကို ဘုရားသခင် ဘာကြောင့် ဖြစ်ခွင့်ပြုထားသလဲဆိုတဲ့ ဗီဒီယိုတွေအပြင် ကမ္ဘာသစ် မြင်ကွင်း၊ လက်တစ်ကမ်းမှာ တေးဗီဒီယိုတို့ကိုပါ ထုတ်လွှင့်ပေးတယ်။

ဆီနီဂေါ

“ရုပ်မြင်သံကြားနဲ့ ရေဒီယိုကနေ ယေဟောဝါ စကားပြောနေတာ။ မယုံနိုင်လောက်အောင်ပဲ။ ဘုရား ကောင်းချီးပေးနေတယ်လို့ ခံစားရပြီး သိပ်ပျော်တယ်။ ဒါမှ ကျွန်မတို့ရဲ့ ဘုရား ယေဟောဝါ” လို့ ညီအစ်မတစ်ယောက် ပြောတယ်။

နောက်ညီအစ်မတစ်ယောက်လည်း ဒီလိုပြောတယ်- “ရုပ်မြင်သံကြားကနေ အောက်မေ့ရာပွဲ ဟောပြောချက် ထုတ်လွှင့်မှုအကြောင်း သိရတဲ့အခါ ‘ဒါဟာ COVID-19 ကြောင့် မလုပ်နိုင်ခဲ့တဲ့ အောက်မေ့ရာပွဲ ဖိတ်ခေါ်မှု ကင်ပိန်းကို ပြန်လိုက်ဖို့ အခွင့်ကောင်းပဲ’ လို့ တွေးမိတယ်။ ဒါနဲ့ ကျမ်းစာသင်သား၊ ပြန်လည်ပတ်မှု၊ သက်သေခံ မဟုတ်တဲ့ အသိအကျွမ်းတွေဆီ ဖုန်းဆက်ပြီး ထုတ်လွှင့်မှုအကြောင်း အသိပေးတယ်။ ကျွန်မရဲ့ သင်သား ကိုးယောက်နဲ့ သူတို့မိသားစုဝင်တွေ ဟောပြောချက်ကို ကြည့်ရှုခဲ့ကြတယ်။ ဇီးဂွန်ခွာမြို့မှာ ရုပ်မြင်သံကြားကတစ်ဆင့် အစီအစဉ်ကို ကြည့်ရတဲ့ ဝမ်းကွဲတစ်ယောက်က ထပ်သိချင်တယ်တဲ့။ ကျွန်မလည်း ကူညီမယ်လို့ ဝမ်းသာအားရ သဘောတူလိုက်တယ်။”

ဒီအထူးအစီအစဉ်က ယေဟောဝါအတွက် “အရာအားလုံး ဖြစ်နိုင်တယ်” ဆိုတဲ့ အချက်ကို ပေါ်လွင်စေတယ်။—မဿဲ ၁၉:၂၆။