EISHOMO 07
Yehova n’Owa Muringo Ki?
Nooteekateeka ngu Yehova Ruhanga, n’owa muringo ki? Mbwenu shi aine ekitiinisa kingi, kwonka ari hare munonga, nk’enyonyoozi eziri hare naitwe? Nari nooteekateeka ngu aine amaani agu atarikutegyeka agari nk’ag’eihunga ry’enkuba n’emirabyo? Yehova n’owa muringo ki buzima? Yehova naakoresa Ekigambo kye Baibuli, kukumanyisa emwe aha mitwarize ye, n’oku arikutufaho.
1. Ahabw’enki tutarikubaasa kureeba Ruhanga?
“Ruhanga n’Omwoyo.” (Yohaana 4:24) Yehova taine omubiri nk’ogw’abantu. Aine omubiri gw’omwoyo naatuura omu iguru, ahu tutarikubaasa kureeba.
2. Emwe aha mitwarize ya Yehova n’eha?
N’obu Yehova araabe atarikureebwa, n’owaabuzima, kandi aine emitwarize mirungi erikutureetera kumumanya n’okumukunda. Baibuli neegira ngu Yehova ‘naakunda’ oburingaaniza kandi tarikutsigaho abarikumuhamiraho. (Zaaburi 37:28) Kandi “aine embabazi nyingi n’okusaasira,” na munonga aha bantu abarikubonabona. (Yakobo 5:11) Yehova ari “haihi ab’emitima ehendekire,” kandi naajuna abarikwehurira kubi. (Zaaburi 34:18) Kandi waaba nookimanya ngu Yehova naakwatwaho ebi turikukora? Omuntu orikucwamu kukora ebibi naamugwisa kubi, kandi naamukwatsa ekiniga. (Zaaburi 78:40, 41) Kwonka omuntu orikukora ebihikire naamushemeza.—Shoma Enfumu 27:11.
3. Yehova naayoreka ata ngu naatukunda?
Omutwarize gwa Yehova ogurikukirayo ni rukundo. Nangwa, ‘Ruhanga ni rukundo.’ (1 Yohaana 4:8) Yehova naayoreka ngu aine rukundo, kurabira omu Baibuli n’ebi yaahangire. (Shoma Ebyakozirwe 14:17.) Nk’eky’okureeberaho, teekateeka aha ku yaatuhangire. Akatuha okubaasa kw’okureeba erangi nungi, kuhurira ebyeshongoro birikushemeza, n’okuroza eby’okurya binuzire. Naayenda ngu twesiimire amagara.
SHWIJUMA GYE
Yetegyereze eki Yehova arikukoresa kuhikiiriza ebintu by’amaani. Reero bwanyima oreebe oku arikworeka emitwarize ye erikushemeza.
4. Omwoyo gurikwera n’amaani ga Ruhanga
Itwe nitukoresa emikono yaitu kukora emirimo, kwonka Yehova naakoresa omwoyo gurikwera. Baibuli neeyoreka ngu omwoyo gurikwera, ti muntu, kureka n’amaani agu Ruhanga arikoresa kuhikiiriza ebi arikwenda. Shoma Luka 11:13 na Ebyakozirwe 2:17, kubaasa kugarukamu ebibuuzo ebi:
-
Ruhanga naija ‘kushuka’ omwoyo gwe gurikwera ahari abo abarikushaba kugutunga. Noogira ngu omwoyo gurikwera n’omuntu, nari n’amaani ga Ruhanga? Ahabw’enki noogarukamu otyo?
Yehova naakoresa omwoyo gurikwera kuhikiiriza ebintu by’amaani. Shoma Zaaburi 33:6 na 2 Petero 1:20, 21, kubaasa kugarukamu ekibuuzo eki:
-
Yehova akoreise omwoyo gurikwera mu miringo ki?
5. Yehova aine emitwarize mirungi
Musa akaba ari omuheereza wa Ruhanga omwesigwa, kwonka akaba naayenda kumumanya gye. N’ahabw’ekyo Musa akagira Ruhanga ati: “Onyorekye enaama zaawe, nkumanye.” (Okuruga 33:13) Yehova omu kugarukamu Musa akamugambira emwe aha mitwarize ye. Shoma Okuruga 34:4-6, kubaasa kugarukamu ebibuuzo ebi:
-
Ni mitwarize ki emwe ei Yehova yaagambiire Musa?
-
Aha mitwarize ya Yehova n’eha erikukirayo kukushemeza?
6. Yehova naafayo aha bantu
Abaheereza ba Ruhanga Abaheburaayo, bakabaho abahuuku omuri Misri. Okubonabona kwabo kukakwata kuta ahari Yehova? Zaana AMARAKA kandi okuratire, nari oshome Okuruga 3:1-10. Bwanyima garukamu ebibuuzo ebi.
-
Waayetegyereza ngu Yehova naakwatwaho ata okubonabona kw’abantu?—Reeba omushororongo 7 na 8.
-
Mbwenu shi buzima Yehova naayenda kuhwera abantu, kandi naabaasa kukikora? Ahabw’enki noogarukamu ngu eego nari ngaaha?
7. Ebihangirwe nibyoreka emitwarize ya Yehova
Yehova naatumanyisa emitwarize ye kurabira omu bi yaahangire. Zaana VIDIYO. Bwanyima, shoma Abarooma 1:20, kubaasa kugarukamu ekibuuzo eki.
-
Nooreeba mitwarize ki eya Yehova waayetegyereza ebi yaahangire?
ABAMWE NIBAGIRA NGU: “Ruhanga taine mubiri, beitu ngu n’amaani agari buri hamwe.”
-
Iwe nooteekateeka ki?
-
Ahabw’enki nooteekateeka otyo?
OMU BUGUFU
Yehova aine omubiri gw’omwoyo, tarikureebwa, kwonka aine emitwarize mingi erikushemeza kandi ogurikukirayo, ni rukundo.
Okweijutsya
-
Ahabw’enki tutarikubaasa kureeba Yehova?
-
Omwoyo gurikwera niki?
-
Emwe aha mitwarize ya Yehova n’eha?
JUMBURA EBINDI
Yongyera kumanya Yehova orikwega aha mitwarize ye ena erikukirayo.
“Ruhanga Aine Mitwarize Ki?” (Omunaara gw’Omurinzi Na. 1 2019)
Yetegyereze obuhame oburikworeka ngu Yehova tari buri hamwe.
Reeba ahabw’enki Baibuli neeyeta omwoyo gurikwera engaro za Ruhanga.
Omushaija empumi akagumirwa kwikiriza ngu Ruhanga naamufaho. Manya ekyamuhweraire kuhindura emiteekateekyere ye.
“Hati Nindeeba ngu Nimbaasa Kuhwera Abandi” (Omunaara gw’Omurinzi, Okwaikumi 1, 2015)
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
