Kugwiritsa Ntchito Bwino Ndalama
Mfundo za m’Baibulo zathandiza anthu ambiri kupewa mavuto a zachuma.
MUZILINGANIZA BWINO ZINTHU
MFUNDO YA M’BAIBULO: “Zolinga za munthu wakhama zimam’pindulira, koma aliyense wopupuluma, ndithu adzasauka.”—Miyambo 21:5.
ZIMENE TIKUPHUNZIRAPO: Kuti zinthu zizikuyenderani bwino muyenera kukhala ndi zolinga n’kuyesetsa kumazikwaniritsa. Choncho musanayambe kugwiritsa ntchito ndalama muzikonza bajeti. Musamaiwale kuti n’zosatheka kugula chilichonse chimene mukufuna. Ndiye muzigwiritsa ntchito mwanzeru ndalama zanu.
ZIMENE MUNGACHITE:
-
Muzitsatira bajeti yanu. Muzilemba zinthu zonse zimene mukufunikira ndipo muzizigawa m’magulu monga zakudya, zovala komanso ndalama ya lendi. Kenako lembani ndalama zimene zingafunike pagulu lililonse. Ngati mwagwiritsa ntchito ndalama zambiri pagulu lina kuposa zimene munalemba, mungagwiritse ntchito ndalama za pagulu lina. Mwachitsanzo, ngati mwawononga ndalama zambiri pogula mafuta a galimoto, mungagwiritse ntchito ndalama zomwe munasungira zinthu zosafunika kwenikweni monga kupita kunyanja.
-
Muzipewa ngongole zosafunikira. Ngati n’zotheka muziyesetsa kupewa ngongole. Mungachite bwino kusungira ndalama zoti mudzagulire chinthu chimene mukufuna m’malo motenga pangongole. Ngati mumagwiritsa ntchito khadi la ngongole, mungachite bwino kupereka ngongole yonse kuti musalipire chiwongoladzanja chochuluka. Mukakhala ndi ngongole, muzikonza mmene mungadzabwezere ngongoleyo ndipo yesetsani kutsatira zimene mwakonzazo.
Kafukufuku wina anasonyeza kuti munthu akamagula zinthu pogwiritsa ntchito khadi la ngongole, amawononga ndalama zambiri. Choncho ngati muli ndi khadi la ngongole muzikhala wodziletsa kwambiri.
MUZIPEWA MAKHALIDWE OIPA
MFUNDO YA M’BAIBULO: “Chifukwa cha kuzizira, waulesi salima. Iye azidzapemphapempha nthawi yokolola koma sadzapatsidwa kanthu.”—Miyambo 20:4.
ZIMENE TIKUPHUNZIRAPO: Ulesi umachititsa munthu kukhala pa umphawi. Choncho muziyesetsa kugwira ntchito mwakhama komanso kugwiritsa ntchito bwino ndalama zanu kuti musadzavutike m’tsogolo.
ZIMENE MUNGACHITE:
-
Muzigwira ntchito mwakhama. Muzisamala ntchito yanu pokhala a khama komanso odalirika. Mabwana amafuna munthu wolimbikira ntchito.
-
Muzichita zinthu moona mtima. Musamabere abwana anu. Kusakhulupirika kukhoza kuipitsa mbiri yanu zomwe zingachititse kuti muvutike kupeza ntchito ina.
-
Musakhale adyera. Munthu amene amangokhalira kusakasaka ndalama akhoza kuwononga thanzi lake, banja lake, komanso sangakhale ndi anzake.
MFUNDO ZINA ZA M’BAIBULO
Mukhoza kuwerenga Baibulo pa intaneti. Baibuloli likupezeka m’zinenero zoposa 260 pa jw.org
MUSAMAWONONGE NTHAWI KOMANSO NDALAMA ZANU POCHITA ZINTHU ZOSATHANDIZA.
“Chidakwa ndiponso munthu wosusuka adzasauka, ndipo kuwodzera kudzaveka munthu nsanza.”—MIYAMBO 23:21.
MUSAMADERE NKHAWA ZINTHU ZOMWE SIZINACHITIKE.
“Lekani kudera nkhawa moyo wanu kuti mudzadya chiyani, kapena mudzamwa chiyani, kapenanso kuti mudzavala chiyani.”—MATEYU 6:25.
MUZIPEWA MTIMA WANSANJE.
“Munthu wanjiru amayesetsa kuti apeze zinthu zamtengo wapatali, koma sadziwa kuti umphawi udzamugwera.”—MIYAMBO 28:22.
Mwina Mungakondenso Kudziwa Izi
NSANJA YA OLONDA
Zimene Mungachite Ngati Muli Ndi Ngongole
GALAMUKANI!
Kodi Mungatani Kuti Musakhale Wokonda Ndalama?
M’nkhaniyi muli mafunso 7 amene angakuthandizeni kuti mudzifufuze ngati ndalama mumaziona m’njira yoyenera.
NKHANI ZINA
Zimene Mungachite Ngati Mukupeza Ndalama Zochepa
Mavuto azachuma akabwera mwadzidzidzi zimadetsa nkhawa, koma mfundo za m’Baibulo zingakuthandizeni kuti muzitha kugwiritsa ntchito ndalama zochepa.
KUYANKHA MAFUNSO A M’BAIBULO
Kodi Baibulo Lingathandize pa Nkhani ya Mavuto Azachuma Ndiponso Ngongole?
Ndalama sizingakuthandizeni kukhala wosangalala koma pali mfundo za m’Baibulo zinayi zimene zingakuthandizeni pa mavuto azachuma.
GALAMUKANI!
Kodi Mungatani Kuti Musamawononge Ndalama Zambiri?
Musadikire mpaka ndalama zanu kutha musanayambe kuganizira njira yoyenera yogwiritsira ntchito ndalama. Werengani nkhaniyi kuti mudziwe zimene mungachite kuti muzigwiritsa ntchito ndalama mosamala.
