1. Ni ntaaniso ki eri ahagati y’ekintu ekirikwetengyesa n’eki orikwenda?

NIKIGAMBWA ngu ebirikwetengyesa aha muntu ni bikye, kwonka ebi omuntu arikuba naayenda tibirikuhwayo. Nikireebeka baingi tibarikumanya entaaniso eri ahagati y’ebirikwetengyesa aha muntu n’ebi omuntu arikwenda. Mbwenu shi hariho ntaaniso ki? “Ekirikwetengyesa” n’ekintu eki oine kugira ahabw’okuba omuntu tarikubaasa kubaho kyaba kitariho. Eby’okurya, ebijwaro, n’oburaaro, n’ebintu bikuru ebirikwetengyesa. Eki “orikwenda” n’ekintu eki orikuhurira nooyenda, kwonka ekitarikwetengyesa omu kubaho kw’omuntu.

2. Ni bintu ki ebimwe ebi abantu barikwenda?

² Ebi abantu barikwenda nibibaasa kutashushana, kurugiirira ahu barikutuura. Omu mahanga agarikutunguuka, baingi nibaba nibenda esente z’okugura esimu, piki, nari eitaka. Omu mahanga amagaiga, nibabaasa kuba n’ekyetengo ky’okugira kabada nungi y’emyenda, enju mpango, nari emotoka y’esente nyingi. Omu mbeera zoona, hariho akabi k’okugwa omu mutego gw’okukunda munonga eby’obutungi, okuguma nooyenda kugira ebintu, n’obu  byakuba bitarikwetengyesa nari otaine sente z’okubigura.

3. Okukunda munonga eby’obutungi niki?

³ Okukunda munonga eby’obutungi niki? N’okuta omutima aha by’obutungi okukira eby’omwoyo. Okukunda munonga eby’obutungi nikureetwa okwetenga kw’omuntu, ebi arikwebembeza, n’ebi arikutaho omutima. Ebi nibireetera omuntu kugira ekyetengo ky’okugira eby’obutungi bingi. Omuntu orikukunda eby’obutungi naabaasa kuba ataine sente nyingi nari atarikugura eby’obuguzi bwingi. Nangwa n’abooro nibabaasa kugwa omu mutego gw’okusherura eby’obutungi kandi beehuzye kubanza kusherura Obukama.​—Heb. 13:5.

4. Sitaane naakoresa ata ebi “amaisho geetenga”?

⁴ Sitaane naayenda twikirize ngu nitubaasa kugira okushemererwa n’amagara marungi twaba twine ebintu bingi. N’ahabw’ekyo naakoresa ensi ye “n’ebi amaisho geetenga” kuteeraho kutureetera kuguma nitwetenga bingi. (1 Yoh. 2:15-17; Kut. 3:6; Enf. 27:20) Ensi erimu ebintu eby’emiringo yoona, ebirungi n’ebibi, ebimwe nibiba nibishendashenda. Oraguzireho ekintu ahabw’okugira ngu oreebire barikukiranga kyakushemeza beitu hatari ahabw’okugira ngu buzima kibaire nikyetengyesa? Mbwenu shi bwanyima y’okukigura oketegyereza ngu okaba noobaasa kubaho otakiine? Ebintu nk’ebyo ebitarikwetengyesa nibitureetera kutuura omu mbeera egumire kandi bitumaramu n’amaani. Nibibaasa kutubeera omutego kandi bituhuzye turemwe kuguma nitweshomesa Baibuli, kutebeekanisa n’okuza omu nteerane n’okuza kubuurira butoosha. Ijuka, entumwa Yohaana akarabura ati: “Ensi egi neehwaho n’okwetenga kwayo.”

5. Niki ekirikubaasa kuba ahari abo abarikumarira amaani gaabo omu kusherura eby’obutungi?

⁵ Sitaane naayenda ngu tube abahuuku b’eby’obutungi omu mwanya gw’okuheereza Yehova. (Mat. 6:24) Kwonka twaba nitwemarira aha kwetungira ebintu bingi, nitwija kuba tutaine kigyendererwa nibibaasa kutureebya nari tutungye oburemeezi omu by’entaasya. Kandi eky’akabi munonga, okwikiriza oku twine omuri Yehova n’Obukama bwe nikubaasa kutuuba. (1 Tim. 6:9, 10; Kush. 3:17) Kiri nk’oku Yesu yaakishobooroireho omu ky’okureeberaho ky’omubibi. Yesu akagira ngu ‘okwetenga ebindi’ kuri nk’amahwa agarikubaasa kuremesa embibo kumera kandi gakagiremesa kwana ebyana.​—Mak. 4:14, 18, 19.

6. Nitwega ki ahari Baruki?

⁶ Teekateeka aha mushaija orikwetwa Baruki, omuhandiiki wa nabi Yeremia. Yerusaalemu eri haihi kucwekyerezibwa, Baruki akatandika ‘kwesherurira ebikuru’ ebyabaire bitaine mugasho ogw’obutwire. Kwonka, eki yaabaire ashemereire kutamu amatsiko ge, n’eki Yehova yaamuraganiise, okukiza amagara ge. (Yer. 45:1-5) Buzima Ruhanga akaba atarikuza kukiza ebintu by’omuntu weena omu rurembo orwabaire niruza kucwekyerezibwa. (Yer. 20:5) Ahabw’okugira ngu emperu y’ensi egi eri haihi kuhika, hati tibwo bwire bw’okusherura eby’obutungi. Titushemereire kuteekateeka ngu ebintu ebi twine, nibiija kuhonokaho aha kubonabona kwingi n’obu byakuba biri eby’omuhendo nari eby’omugasho kwingana ki.​—Enf. 11:4; Mat. 24:21, 22; Luk. 12:15.

7. Nituza kushwijuma ki, kandi ahabw’enki?

⁷ Yesu akatuha obuhabuzi burungi aha ku turikubaasa kutunga ebirikwetengyesa tutahabisiibwe, tutarikukunda munonga eby’obutungi, nari tutarikwerarikirira aha bintu ebitarikwetengyesa. Obuhabuzi obu akabugamba n’omu Rubazo rwe orw’aha Rushozi.  (Mat. 6:19-21) Ka tushome kandi twetegyereze ebirikushangwa omuri Matayo 6:25-34. Okukora ekyo kishemereire kutuha obuhame ngu twine ‘kusherura Obukama bwa Ruhanga,’ beitu bitari bintu.​—Luk. 12:31.

8, 9. (a) Ahabw’enki tutashemereire kwerarikirira munonga aha bintu ebirikwetengyesa? (b) Niki eki Yesu yaabaire naamanya aha bantu n’ebirikwetengyesa aharibo?

⁸ Shoma Matayo 6:25. Obu Yesu yaagambira abamuhurikiize kurekyera aho ‘kwemereza emitima yaabo’ nibateekateeeka aha by’amagara gaabo, akaba ari nk’orikubagira ngu barekyere aho kutiina. Bakaba nibeerarikirira aha bintu ebitashemereire kubeerarikiriza. Yesu akabagambira kurekyera aho kwerarikirira kandi ahabw’enshonga nungi. Ahabw’okugira ngu Yesu akaba naafayo munonga aha beegi be, akabarabura emirundi ena endiijo omu rubazo rwe orw’aha rushozi.​—Mat. 6:27, 28, 31, 34.

⁹ Ahabw’enki Yesu yaagizire ngu turekye kwerarikirira aha by’okurya, nari eby’okunywa, nari ebijwaro? Mbwenu shi ebintu ebi ti bimwe aha bikuru ebi omuntu ashemereire kugira? Buzima ni bikuru! Twaremwa kutunga ebintu ebi, titurikwija kwerarikirira? Buzima nitwija kwerarikirira, kandi ekyo Yesu akaba naakimanya. Akaba naamanya ebi abantu baine kutunga buri eizooba. Omu biro by’omumaisho abeegi be bakaba nibaija kutuuraho ‘omu biro by’emperu eby’akabi kaingi.’ (2 Tim. 3:1) Ebi bikaba nibiija kutwariramu eibura ry’emirimo, esente okugwa ebeeyi, eibura ry’eby’okurya, n’obworo obu abantu baingi baine. Kwonka Yesu akaba naamanya ngu amagara g’omuntu nigakira ‘eby’okurya kandi omubiri nigukira ebijwaro.’

10. Obu Yesu yaayegyesa abeegi be oku baine kushaba, akabagira ngu niki eki baine kutwara nka kikuru?

¹⁰ Yesu omu rubazo rwe, akeegyesa abaabaire bamuhurikiize kugambira Ishebo w’omu iguru eby’omubiri ebirikwetengyesa, arikugira ngu baine kushaba bati: “Otuhe hati eby’okurya ebi otuha obutoosha.” (Mat. 6:11) Eizooba erindi, akabagira ngu bashabe bati: “Ogume otuhe eby’okurya byaitu ebya buri izooba.” (Luk. 11:3) Kwonka obuhabuzi obwo tiburikumanyisa ngu eby’omubiri nibyo twine kuteekateekaho okukira ebindi. Omu kushaba nikwo kumwe, Yesu akagira ngu eki twine kuta omu mwanya gw’okubanza twaba nitushaba n’Obukama bwa Ruhanga kwija. (Mat. 6:10; Luk. 11:2) Yesu kubaasa kuhwera abeegi be kutagira okwerarikirira, akabagumya arikubaijutsya ngu Yehova naafayo aha bintu byona ebi yaahangire.

11, 12. Nitwega ki aha ku Yehova arikureeberera ebinyonyi? (Reeba ekishushani aha kutandika.)

¹¹ Shoma Matayo 6:26. Tushemereire ‘kwetegyereza ebinyonyi.’ N’obu ebinyonyi biraabe bitari bihango, nibirya eby’okurya bingi. Kuri noogira ngu ebinyonyi ni bihango nk’abantu, bikaabaire nibirya eby’okurya baingi okukira abantu. Ebinyonyi nibirya ebijuma, obukooko, n’eminyongororwa. Kwonka tikirikubyetengyesa kubiba embibo n’okuhinga emisiri y’eby’okurya. Yehova naabiha buri kimwe. (Zab. 147:9) N’amazima, tarikubitamika by’okurya! Nibiba biine kugyenda bikabisherura, kwonka eby’okurya byabyo biriho omu bwingi.

¹² Yesu akaba naamanya ngu Ishe w’omu iguru ku araabe naareeberera ebinyonyi, naija kureeberera n’abantu arikubaha ebikuru ebirikwetengyesa. ^[1] (1 Pet. 5:6, 7) Tarikwija kututamika eby’okurya, kwonka naija kutuha omugisha twateeraho kuhinga eby’okurya by’okurya, nari twateeraho  kukora esente z’okubigura. Yaaba naareeba ngu buzima haine ebi tushemereire kutunga, naabaasa kuhiga abandi batuhe aha bi baine. N’obu Yesu araabe ataragambire aha kuha ebinyonyi oburaaro, Yehova akabiha obwengye bw’obuhangwa, obukoryo, n’eby’okukoresa kubaasa kwombeka ebyashuri. Naitwe Yehova naabaasa kutuhwera kutunga oburaaro obushemeire n’ab’omu maka gaitu.

13. Niki ekirikworeka ngu nitukira ebinyonyi?

¹³ Yesu akabuuza abeegi be ati: “Mbwenu imwe [enyonyi] timurikuzikira?” Hatariho kubanganisa, Yesu akaba naamanya ngu ari haihi kuhayo amagara ge ahabw’abantu. (Gyeragyeranisa Luka 12:6, 7.) Ekitambo kya Kristo tikiraheibweyo ahabw’ekihangirwe ekindi kyona kureka ahabw’abantu. Yesu tarafeereire ebinyonyi, kwonka akatufeera kugira ngu tutungye amagara agatahwaho.​—Mat. 20:28.

14. Niki eki omuntu orikwemereza omutima atarikubaasa kukora?

¹⁴ Shoma Matayo 6:27. Mbwenu shi ahabw’enki Yesu yaagizire ngu omuntu yaayemereza omutima tarikubaasa kwongyera aha buhangaazi bwe? N’ahabw’okuba okwerarikirira aha bi turikwetenga buri izooba tikurikubaasa kutuhwera kugumaho obwire buraingwa. Omu mwanya gw’ekyo, okwemereza omutima nikubaasa kutuubya aha buhangaazi bwaitu.

15, 16. (a) Nitwega ki aha ku Yehova arikureeberera ebirabyo by’omu ishwa? (Reeba ekishushani aha kutandika.) (b) Ni bibuuzo ki ebi turikubaasa kwebuuza, kandi ahabw’enki?

¹⁵ Shoma Matayo 6:28-30. N’oha otarikwenda kugira emyenda mirungi, okukira munonga yaaba naayejumba omu by’omwoyo nk’okubuurira, nari okuza omu nteerane za buri saabiiti, nari empango? Ekyo shi, kishemereire kutureetera ‘kwemereza  emitima aha bijwaro’? Yesu akagaruka yaatuhwera kuta omutima aha bi Yehova yaahangire. Kwonka hati, nitubaasa kwega bingi aha ‘birabyo by’omu ishwa.’ Yesu naabaasa kuba yaabaire naamanyisa ebirabyo nari ebimuri birungi munonga nk’omwangangye. Ebihangirwe ebi tibirikuruka emyenda y’okujwara. Kwonka, ni birungi munonga by’okureeba! Ahakuba, “na Sulemaani omu kitiinisa kye kyona taraizihiirwe [tarashemeireho mu] bijwaro nka kimwe aharibyo”!

¹⁶ Yetegyereze enshonga nkuru ei Yesu arikugamba: “Ruhanga ku araabe ajweka obunyaatsi bw’omu kishaka, oburiho hati, nyencakare bukanagwa omu mahega, tarikizaho kubajweka, imwe abaine okwikiriza kukye?” Buzima naija kukikora! Abeegi ba Yesu bakaba nibaburaburamu okwikiriza. (Mat. 8:26; 14:31; 16:8; 17:20) Bakaba baine kugira okwikiriza kuhami n’okugira obwesigye omuri Yehova. Kandi shi itwe? Mbwenu shi nitwikiriza ngu Yehova naija kutureeberera?

17. Niki ekirikubaasa kushiisha omukago gwaitu na Yehova?

¹⁷ Shoma Matayo 6:31, 32. Titushemereire kutooreza “abanyamahanga,” abatarikwikiririza omuri Tataitwe ow’omu iguru oine rukundo, kandi orikureeberera abarikuta Obukama bwe omu mwanya gw’okubanza. Okuteeraho kusherura ebintu byona ebi “abanyamahanga basherura” nikibaasa kushiisha omukago gwaitu na Yehova. Omu mwanya gw’ekyo, nitubaasa kugira obuhame ngu twakora eki tushemereire kukora, turikwebembeza eby’omwoyo, Yehova naija kutuha ebirungi. ‘Okutiina Ruhanga’ kwaitu kushemereire kutureetera kumarwa ‘n’eby’okurya n’eby’okujwara.’​—1 Tim. 6:6-8.

18. Yehova naatumanyaho ki, kandi naija kutukorera ki?

¹⁸ Shoma Matayo 6:33. Abakuratsi ba Yesu baine kuguma nibeebembeza Obukama bwa Ruhanga. Twakora ekyo, ebigambo bya Yesu ebirikugira ngu “n’ebyo byona muryabyongyerwaho,” nibiija kuhikiirira. Ahabw’enki yaagambire atyo? Omu mushororongo ogwa 32, akashoboorora ati: ‘Shoimwe ow’omu iguru naamanya ku ebyo byona bibashemereire,’ ekirikumanyisa ebikuru ebirikwetengyesa. Yehova naabaasa kutuha ebirikwetengyesa nk’eby’okurya, ebijwaro, n’oburaaro, nangwa n’obu twakuba tutakamanyire ngu nibyetengyesa. (Fil. 4:19) Naamanya ekijwaro kyaitu ekiri haihi kukura. Naamanya ebiriisa by’eby’okurya ebitushemereire, n’oburaaro burikumara kurugiirira aha buhango bw’eka yaitu. Yehova naija kureeba ngu twatunga kyona ekirikwetengyesa.

19. Ahabw’enki tutashemereire kwerarikirira aha birikubaasa kubaho omu biro by’omumaisho?

¹⁹ Shoma Matayo 6:34. Yetegyereze ngu omurundi gwa kabiri, Yesu akagira ati: “Mutaryemereza emitima.” Naayenda ngu tuteekateekye aha izooba rimwe-rimwe, turikumanya ngu Yehova naija kutuhwera. Omuntu yaaba naayemereza omutima aha biraabeho omu biro by’omumaisho, naabaasa kuteeraho kweyesiga omu mwanya gw’okwesiga Ruhanga, kandi ekyo nikibaasa kushiisha omukago gwe na Yehova.​—Enf. 3:5, 6; Fil. 4:6, 7.

20. (a) Noobaasa kutaho kigyendererwa ki omu kuheereza Yehova? (b) Noobaasa kukora ki kweyihaho ebitarikwetengyesa?

²⁰ N’eky’akabi kuremwa kuheereza Yehova ahabw’okugira ngu nituteeraho kwesherurira eby’obutungi. Omu mwanya gw’ekyo, tushemereire kutaho ebigyendererwa by’omwoyo. Nk’eky’okureeberaho, noobaasa kuza omu kibiina ekindi ahu ababuurizi b’Obukama barikwetengwa munonga? Noobaasa kuheereza nka payoniya? Waaba ori payoniya, waateekateekire aha kuza omu Ishomero ry’Ababuurizi b’Obukama? Amazooba agamwe noobaasa kuza kuhwera aha Beseeli nari aha ofiisi y’abavunuuzi eri omu kicweka kyanyu? Amazooba agamwe noobaasa kuza kuhwera omu kwombeka Ebyombeko by’Obukama? Teekateeka aha ku orikubaasa kweyihaho ebirikubaasa kukuremesa kwejumbira kimwe omu mirimo y’Obukama. Shaba kandi oteekateekye aha biri omu kabokisi “ Oku Orikubaasa Kweyihaho Ebitarikwetengyesa,” kandi teeraho kuhikiiriza ekigyendererwa kyawe.

21. Niki ekiraatuhwere kwirira haihi na Yehova?

²¹ Yesu akatwegyesa kusherura Obukama bitari bintu, ahabw’enshonga nungi. Twakora ekyo, tikirikutwetengyesa kwemereza emitima aha bintu ebirikwetengyesa. Nitwirira haihi Yehova ahabw’okuba nitumwesiga ngu naaza kutureeberera. Nitwerinda kugura buri kimwe eki turikureeba nari ekiri omu nsi egi, n’obu twakuba twine sente z’okukigura. Twayeyihaho ebitarikwetengyesa hati, nikiija kutuhwera kuguma turi abeesigwa ahari Yehova tubone “kutunga amagara agaabuzima” agu aturaganiise.​—1 Tim. 6:19.