EKYABAIRE NIKYERARIKIRIZA: Abaabaire nibahandiika Baibuli n’abaabaire nibagikopoorora bakaba nibakira kukoresa ebikozirwe omu bifunjo n’empu z’enyamaishwa. (2 Timoseo 4:13) Ebintu ebi bikaba nibireetera bita kyaguma munonga kurinda Baibuli ngu etasiisikara?

Ebifunjo nibirahuka kutaaguka, kusiibuuka, n’okuhwa amaani. Abarikucondooza aha bizoirwe omu itaaka Richard Parkinson na Stephen Quirke nibagira bati: ‘Orupapura orukozirwe omu bifunjo niruhitsya obwire rucwanyagurika kandi ruba nk’omucuucu. Omuzingo gwabiikwa, nigubaasa kuzaho oruhumbwe, nari gwazaho amaizi gujunde, nigubaasa kuriibwa embeba nari obukooko na munonga encebebe gwaza omu itaaka.’ Ebifunjo ebimwe, bakaba babyanika omu mushana mwingi n’obutagatsi ekyabaire kyongyera aha kurahuka kusiisikara kwabyo.

Empu zigumire munonga kukira ebifunjo, kwonka nazo zaakwatwa kubi nari zikaza aha mushana mwingi nari obutagatsi, nizisiisikara. * Kandi empu nizikira kukundwa obukooko. Niyo nshonga ahabw’enki ebihandiiko bingi ebya ira bitarabaasize kugumaho kuhitsya na hati. Kwonka ku ogire ngu Baibuli ekajunda, obutumwa bwayo bukaba nibwija kujunda nayo.

OKU BAIBULI YAARINZIRWE: Ekiragiro ky’Abayudaaya kikaba nikiragiira buri mugabe ‘kwehandiikira kopi y’ebiragiro,’ eby’ebitabo bitaano bya Baibuli. (Eky’Ebiragiro 17:18) Kandi, abahandiiki abahangu bakahandiika ebihandiiko bingi ekyasha ky’okubanza kirikuza kuhika, kyareetera Ebyahandiikirwe kushangwa omu sinagogi zoona omuri Israeli n’omu bicweka bya hare omuri Makedonia! (Luka 4:16, 17; Ebyakozirwe 17:11) Ebihandiiko ebimwe ebikuru bikabaasa kugumaho bita kuhitsya na hati?

Omucondooza aha Ndagaano Ensya orikwetwa Philip W. Comfort naagira ati: “Abayudaaya bakaba nibamanywa ahabw’okubiika emizingo omu ngyemeko kubaasa kugirinda.” Buzima Abakristaayo bakagumizamu nibakora batyo. N’ahabw’ekyo, ebihandiiko bya Baibuli ebya ira ebimwe bishangirwe omu ngyemeko z’eibumba, omu buduukuru, n’omu nyanga z’amabaare n’omu myanya emwe eyomire.

EKIRUGIREMU: Enkumi n’enkumi z’ebicweka by’ebihandiiko bya Baibuli ebiine emyaka nka 2,000 bikiriho na hati. Tihaine ebindi bitabo ebiine ebihandiiko bingi kandi ebimazireho emyaka mingi nka Baibuli.