Bibliapi kausarimpuy simitaqa griego rimaypi anástasis nispan nikun, chayqa “jujmanta sayariy otaq jatariy” ninantan nin. Pitapas Dios kausarichispaqa jujmantan chay runaman kausayta qon. Kausarimpuq runaqa manaraq wañupushaspa imaynachus karqan chay jinallataqmi kausarimpun (1 Corintios 15:12, 13).

 Antiguo Testamentopiqa otaq hebreo rimay qelqakunapiqa kashanmi kausarimpuymanta yachachikuyqa. Juj kaqpin Diosqa profetan Isaiaswan promesanta qelqachirqan, chaypin nishan: “Wañuqniykikunan kawsarinqaku, ayaykikunan sayarinqaku”, nispa (Job 14:13-15; Daniel 12:2, 13; Isaías 26:19, Diospa Simin Qelqa). a

 ¿Maypin wañupuqkuna kausarimpunqaku? Wakin runakunaqa Cristowan kuska rey kanankupaqmi cielopi kausarinqaku (2 Corintios 5:1; Apocalipsis 5:9, 10). Bibliapiqa chaytan nikun “ñaupaq kaq kausarimpuy” nispa (Apocalipsis 20:6; Filipenses 3:11). Chhaynaqa kantaq ñaupaq kaq kausarimpuy chayqa, kallantaqmi qhepa kaq kausarimpuypas. Qhepa kaq kausarimpuypi kausarimuqkunaqa askhallañan kanku, paykunaqa kay jallp’apin tiyanqaku (Salmos 37:29).

 ¿Imaynan wañupuqkuna kausarimpunqaku? Wañupuqkunataqa Jesusmi kausarichimunqa Diospa qosqan atiywan (Juan 11:25). Payqa “sepulturapi llapa kaqkunatan” kausarichimunqa, paykunaqa jatarimunqaku manaraq wañupushaspa imayna runachus karqanku chay jinan, kaq yuyaynillayoqmi kanqakupas (Juan 5:28, 29). Jallp’api tiyanankupaq kausarimpuq runakunaq cuerponpas tullunpas qhalin kanqa, mana ima onqoyniyoq, manan ima mana allinpas paykunapiqa kanqachu (Isaías 33:24; 35:5, 6). Janaq pachapi kausariqkunan ichaqa mana aychayoq tulloyoqchu kausarinqaku, aswanpas “espíritu cuerpoyoqmi” kanqaku (1 Corintios 15:42-44, 50).

 ¿Pikunan kausarimpunqaku? Biblian willan “allin runakunapas mana allin runakunapas” kausarimpunankuta (Hechos 24:15). Chay allin runakunaqa Dios sonqo kaqkunan kanku. Paykunamanta wakinmi kanku: Noé, Abrahán, Sarapiwan (Génesis 6:9; Hebreos 11:11; Santiago 2:21). Chay mana allin runakunataq kanku Diosmantapas kamachikuyninkunatapas mana yachaq runakuna.

 Ichaqa yuyaypi Diospa kamachikuyninkunata manapuni kasukuqkunataqa manan jayk’aqpas kausarichikunqachu, chhayna millay runakunaqa wiñaypaqmi wañupunku (Mateo 23:33; Hebreos 10:26, 27).

 ¿Jayk’aqmi kausarimpuy kanqa? Bibliaq willasqan jina ñaupaq kaq kausarimpuyqa karqan Cristoq chayamusqan tiempopin, chay tiempon qallarirqan 1914 watapi (1 Corintios 15:21-23). Kay jallp’api kausarimpuytaq Jesucristo waranqa wata kamachikusqan tiempopi kanqa, chaypin kay jallp’a pachaqa sumaq paraisoman tukupunqa (Lucas 23:43; Apocalipsis 20:6, 12, 13).

 ¿Kanqapunichu kausarimpuy? Arí kanqapunin. Bibliapin willan isqon kausarimpuq runakunamanta, paykunaq kausarimpusqankutaqa jujkunapas rikurqankun (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; 20:7-12; 1 Corintios 15:3-6). Jujnin kausarimpuqmi karqan Lázaro, payqa tawa p’unchayñan wañusqa kasharqan. Ichaqa Jesusmi Lazarota kausarichirqan askha runakunaq rikushasqan (Juan 11:39, 42). Chay pasasqantaqa Jesuspa enemigonkunapas allintan yacharqanku, chaymi paykunaqa wañuchiyta munarqanku Jesustapas Lazarotapas (Juan 11:47, 53; 12:9-11).

 Biblian willan Diosqa tukuy atiyniyoq kasqanta, chaymi payqa atin wañupuq runakunata kausarichimpuyta. Chaymantapas Diosqa llapa runakunaq imaynachus kasqantan llapanta yuyan, chaymi llapa wañupuq runakunaq imaynachus kasqankutapas llapantapuni yuyashan; manataqmi pipas ni imapas jark’ayta atinmanchu wañusqakunata kausarichimpunantaqa (Job 37:23; Mateo 10:30; Lucas 20:37, 38). Jinaspapas Diosqa maytan munashan wañupuqkunata kausarichimpuyta. Chaymi Biblia nin: “Kamasqayki runamanta sonqoykita ch’allaq nirichinki”, nispa (Job 14:15). Biblian willan kay jallp’api tiyanankupaq runakunata kausarichispa Diosqa anchatapuni kusikunanmanta.

Kausarimpuymanta pantasqa yachachikuykuna

 Wakin runakunan ninku: “Pipas kausarimunqa chayqa mana wañuq almanmi cuerponman jujllachakapunqa”, nispa.

 Biblian nin: Almaqa kikin kausaq runa kasqanta, jinaspapas wañupuqtinqa manan almanqa kausashallanchu (Génesis 2:7; Ezequiel 18:4). Pipas kausarimun chayqa manan juj almachu cuerponman jaykun, aswanpas puñuymantapas chay runa rijch’arishanman jinallan.

 Wakin runakunan ninku: “Wakin kausarimpuqkunaqa kaqratupachan wañuchisqa kanqaku”, nispa

 Biblian nin: “Mana allin kaqta ruwaqkunan juchachasqa kanankupaq kausarimunqaku”, nispa (Juan 5:29). Chay runakunaqa kausarimpusqanku qhepaman imakunatachus ruwasqankuman jinan juzgasqa kanqaku, manan manaraq wañupushaspa ruwasqankuman jinachu. Chaymi Jesuspas nirqan: “Chaypin wañusqakunaqa Diospa Churinpa kunkanta uyarinqaku, jinan uyarikuqkunaqa [kasukuqkunaqa] kausanqaku”, nispa (Juan 5:25). Arí, sichus chay kausarimpuqkuna Cristoq kunkanta uyarinqaku otaq imachus yachachisqanman jina kausanqaku chayqa, sutinkun “kausay libropi” qelqasqa kanqa (Apocalipsis 20:12, 13).

 Wakin runakunan ninku: “Kausarimuqkunaqa wañusqanku cuerpollawantaqmi kausarimpunqaku”, nispa.

 Biblian nin: Pipas wañupuqtinqa chay runaq cuerpon ismupusqanta, jinaspa ch’usaqman tukupusqanta, chhaynaqa manan kasqan cuerpollayoqchu kausarimpunqaku (Eclesiastés 3:19, 20).