JOONAATAAN inni maatii sanyii Kooriyaa taʼanirraa Ameerikaatti dhalate ijoollummaasaatti jibbiinsi sanyii isarra gaʼee ture. Erga guddatee booda, bakka namoonni bifa ykn qomoosaarratti hundaaʼuudhaan halaalatti isa jibban hin jirre barbaaddachaa ture. Biyya Ameerikaa, magaalaa kaaba Alaaskaatti argamtu tokkotti iddoo namoonni inni yaalii fayyaa godhuuf keessaa baayʼeensaanii bifa isaa wajjin wal fakkaatu qaban itti argaman dhaquudhaan doktoora taʼee hojjechuu jalqabe. Naannoo Arkitiikii diilallaaʼaa taʼe kana jiraachuudhaan jibbiinsa isarra gaʼu jalaa miliquu akka dandaʼu abdatee ture.

Haataʼu malee, dubartii umrii waggaa 25tiif yaalii fayyaa yeroo godhetti abdiinsaa kun jalaa dukkanaaʼe. Dubartiin sababa dhukkubasheetiin of wallaaltee turte kun akkuma of barteen fuula Joonaataan yommuu argitu, jibbiinsa warra Kooriyaatiif qabdu ibsuuf iyyitee jechoota gadhee itti dubbatte. Haalli kun carraaqqiin inni jibbiinsa isarra gaʼu jalaa miliquuf godhe akka isaaf hin milkoofne isa hubachiiseera.

Muuxannoon Joonaataan haala gaddisiisaa jiru tokko kan ibsudha. Halaalatti nama jibbuun amala  addunyaarratti babalʼatee jirudha. Amalli kun bakka namoonni jiran hunda jira.

Halaalatti nama jibbuun kan babalʼate taʼus namoonni baayʼeen ni balaaleffatu. Haataʼu malee, wanti tokko utuma baayʼee jibbamuu babalʼachuu kan dandaʼu akkamitti? Namoonni amala halaalatti nama jibbuu balaaleffatan, isaanis amala akkasii akka qaban hin hubatan. Atoo gama kanaan akkami?

Hubannes hubachuu baannes, halaalatti nama jibbuun hamma tokko keessa keenya jiraachuusaa beekuun rakkisaadha. Macaafni Qulqulluun sababasaa yommuu ibsu, “Garaan namaa waan hundumaa irra jalʼaa dha” jedha. (Ermiyaas 17:9) Kanaafuu, namoota hundumaa wajjin waliif dandeenyee jiraachaa akka jirru yaaduudhaan of gowwoomsina taʼa. Yookiinimmoo qomoo taʼe tokkoof ilaalcha gadhee qabaachuuf sababa gaʼaa akka qabnu yaanna taʼa.

Jibbiinsa keessa keenya jiru hubachuun rakkisaa taʼuusaa ilaaluuf haala kanarratti yaadi: Halkan dukkana keessa kophaakee karaarra deemaa jirta haa jennu. Dargaggoonni kanaan dura matumaa argitee hin beekne lama sitti dhufaa jiru. Dargaggoonni kun qaamaan ciccimoodha; inni tokko waa harkatti qabateera.

Dargaggoonni kun miidhaa narraan geessisu jettee sodaattaa? Haalli kanaan dura si mudate of eeggannoo gochuu akka qabdu kan si hubachiise taʼus, muuxannoonkee kun dargaggoonni kun miidhaa sirraan geessisuu akka dandaʼan yaaduunkee sirrii akka taʼe kan mirkaneessudhaa? Yeroo kanatti, Dargaggoota kana sanyii ykn qomoo isa kam keessatti ramadda? Deebiin gaaffii kanaaf kennitu halaalatti nama jibbuufi dhiisuukee argisiisa. Deebiin ati kennitus halaalatti nama jibbuun hamma tokko dhiibbaa sirratti akka geessise kan argisiisu taʼuu dandaʼa.

Hundi keenya haqaan yoo of qorre, hamma tokko jibbi keessa keenya akka jiru baruu dandeenya. Macaafni Qulqulluun ‘namni fuula ilaalee’ akka murteessu dubbachuudhaan, akaakuu halaalatti nama jibbuu beekamaa taʼe tokko ibsa. (1 Saamuʼel 16:7) Hundi keenya amala halaalatti nama jibbuu isa yeroo baayʼee miidhaa guddaa geessisu waan qabnuuf, amala kana moʼuu ykn hambisuu ni dandeenyaa? Gara fuulduraatti yeroon addunyaan kun halaalatti nama jibbuurraa walaba itti taatuhoo ni dhufaa?