Kitaabni Qulqulluun, Diyaabilosii fi jinniiwwan namoota irratti dhibbaa guddaa akka geessisan yeroo ibsu, ‘guutummaan biyya lafaa harka isa hamaa jala jira’ jedha. (1 Yohaannis 5:19, Hiika bara 1997) Kitaabni Qulqulluun malawwan Diyaabilos namoota irratti dhiibbaa gochuuf itti fayyadamu adda baasee ibsa.

•   Gowwoomsaa. Kitaabni Qulqulluun, Kiristiyaanonni ‘mala haxxummaa Diyaabilos mormanii akka dhaabatan’ jajjabeessa. (Efesoon 6:11) Haxxummaa inni itti fayyadamu keessaa tokko namoonni bakka buutota isaa taʼan tajaajiltoota Waaqayyoo akka taʼan namoota amansiisuu dha.—2 Qorontos 11:13-15.

•   Gochawwan hafuurota hamoo. Diyaabilos namoota gowwoomsuuf eker dubbistuu, namoota hooda dubbatan ykn urjii lakkaaʼanitti fayyadama. (Keessa Deebii 18:10-12) Kana malees, qoricha sammuu hadoochu fudhachuu, dawweessuu fi malli xiinxaluu samuu namaa duwwaa godhu, namoonni toʼannaa jinniiwwanii jala akka taʼan taasisu.—Luqaas 11:24-26.

•   Amantii sobaa. Dhaabbileen amantii barumsawwan sobaa barsiisan namoonni Waaqayyoof akka hin ajajamne gowwoomsu. (1 Qorontos 10:20) Kitaabni Qulqulluun barsiisa sobaa akkasii “barumsa jinniiwwanii” jedhee waama.—1 Ximotewos 4:1.

•   Namoota toʼachuu. Kitaabni Qulqulluun seenaawwan hafuuronni hamoon namoota toʼannaa isaanii jala akka galchan ibsan qabateera. Yeroo tokko tokko namoonni jinniitiin qabaman qaroon isaanii akka jaame ykn arrabni isaanii akka hidhame ykn miidhaa akka of irra geessisan ibsameera.—Maatewos 12:22; Maarqos 5:2-5.

Dhiibbaa Diyaabilos of irraa ittisuun kan dandaʼamu akkamitti?

 Kitaabni Qulqulluun karaa buʼa qabeessa Diyaabilosiin mormuu itti dandeessu waan sitti himuuf dhiibbaa jinniiwwanii sodaachaa jiraachuu hin qabdu:

•   ‘Akeeka Diyaabilos beekuuf’ malawwan inni fayyadamu beekuu nu barbaachisa.—2 Qorontos 2:11.

•   Beekumsa Kitaaba Qulqulluu argachuu fi wanta baratte hojii irra oolchuu qabda. Qajeelfamawwan Kitaaba Qulqulluu hojii irra oolchuun kee, dhiibbaa Diyaabilos irraa si eega.—Efesoon 6:11-18.

•   Wantoota jinniiwwanii wajjin wal qabatan kam iyyuu balleessi. (Hojii Ergamootaa 19:19) Isaanis muuziqaawwan, kitaabota, barruulee, poostarootaa fi viidiyoowwan gochawwan hafuurota hamoo jajjabeessan dabalatu.