IIBIZO lakho litjho ukuthini? Kezinye iinarha, kulisiko ukuthiya umntwana ibizo elikhulumako. Ibizo elikhethiweko lingatjengisa iinkolelo zababelethi, izinto eziligugu kibo namtjhana amathemba namabhudango abanawo ngengomuso lomntwana.

Umukghwa wokuthiya ibizo elikhulumako awusimutjha. Ngeenkhathi zeBhayibhili, amabizo wabantu ngokuvamileko gade athiywa ngokwalokho akutjhoko. Amabizo angatjengisa indima elindeleke emntwini loyo. Isibonelo, uJehova nekatjela uDavidi ngengomuso lendodanakhe uSolomoni, Wathi: “Ibizo lakhe lizokuba nguSolomoni, [okutjho “uKuthula”] begodu emalangenayo ngizokupha u-Israyeli ukuthula.”—1 IMilando 22:9.

Ngesinye isikhathi uJehova wathiya umuntu obekazokudlala indima etja ibizo elitjha. Umka-Abrahama obekayinyumba wathiywa ibizo elithi Sara, elitjho bona “Kosazana.” Kubayini athiywa ibizwelo? UJehova wahlathulula: “Ngizomtjhudubaza akubelethele indodana; begodu ngizomtjhudubaza uzokuba ziintjhaba; amakhosi weentjhaba azokuvela kuye.” (Genesisi 17:16) Ngokukhanyako, ukwazi bona kubayini uSara athiywa ibizo elitjha kuzokuhlanganisa nokuzwisisa indimakhe etja.

Kuthiwani ngebizo eliqakatheke ukuwadlula woke, elithi, Jehova? Litjho ukuthini? UMosisi nekabuza uZimu bona litjho ukuthini ibizo Lakhe, uJehova waphendula wathi: “Ngizokuba ngilokho engizokuba ngikho.” (Eksodosi 3:14) Itjhugululo ka-Rotherham ithi: “Ngizokuba nginanyana yini engiyithandako.” Ibizo lakaJehova limbula bona unguZimu ozalisa iindima ezinengi. Ukuberegisa isitjengiso esilula: Umma kungatlhogeka bona azalise iindima ezinengi qobe langa ukutlhogomela abantwabakhe—njengenesi, umpheki, nothitjhere—kuye ngetlhogakalo. Kungokufanako nangoJehova, ngitjho nofana yena akwenza ngezinga eliphakeme khulu. Nekazakuzalisa umnqophwakhe wethando ngabantu, angaba nginanyana yini ayithandako, aphethe nanyana ngiyiphi indima efunekako. Ukwazi bona litjho ukuthini ibizo elithi Jehova kuhlanganisa ukwazi nokuthabela iindima zakhe ezinengi.

Ngokudanisako, ubuhle bobuntu bakaZimu bufihlekile kilabo abangamazi ngebizo. Nokho, ngokufundisisa iBhayibhili, singazithokozela iindima zakaJehova njengoMluleki ohlakaniphileko, uMphulusi onamandla, noMuphi onomusa, ukubala ezimbalwa kwaphela. Ukwazisisa lokho okutjhiwo libizo lakaJehova, kwamambala, kusitjhiya sibambe ongenzasi.

Nokho, ukwazi bona ibizo lakaZimu litjho ukuthini akusilula ngaso soke isikhathi. Isihloko esilandelako sizokutjengisa bona kubayini.